भांगरभूंय | प्रतिनिधी
संसदेत महिला आरक्षण दुरुस्ती विधेयक नामंजूर जाले उपरांत, आमी तें परत हाडटले अशें उतर सत्ताधाऱ्यांनी आतां दिलां, तरी तातूंत कितलें प्रामाणिकपण आसा आनी बायलां विशीं कितलो कळवळो, हाची जाप येवपी काळूच दितलो.
संसदेत महिला आरक्षण विधेयक 21 सप्टेंबर 2023 दिसा मंजूर केलें, तेन्ना ताचो असो कितें उत्सव मनयलो की जणु फाल्यां सावनच संसदेत महिलांचें राज्य येतलें. ‘नारीशक्ती वंदन अधिनियम’ अशें गोंडस नांव दिवन स्त्रीशक्तीचो सन्मान केल्याचो आव हाडलो. मात, मागीर पुला खालच्यान बरेंच उदक व्हांवन गेलें. 16, 17 आनी 18 एप्रील 2026 दिसा जाल्ल्या संसदेच्या विशेष अधिवेशनान ह्या राजकी डावांतलो फोलपण उक्तो केला. केरळ, पुद्दुचेरी, आसाम, तमिळनाडू आनी पश्चिम बंगाल ह्या पांच राज्यांच्यो विधानसभा वेंचणुको दोळ्यां मुखार दवरून केंद्र सरकारान जे ताकतिकेन हें विधेयक मुखार धुकलपाचो यत्न केलो, ताचे फाटल्यान महिलांचो कळवळो आशिल्लो काय विरोधकांक ‘महिलाविरोधी’ थारावपाची राजकी खेळी, हो संशोधनाचो विशय. आपले कडेन फावशें संख्याबळ नासतनाय संसदेत महिला आरक्षणा विशींचें म्हत्वाचें विधेयक मांडपाची राजकी जोखीम सरकाराचेरच उमथल्या. हें दुरुस्ती विधेयक नामंजूर जालेंच ना, तर ताचे फाटल्यान उरिल्लीं दोन विधेयकांय फाटीं घेवपाची नामुष्की केंद्र सरकाराचेर आयली. ताका लागून विधानसभाच न्हय, तर लोकसभेंत व्हडा संख्येन सक्रिय वाटेकार जावपाची बायलां वावुरप्यांची संद हुकल्या आनी देशाच्या राजकारणांतली दादल्यांची मक्तेदारी कायम उरल्या. देसाक स्वातंत्र्य मेळून 79 वर्सां जालीं तरी सावित्रीच्यो धुवो आयजूय लोकशायेच्या मंदिरांतल्या समन्यायी प्रवेशा पसून वंचित उरल्यात. खंयचेय एके बायलेक राष्ट्रपती, प्रधानमंत्री, मुख्यमंत्री, महापौर केली, हाचो अर्थ भोवसंख्य बायलांक राजकी प्रतिनिधित्व दिलें असो जायना. देखूनच भारतीय संविधानाक अभिप्रेत आशिल्लें दादलो- बायल समानतायेचें सूत्र हांगाय आपणावपाची गरज आसा.
लोकसभेंतल्या सद्याच्या 543 सुवातींतच 33 टक्के आरक्षण दिल्यार आमी सरकाराक रोखडोच तेंको दितले, अशें आव्हान काँग्रेस फुडारी राहुल गांधी हांणी दिवनूय तांची दखल सत्ताधाऱ्यांनी घेतली ना. ताच्या उरफाटें, विरोधकच कशे महिला आरक्षणाक विरोध करतात, असो आभास निर्माण करपाचो यत्न तांणी केलो. लोकसभेची वांगडी संख्या 543 वयल्यान 850 मेरेन व्हरपाचो दाव म्हणल्यार फकत बायलांचें प्रतिनिधित्व वाडोवप न्हय, तर उत्तर भारतांतल्यो सुवाती वाडोवन दक्षीण भारताचें राजकी म्हत्व पद्धतशीरपणान सोंपवपाचो हो कट तर न्हय मूं? असो प्रस्न तमिळनाडूचे मुख्यमंत्री एम. के. स्टालिन आनी द्रमुकची खासदार कनिमोझी करुणानिधी हांणी विचारलो. ताचेर पटपा सारकी जाप दिवप सत्ताधाऱ्यांक जालें ना. तशेंच, समाजवादी पार्टीच्या अखिलेश यादव हांणी मांडिल्ली ‘जात जनगणने’ची भुमिका फकत राजकारण म्हणून न्हयकारूंक मेळपाची ना.
ओबीसी बायलांच्या वांट्या विणें हें आरक्षण म्हणल्यार समाजिक न्यायाच्या नांवान थारावीक वर्गाची सत्ता स्थापन करपाचें साधन थारतलें. देशांत जातनिहाय जनगणना जायना, तो मेरेन नेमक्या खंयच्या वर्गाक कितलें प्रतिनिधित्व जाय, हें स्पश्ट जावचें ना. देखूनच 2011 चे पोरणे आंकडेवारीचेर आदारीत बायलांचें प्रतिनिधित्व वाडोवपाचो वा मतदारसंघ फेररचणुकेचो अट्टाहास न कळपा सारको आसा.
देशांत बायलांचेर जावपी अन्याय, अत्याचाराच्या घटनांनी वाड जाल्या. स्त्रीभ्रूण हत्या म्हणल्यार चलयांचो जल्मच न्हयकारपाचें अमानवी कृत्य आयजूय घडटा. जाती- धर्माच्या कर्मकांडांचो बोवाळ जावपा फाटल्यानय स्त्री शोशणाची विकृत मानसिकता आशिल्ल्याचें भोंदूबाबा खरातच्या प्रकरणांतल्यान उजवाडान आयलां. महिलांक नग्न करून तांची मिरवणूक काडपाची लजेची गजाल टाळपाकूच न्हय, तर वांशिक दुस्वासाच्या उज्यांत लासपी मणिपूरांत शांतताय प्रस्थापित करपाक केंद्र सरकार पुराय अपेशी थारलां. एके वटेन नारीशक्तीचो जयघोष जातनाच आंतरराष्ट्रीय पांवड्याचेर देशाचें नांव उजळावपी बायलां पेलवानांक न्याया खातीर रस्त्यार देवचें पडटा, पूण तांकां लेगीत न्याय मेळना. उनाव आनी हाथरस सारक्या बायलां अत्याचाराच्या क्रूर घडणुकांनी देशाची मान लजेन सकयल जाल्ली आसतना, महिला आरक्षणा खातीर गळो काडपी पक्ष स्वताचे संघटनेत बायलांक 33 टक्के सुवात दितना दिसनात. ह्या सत्तासंघर्शात ‘तिच्या’ पांखाट्यांक आरक्षणाचें घट बळगें दिवन तिका सत्तेच्या मुख्य प्रवाहांत हाडपाचीं सपनांय दिल्लीच्या दरबारी राजकारणांतल्या प्रदूशित हवेंत विरून वतात.
संवसारीक झुजाचे फाटभुंयेचेर आज आमचो देश म्हारगाय, गरिबी, कुपोषण, बेकारीच्या चपक्यांत सांपडला आनी देशाची अर्थव्यवस्था लेगीत फोंडकुलांत पडल्या. हे प्रस्न घरसवंसार चलोवपी बायलांक चड खरायेन सतायतात. तेन्ना प्रस्न पडटा की, एका काळांत गॅस दरवाडीच्या प्रस्नाचेर रस्त्यार देंवन खर आंदोलन करपी स्मृती इराणी आतां खंय आसात? मुंबयच्या फोंडकुलांचेर पद गावपी आरजे मलिष्का खंय शेणल्या? देशांत भ्रश्टाचार वाडला आसतना आनी वादग्रस्त मंत्र्यांचे नवे- नवे घोटाळे, भानगडी मुखार येत आसतना, ‘थोर समाजसेवक’ अण्णा हजारे ओगी कित्याक आसात?
खरें तर, आपल्या कर्तव्य आनी जापसालदारकीची वळख आशिल्लो महिलावर्ग घरा सावन कचेरे मेरेन आपली दरेक भुमिका सामकी वेवस्थित निभायत आयला. ‘चूल आनी मूल’ सांबाळपी बायल बदलते परिस्थितींत नोकरी, वेवसाय करून दादल्यांच्या खांद्याक खांद लावन काम करता. ‘घरवेवस्थापन गुरू’ म्हणून तांचें स्थान कोणाकच न्हयकारूंक मेळचें ना. ‘चली शिकली उदरगत जाली’, हें वास्तव आसतानाय चलयांक शिक्षण दितना वा तांच्यो आवडी- निवडी वा भलायकी सांबाळटना दुय्यम स्थान दिवप अजून चालू आसा. दंगली आसूं वा झुजाची परिस्थिती, तातूंत मुखेलपणान सगळ्यात चड भड्डता तो महिलावर्गूच. समाजांतली ही असमानतेची वा भेदभावाची मानसिकताय पयस करपाची आसल्यार, बायलांच्या कर्तृत्वाक उर्बा दिवपाची गरज आसा. मुखेल म्हणल्यार, नारीशक्तीक फकत पयसुल्ल्यान वंदन करून महिला आरक्षणाचो गुंतो सुटपाचो ना. लोकसंख्येच्या अर्दान आशिल्ल्या महिलांक विधानसभा आनी लोकसभेंत 33 टक्के न्हय, तर 50 टक्के आरक्षण दिवपाची गरज आसा. तेन्नाच दादले आनी बायल हांचे मदलो भेदभाव सोंपून तांकां समन्यायी प्रतिनिधित्व मेळूंक शकतलें.
खाशेली गजाल म्हणल्यार, जो राजकी पक्ष केंद्रांत सत्तेंत आसा, ताका महिला आरक्षण विधेयक मंजूर करून घेवपाक संसदेत अपेश येता, त्याच पक्षाच्या फुडाऱ्यांनी आपले हारींतल्यान बोध घेवचे बदला, नामंजूर जाल्ल्या महिला आरक्षणाच्या मुद्द्याचेर रस्त्यार देवून राजकी आंदोलन करपाचें कारणच कितें? ह्या सत्ताधाऱ्यांच्या आंदोलनाक लागूनच वरळीच्या येरादारीच्या कोयडेंत सांपडून तिडकल्ल्या एके ‘रणरागिणी’न सरकारी वेवस्थेक जाब विचारून तिका निरुत्तर केल्या. ह्या प्रकरणांत चक्क सरकाराचीच फजेत जाल्ल्यान आतां ते ‘रणरागिणी’क ह्या ना त्या कारणान कोंयडेंत धरपाचे यत्न राजकी सत्तेच्या आडांतल्यान जाता आसत, तर तो न्याया खातीर झगडपी दरेके दुर्गेचेर अन्याय थारतलो.
प्रकाश सावंत
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
