भांगरभूंय | प्रतिनिधी
पावस सुरू जालो की सगळी कडल्यान अळमीं वयर येतात. कांय वाठारांनी हाका ‘कुत्र्याची सत्री’ अशेंय म्हण्टात. पूण रानांत जावपी अळम्यां मदीं कांय विखारीय आसतात. बाजारांतल्यान अळमीं विकत घेवपी गिरायक हातूंतलें तज्ज्ञ आसना, देखून नकळटां विखारी अळमी खावन केन्ना केन्ना लोक आपलो जीव वगडायतात. हाचे परस जर तुमी घरांत शास्त्रीय पद्धतीन तयार केल्लीं अळमीं वापरली, तर जिवाक कसलोच धोको आसना आनी ताचे शरीराक जावपी फायदेय मेळूं शकतात.
अळम्यांचे तशें जायते प्रकार आसात, पूण आमी हांगा ‘बटन मशरूम’विशीं जाणून घेवंया. हातूंत भरपूर प्रमाणांत प्रथिनां (प्रोटीन्स) आसतात. गोडेंमूत (डायबेटीस) आशिल्ल्या पिडेस्तां खातीर आनी काळजाचे भलायके खातीर हीं अळमीं भोव उपेगी थारतात, देखून शिवराक तशेंच मांसाहारी लोकां मदीं हाका चड पसंती आसा. अशीं हीं अळमी तुमी तुमच्या घरांतले ल्हानशे सुवातेर लेगीत पिकोवं शकतात. हाचें 3 दिसांचें प्रशिक्षण म्हापश्यां सुरू आसा.
म्हापश्यां शिवानंद वळवयकार हांणी फुडाकार घेवन ‘वनश्री’ नावाची कंपनी सुरू केल्या. गोंय सरकार आनी तांचे कंपनी मदीं एक कबलात (MOU) जाल्या, जे वरवीं श्री. वळवयकार आपल्या सुसज्ज प्रयोगशाळेच्या आदारान इत्सुक उमेदवारांक अळमीं लागवडीचें प्रशिक्षण दितले. हें प्रशिक्षण ‘कौशल्या पथ’ उपक्रमा खाला आयोजीत केलां. गोंयचे मुख्यमंत्री डॉ. प्रमोद सावंत हांणी हाका खाशेली परवानगी दिल्या.
सद्या बाजारांत अळमी खावप्यांचें प्रमाण वाडिल्ल्यान आतां अळम्यां खातीर फकत पावसाची वाट पळोवपाची गरज ना, वर्सभर ताचें उत्पादन घेवं येता. हो वेवसाय सुरू करपाक व्हड जागेची वा खंयचेय मशिनरीची गरज लागना आनी भांडवला खातीर रीण घेवपाचीय सक्ती नासता. हाचें बियाणे तयार करपाक लाकडाचो भुसो, गव्हाचें काड वा भाताचो पेळो वापरतात. महाराष्ट्र आनी कर्नाटकांतले शेतकार अळमी हें जोड- पीक म्हूण घेतात, पूण तुमकां फकत अळमीं शेतीच करची आसल्यार तीय तुमीं करू शकतात. म्हापश्यां जावपी ह्या प्रशिक्षणांत 10 जणांची एक बॅच आसा आनी 14 तारखे सावन हें प्रशिक्षण सुरूय जालां. फकत 500 रुपया इतकी नाममात्र फी भरून कोणाकय हें प्रशिक्षण घेवंक येता. हें प्रशिक्षण घेवन तुमी स्वावलंबी जावन स्वताचो वेवसाय सुरू करूं शकतात. श्री. वळवयकार हे रानमोगी आसून, तांच्या रानमोगांतल्यानच अळमीं प्रशिक्षणाची ही कल्पना मुखार आयली आनी सरकारानय ताका योग्य सांगात दिलो.
घरांतल्या घरांत कमी सुवातेर जावपी ह्या वेवसायांत भरपूर अर्थिक लाभा सांगाताच वीज बिल वा उदका बिलाचो जांव चड खर्च येना आनी सुरुवातीक दुसऱ्याक पगार दिवपाचो प्रश्नच आसना. घरांतल्या बायलां खातीर तर ही एक भांगरा संद आसा. मुख्यमंत्री डॉ. प्रमोद सावंत सदांच आवाहन करतात की तरणाट्यांनी नोकरी सोदपी न्हय तर नोकरी दिवपी जावंक जाय. अळमी लागवडीचें प्रशिक्षण ही तुमच्या स्वावलंबी जिणेची एक बरी सुरवात थारूंक शकता. फुडें वचून मार्केटिंग आनी हेर कामां खातीर तुमी दुसऱ्यांक नोकरीय दिवंक शकतात. तुमकां हाचे विशीं दुबाव आसल्यार तुमी 9637553837 ह्या क्रमांकाचेर फोन करूंक शकतात वा [email protected] ह्या ईमेलचेर संपर्क साधू शकतात. तुमी ह्या संधीचें भांगार करतले अशी आशा आसा.
नीट परिक्षा जुनांत
सांगपाचें म्हणल्यार, हालींच हांव पेडणेंतल्या सरकारी शाळांनी मुफत करिअर मार्गदर्शना खातीर गेल्लो, तेन्ना म्हाका जाणवलें की भुरग्यांक NEET आनी NET परीक्षेंतलो फरक कळना. तो जितले बेगीन समजत तितलो बरो. हालींच वैजकी शिक्षणा खातीर जावपी NEET परिक्षा कांय कारणांक लागून फुडें धुकल्ल्या, पूण भुरग्यांनी आपल्या फुडारा विशीं जागरूक रावप गरजेचें आसा.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
