गोंयांक भिवपाची गरज ना

भांगरभूंय | प्रतिनिधी

संकश्टा वेळार आत्मविश्वास दिवपी नेतृत्व मतदारांक भावता हो रकाद पांच विधानसभा वेंचणुकांनी धाडला. वेंचणुको जाल्ल्या कांय राज्यांनी विरोधक एकठांय नाशिल्ले.

देसांतल्या पाच विधानसभा वेंचणुकांनी पिरायेन 65 वर्सांवयल्या मुख्यमंत्र्यांआड कौल मतदारांनी दिला. ‘भांगरभूंयं’त फाटल्या शेनवारा प्रस्थापितांआड वेंचणुकेंत मतदान जालां असो अदमास उक्तायल्लो. प्रस्थापित म्हणल्यार चड तेंप राज्यांत आशिल्लें सरकार, दुसऱ्याक मार्ग न दाखोवपी 65 वर्सां वयले पिरायेचे मुख्यमंत्री. जनते मेरेन पावपी, ल्हान आनी व्हडांक मान दिवपी प्रस्थापित मुख्यमंत्र्यांचें सरकार जिखूंक शकता केंद्र सरकाराच्या बळग्यार. वेंचणुकेचें जैत मनोवपी गोंय सरकार युतीचें, अपक्षांचेंय बळगें आशिल्लें. देसांतल्या पांच विधानसभा वेंचणुकां मागीर गोंय उबाळांत हुलपता, राजकारणय तापतलें बेगीन वेंचणूक जातली ही जाणवीकाय सरकाराक जाल्या. क्लायमेट चेंज कळपी गोंय, शिकिल्ल्या गोंयकारांक राजकारण तापलें तरी भिवपाची गरज ना. एकठांय आसात असो बोवाळ घालत विखुरपी विरोधी राजकी पक्ष, फुडारी सरकाराक लावाचे. 

परिवर्तन म्हणल्यार बदल, युवा पिळगेक बदलाचें वारें बेगीन जाय हें हालींच्या विधानसभा वेंचणुकांनी शिकयलां. सत्ते वाटेन मतदार वतात, झुजा वेळार पयसो, राजकी थिराय म्हत्वाची हें गोंयच्या शिकिल्ल्या मतदारांक कळटा. भारतीय मतदारांकय तें कळपाक लागलां. 

संकश्टा वेळार आत्मविश्वास दिवपी नेतृत्व मतदारांक भावता हो रकाद पांच विधानसभा वेंचणुकांनी धाडला. वेंचणुको जाल्ल्या कांय राज्यांनी विरोधक एकठांय नाशिल्ले. सत्ते आड विरोधी पक्षान, आमदारांनी एक दीस न्हय पांच धा वर्सां कांय राज्यांनी झुज दिलां. तामीळनाडूंत राजकारणात अणभव नाशिल्लो अभिनेतो थलपती साॅरी जोजेफ विजय चंद्रशेखर हाच्या पक्षाचें जैत दोन वर्सां केल्ल्या वावराचें. खरें जैत अस्तंत बंगालावरी राज्यांतलें, टीएमसीचें, गुरुदेव रवींद्रनाथ टागोर हांचे भुंयेंतले. बंगालांतल्या लोकांक  भयमुक्त राज्य मेळटलें हो विश्वास देसाच्या नेतृत्वान वेंचणुके वेळार दिलो. सुडाचें राजकारण जावचेंना, अस्तंत बंगालांत शांतीकाय येतली अशें जैताक येवकार दितना प्रधानमंत्री नरेंद्र मोदी हांणी कळीत केलां. अस्तंत बंगाल, आसामांतले जैत गोंयांक उमेद दिवपी. दिवाळेआदीं गोंय विधानसभा वेंचणूक जातली ही मेसेज धाडपी. विरोधी पक्षांतले अणभवी आदले मुख्यमंत्री क्रियाशिल नाशिल्ल्यान गोंयांक भिवपाची गरज ना. राजकारणात अस्थिरतायेचो अणभव गोंयकारांनी घेतला. तामीळनाडूतलें राजकारण गोंयांतल्या अस्थीर राजकारणाची याद करुन दिवपी. तसलें अस्थिरतायेचें राजकारण परतून गोंयांक नाका हें मतांतल्यान गोंयकार सांगतलो, हातूंत दुबाव ना. 

केरळांत काँग्रेसी आड काँग्रेस कार्यकर्ते आपल्या लिडराच्या पोस्टराक काळें लायतात. कित्याक? ते केरळांतल्या रस्त्यार चड देंवलेना, देंवले ते थळावे. आसामांत काँग्रेसीचे आदले आमदार भाजपांत येवन वेंचणुकेंत हॅट्रिक करतात कोणाच्या, कसल्या बळग्यार? केंद्र सरकारान केल्ल्या उदरगतींच्या पावलार न्हय?  तामीळनाडूंत नव्या थलपतीक (कमांडराक) पयलीं तेंको दिवपाक काँग्रेस खिणाभितर वांगडच्या वेंचणूक सांगाती पक्षाक विसरुन धांवली. टीव्हीकेन फायलींत घालून राज्यपालांक कोणाचीं पत्रां दिलीं तें काँग्रेसीक खबर आशिल्लें? अस्थिरतायेचें राजकारण गोंयांक नवें न्हय,  गोंयच्या मतदारांक ह्या वगतार तें नाका हें मतदार दाखोवन दितले. कायदो आनी संविधानाचो अभ्यासांतल्यान तामीळनाडू, केरळांत सरकार जातलें अशी आस्त बाळगूया.       

गुजराताक जाल्लो विमानाचो भिरांकुळ अपघात युवांक, जाण्ट्यांक विमान येरादारी पासून पयस दवरना. तो अॅक्सिडेंट जातना केरळांत वरिश्ठ पत्रकार म्हासंघाचे बांदावळी पासत बसका फाटल्या वर्सा जाल्ली. ते बसकेंत केरळांतले अस्तमेक गेल्ले मुख्यमंत्री तशेंच मुख्यमंत्रीपदाचे सर्तींत आतां आशिल्ले व्ही डी सतिसन हांकां मेळपाची संद मेळ्ळी. उक्तावणाक केरळाचे मुख्यमंत्री सवकासायेन चलताले, उलयताले. तांचें सरकार 2026 चे वेंचणुकेंत येवचेंना अशें दिशिल्लें आनी जालेंय तशेंच. केरळ पत्रकारांचे बसकेंत दुसरे दिसा सतिसनांक मीडिया विशींचें चर्चासत्र सोंपून भायर सरतना मीडियाचो रेवाडो पडलो. माध्यमांक म्हायती दिवन भायर सरतना तांचे कडेन उलयतना तांचो आत्मविश्वास, नेतृत्वाचे तांकीची जाणवीकाय जाली. तांकां हिन्दी भास कळटा, तें माध्यमांक भावतात हें कळिल्लें. माध्यम उद्येगांत ते भागीदार आसात. युडीएफाक जैत मेळटलें हें वेंचणुकेआदींच केरळांतले वरीश्ठ पत्रकार सांगताले. सतिसनांक माध्यमांनी मुखेल करुन पत्रकारांनी  घडयलां. पत्रकार राजकारण्यांक घडोवपाक, उडोवपाक शकतात हें कालचे, हालींचे वेंचणुकेन दाखोवन दिलां. राश्ट्रीय माध्यमांचो, वरिश्ठ पत्रकारांचो राज्यांतल्या वेंचणुकांनी व्हड हात आसता. उद्येगाचें अर्थकारण तातूंत आसता.  

ज्येश्ठ, वरिश्ठां खातीर येवजणी, नारीशक्तीक उर्बा दिवपी नेतृत्व गोंयांत आसा. त्या भायर राजकी थिराय, राजभासेक नवी दिका दिवपी, अणभवी, चुको सुदारपी मंत्री, आमदारय सरकारांत आसात. मागीर भिरांत कसली?

दोन अणभवी गोंयकारांक तामीळनाडूच्या राजकारणात म्हत्व आयलां. पयले तामीळनाडूचे राज्यपाल राजेंद्र आर्लेकार भाजपाचे निश्ठावंत, राजभासमोगी. दुसरे काँग्रेसीचे एकनिश्ठ तामीळनाडू काँग्रेस इनचार्ज गिरीश चोडणकार. तेय कोंकणीमोगी. राज्यपाल श्री. आर्लेकार हांचेर दोन राज्यांतलें सरकार घडोवपाची जापसालदारकी आसा. तामीळनाडू, केरळ ह्या दोन राज्यांची जबाबदारी वेंचणुके वेळार सांबाळपी राज्यपाल उंचेले शिक्षण घेतिल्ले, सर्तींत उडीय घेवपी. प्रदेस भाजपाध्यक्ष, सभापती, मंत्री  राज्यपालपदा मेरेन पावतना तांचो अणभव, गिन्यान चड. काँग्रेशीचीं आंदोलनां तांकां नवीं न्हय. तामीळनाडूंत राज्यपाल आर्लेकार, गिरीश एकामेकांक मेळून  भासाभास केल्यार तामीळनाडूच न्हय केरळांतल्या राजकारणाचीं गणितां सोपीं जातलीं.     

टीव्हीके पक्ष सरकार घडोवपाक मुखार सरला काँग्रेसीच्या तेंक्याचेर. तामीळनाडू राज्य काँग्रेसाध्यक्षांनी थलपती विजयाक पत्र दिलां? हेर खंयचे राजकी पक्ष विजयाक आधार करतले? ते समजून घेवपाचे अधिकार राज्यपालांक आसात. तामीळनाडूंत वेंचणुकेच्या उपरांत विजयाक लोकांनी माथ्यार घेतलें तरी कायद्यान तांच्या पक्षालागीं आमदारांचें भोवमत ना. तें कागदाचेर मेळ्ळें जाल्यार विजय सरकाराची बांदावळ जातली. तामीळनाडूच्या मतदारांनी खंयच्याच राजकी पक्षाक स्पश्ट भोवमत दिवंक ना. ‘फ्रॅक्चर्ड मॅन्डेट’ मतदार दिता तेन्ना आमदारांचोय बाजार जाता, पक्षनिश्ठ हे वटेन ते वटेन वतात. आमदारांचो बाजार आडावपा पासत राज्यपाल ‘थलपती’ जावंक शकतात. गोंयकार राज्यपाल  ‘थलपती’ जाल्यार लाव गोंय विधानसभा वेंचणुकेंत जातलो. तामीळनाडू, केरळांतले वादळ आडावपाची तांक श्री. आर्लेकार हांचे मदीं आसा. तामीळनाडूंत राज्यपाल राजवट आयल्यार उदरगत येवंक शकता. तामीळनाडूंत धर्मिक उजो पेट्टना राज्यपाल म्हणून आर्लेकार पावले. त्या उज्याचो धपको राजकी थिराय हाडपी थळाव्या राजकारण्यांक बसला. रोखडी विधानसभा वेंचणूक तांकां नाका. पूण एकवट ना. भिरांत आसा गोंयांक न्हय, व्हडा राज्यांक. 

सुहासिनी प्रभुगांवकार