भांगरभूंय | प्रतिनिधी
भलायकी हीच खरी संपत्त, ती सांबाळूंक जाय, अशें सगलेच म्हणटात. तातूंत बायलांनी तर चडूच जतनाय घेवंक जाय. कारण बायल निरोगी तर कुटुंब निरोगी. आवयांची भलायकी बरी उरल्यार समाजाचें आरोग्यय तंदुरुस्त उरता. मात, ते खातीर संतुळीत आहार आनी व्यायाम जाय. बरे जिणेंशैलींत, शिस्तींत जगप आयज शक्य जायना. हाचे फाटल्यान जायतीं कारणां आसात. तरीय दरेकल्यान जाता तितली भलायकेची जतनाय घेवंक जाय. राज्यांत ‘चेक्ड बाय डाॅक्टर’ ही मोहीम खास बायलां खातीर सुरू जावपाची आसा. 40 वर्सां वयल्या पिरायेच्या सगल्या बायलांची सरकारी हाॅस्पिटलांनी मुफत तपासणी जातली. खाजगी हाॅस्पिटलांनी सवलतीच्या दरात. हरशी इसीजी, रक्त, दोळे, सोनोग्राफी, थायराॅयड तपासणी करपाक 5 ते 10 हजार रुपया लागतात. बऱ्याच जाणांक तें परवडना. देखून तपासणी मुफत जावप समाजाचे भलायके खातीर गरजेचें. कारण गोंयांत दुयेंसां खूबच वाडल्यांत. ही ‘चेक्ड बाय डाॅक्टर’ मोहीम वर्साक दोन फावटी तरी चालीक लावची!
गोंयांत कॅन्सर, किडणी दुयेंसांचें प्रमाण चड, अशें तज्ञ सांगतात. वेळारूच तपासणी जाल्यार हीं दुयेंसां लक्षांत येतात आनी उपचार करपाक बऱ्याक पडटा. दुयेंतीचो जीव वाटावता. कुटुंबांचे मनस्ताप उणे जातात. फक्त तपासणीच न्हय, तर आहार, जिणेशैली, शिस्तय तितलीय म्हत्वाची. हालींच्या बऱ्याच भुरग्यांक, तरणाट्यांक शिवराक जेवण आवडना. मसाल्याचें, तळिल्लें आसल्यारुच तांच्या ताळ्या सकयल उंडी देंवता. मासाहारी जेवणाच्या बाबतींतूय तांकां चमचमीत जाय. तांकां ‘फास्ट फुडा’ चें मात आकर्शण. माॅडर्न तरणाट्यान बिर्याणी, पिझ्झा, बर्गर असलेच जिनस खावपाक जाय. कॅनांतलें थंड पेयूच पियेवपाक जाय असो एक समज कांय वर्सां पयलीं रुढ जाल्लो. आयजूय तो आसा. अर्थांत चलयांकूय हें लागू जाता. मीठ, साकरेचें, तेलकट, मसाल्याचें, मांसाचें जिनस सद्दां उठून खायत जाल्यार ताचे परिणाम पिरायेची चाळिशी हुपली काय जाणवतात. भायलें खावन उत्तर प्रदेशांतले एके चलयेक कांय म्हयन्यां पयलीं मरण आयिल्लें. ‘चेक्ड बाय डाॅक्टर’ मोहिमे खाला बायलांनी कितें खावचें ताचोय चुकनासतना सल्लो दिवपाक जाय. कारण जिबेचेर नियंत्रण नाशिल्ल्यान भोवतेक दुयेंसां जातात. गोंयकार बायलांनी पारंपरीक जिनस शिकपाक जाय. ताका आधुनिकतायेचो स्पर्श जाल्यार हालींच्या भुरग्यांक ते आवडटले. भाजी, चपाती खायनाशिल्लीं भुरगीं, तेच भाजयेचो सँडवीच खातात.
जिणेशैलींत बदल जाला, ते विशींय दोतोरांनी बायलांक सल्लो दिवंक जाय. हालींच्या तेंपार बऱ्योच बायलो कामा वयल्यान सात ते साडेआठ मेरेन घरा पावतात. उपरांत न्हावप, जेवप, फाल्यांची तयारी, सोशल मिडिया पळोवप… 1985 च्या पयलीं चडशीं घरां साडेणव मेरेन घोरेतालीं, तीं आज उणींच बारा मेरेन जागीं आसतात. सकाळीं साडेपांचांक बरेच गोंयकार उठ्ठाले. आयज स- स म्हयने उदेंत्या सुर्याचें दर्शन घेवंक नाशिल्लें हजारांनी गोंयकार आसात. बायलांनी सद्दां अर्द वर तरी चलपाक जाय. व्यायाम, योग, प्राणायाम जायच. ताणतणावाचे प्रसंग टाळचे. सिगार, सोऱ्या पसून पयस रावंचें. हय, बायलांनी!! आतां त्योय तातूंत फिशाल जाल्यात. म्हत्वाचें म्हणल्यार सात ते आठ वरां झेम जायच. जी चडश्यांक मेळना. प्रोसेस्ड अन्न, बदलिल्ली खाणां- जेवणाची पद्दत आनी व्यायाम नासप हीं दुयेंसां वाडपाचीं कारणां, अशें दोतोरुच सांगतात. कांय संवयींचेर उदक सोडल्यार थोडे दिसूच त्रास जातलो! टिव्हीचेर माळो पळोवप, सोशल मिडिया धवळप उणें करून बायलांनी तो वेळ हेर कामां खातीर, व्यायाम, वाचन, भुरग्यांक दिल्यार भलायकेचेर बरोच परिणाम जातलो.
बायलांची तपासणी करतना आहार आनी जिणेंशैलीचेर दोतोरांनी सल्लो दिल्यार ताचो बायलांक तपासणे इतलोच फायदो जातलो. खरें न्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
