भांगरभूंय | प्रतिनिधी
खबरां टिव्ही चॅनल पत्रकारिता ही फकत ग्लॅमराची दुनिया न्हय. ती सतत जागरूक रावपाची, समाज समजून घेवपाची आनी जापसालदारकेन म्हायती दिवपाची सेवा आसा.
प्रसार माध्यम – 6
आजच्या काळांत न्यूज चॅनल हो फकत खबरो सांगपाचें माध्यम उरिल्लें ना, तर तो लोकमत घडोवपी एक प्रभावी मंच जाला. देखून चॅनल पत्रकार (रिपोर्टर, अँकर, निवेदक, उपसंपादक, डिबेट होस्ट) हांचेर व्हड जापसालदारकी आसता. पडद्याचेर दिसपी मनीस आत्मविस्वासान भरिल्लो दिसलो, तरीय ताच्या फाटल्यान सततचो अभ्यास, निरीक्षण आनी मेहनत आसता.
गरजेची पात्रताय
न्यूज चॅनलांत काम करपाक पत्रकारिता, मास कम्युनिकेशन, भाशा वा समाजशास्त्र सारक्या विशयांतली पदवी उपेगाची थारता. पूण फकत पदवीच पुरो जायना. भाशेचेर शेक, निवळ (स्पश्ट) उच्चार, बरी स्मरणशक्त, सामान्य गिन्यान आनी झटपट विचार करपाची तांक, प्रसंगावधान, हजरजबाबीपणा आसप महत्वाचें आसता.
रिपोर्टराक घडणुकेच्या सुवातेर वचून म्हायती एकठांय करची पडटा. अँकराक थेट प्रक्षेपणा वेळार शांत रावून निवळ उलोवचें पडटा. उपसंपादकाक खबरो तपासून, योग्य उतरांनी आनी उण्या वेळांत तयार करच्यो पडटात.
एक बरो चॅनल पत्रकार जावपा खातीर दर दिसा दिसाळीं, वेबसायटी, सरकारी अहवाल, संसद- विधानसभेच्यो घडणुको, अर्थकारण, खेळ, विज्ञान, आंतरराष्ट्रीय घडणुको हांचो अभ्यास करप गरजेचें. फकत “टेलिप्रोम्प्टराचेर आयलें वा दिसलें तितलेंच वाचप” पुरो जायना. ही पत्रकारिता न्हय.
घडणुकेचो संदर्भ खबर नासल्यार अँकर वा रिपोर्टर पळोवप्यांच्या प्रस्नांक न्याय दिवंक शकना. देखून सतत वाचन, म्हायतीची तपासणी आनी निरीक्षण महत्वाचें. जायते व्हडले पत्रकार दर दिसा वर, दोन वरां अभ्यास करतात. एखादे बातमेचो व्हिडियो तुमी तयार केलो जाल्यार तातूंत स्वताचीं मतां, बातमे फाटली बातमी आसपाक जाय. छापून आयलां, बुलेटिनांत सांगलां तेंच परत व्हिडियो करून सांगल्यार पळोवप्याक तें रिपिटेशन दिसपाक शकता.
उलोवपाची शैली
चॅनल पत्रकारान निवळ, संयमान आनी आत्मविस्वासान उलोवंक जाय. अती- नाटकीपण, आड्डप वा पक्षपाती भाशा टाळची. उलोवपाची गती मध्यम आसची. उतरांचे उच्चार स्पश्ट जावंक जाय. तोंडार गंभीर पूण नैसर्गीक भाव आसपय महत्वाचें आसता. आवडीच्या पक्षाचो म्हणयारो जाल्ले सारको उलोवप, विरोधकांक मदींच थांबोवप हाका पत्रकार म्हणिनात.
कॅमेऱ्या सामकार उलोवपाचो सराव करप, आरशा सामकार उबो रावन वाचप, स्वताचे व्हीडिओ पळोवन चुको दुरुस्त करप हाका लागून पत्रकार म्हूण तुमचें व्यक्तिमत्व विकसित जाता. बर्या पत्रकारान सद्दां उणेंच वर, देड वर तरी वाचन करचें. विंगड-विंगड विशयांचेर आयिल्ले माहितीपट, मुलाखती आनी चर्चासत्रां पळोवचीं. भाशेचें गिन्यान वाडोवचें. सोशल मीडियावेल्या अफवांपासून सादूर रावून तथ्य तपासपाची संवय लावची. इंग्लिशी वांगडाच हिंदी आनी प्रादेशिक भाशेचें गिन्यान आसल्यार संदी वाडटात. तंत्रज्ञान, व्हीडिओ एडिटिंग, सोशल मीडिया आनी मोबाईल जर्नालिझम हांचोय अभ्यास करप गरजेचें जालां.
रवीश कुमार, रजत शर्मा, सुधीर चौधरी, अंजना ओम कश्यप, प्रणोय राॅय, अर्नब गोस्वामी, राजदीप सरदेसाय हांचे काम करपाचे पद्धतीचो नवोदित अभ्यास करतात. दरेकाच्या शैलींत वेगळेपण आसा; पूण तथ्यांचो अभ्यास आनी सादरीकरण हें सारकेंच वैशिश्ट्य दिसता.
न्यूज चॅनलांतले विभाग
न्यूज टिव्ही चॅनलांत रिपोर्टिंग, अँकरिंग, उपसंपादन, स्क्रिप्ट रायटिंग, अणकार, व्हीडिओ एडिटिंग, ग्राफिक्स, रिसर्च, डिबेट प्रोडक्शन, सोशल मीडिया, कॅमेरामन, तांत्रिक अशे जायते विभाग आसतात. पडद्याचेर एकूच मनीस दिसत आसलो, तरीय ताच्या फाटल्यान एक व्हड टीम काम करीत आसता. तांची लायब्ररीय आसता. देखीक – कोरोना आयलो तेन्ना कोरोना म्हणल्यार कितें, ताचो इतिहास, उगम हाची म्हायती ते सोदून रोखडेच उपसंपादक आनी उपरांत निवेदकाक दितात.
खबरां टिव्ही चॅनल पत्रकारिता ही फकत ग्लॅमराची दुनिया न्हय. ती सतत जागरूक रावपाची, समाज समजून घेवपाची आनी जापसालदारकेन म्हायती दिवपाची सेवा आसा. अभ्यास, प्रामाणिकपण, भास आनी निरीक्षणशक्ती हांच्या बळाचेरूच एक पत्रकार पळोवप्यांचो विस्वास जिखूंक शकता.
– सत्यवान
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
