नेम, कायदे पाळपाची गरज

भांगरभूंय | प्रतिनिधी

आयज राष्ट्रीय सुरक्षा दीस. ह्या विशयाचो आसपाव सगल्या मुळाव्या ते म्हाविद्यालयीन पुस्तकांनी जावपाची खूब गरज आसा.

आ मचो देश 15 आॅगस्ट 1947 दिसा ब्रिटीशांच्या गुलामगिरींतल्यान मुक्त जालो. स्वांतत्र्य मेळ्ळ्या उपरांत आमच्या देशान अर्थिक, राजकी, समाजीक, शैक्षणिक मळाचेर उदरगत केली. आमचे पयलें प्रधानमंत्री पं. जवाहरलाल नेहरू हांच्या फुडाकारान आमी आमचो देश अर्थिक पांवड्याचेर बळिश्ट करपाक पंचवर्सुकी येवजण आपणायली. शेती, उद्येग, कारखाने, रस्ते, पूल, धरणां, दळणवळण यंत्रणा, अश्यो कितल्योशीच उदरगत जाली.
भारताचें उद्देगीकरण जालें. शेताचे उदरगतीक लागून आमी हरित क्रांती येवजण चालीक लायली. नवीन तंत्रज्ञान वापरून आम्ही उदरगत केली आनी अजुनय करीत आसात. पूण ह्याच बराबर सध्या आमच्या मुखार कितलेश्योच समस्या एक व्हड प्रश्न म्हणून उब्यो आसात. गांवांनी आनी शारांतल्या भागांनी सगळी कडेन कोयरूच कोयर दिश्टी पडटा. रस्ते बुरशे आसात. प्रदुशणाची समस्या आनी भलायकेच्यो समस्या आसाच, इतलेच न्हय सकाळीं च्या पितना वर्तमानपत्र वाचपाक आमी घेतात, तेन्ना पयल्याच पानांचेर बातमी दिसता- रस्तो अपघातांत कोण तरी सोंपलों. खरेंच आमची जीण सुरक्षित आसा काय? हो प्रश्न प्रत्येकान स्वताक विचारपाक जाय. मागीरूच राष्ट्रीय सुरक्षा म्हणल्यार किंदें हाची जाणवीकाय आमकां जातली.
राष्ट्रीय सुरक्षा दीस हो दरवर्सा 4 मार्चाक मनयतात. तो फक्त दिसरात दोळ्यांत तेल घालून आमच्या देशाचे रक्षण करपी जवानांचे सुरक्षेचो न्हय तर आमचे जिणेंत लक्ष दिवंक नाशिल्ल्यान जावपी अपघात, लुकसाण, समस्या हांचेर वेळारूच विचार करपाक. म्हणल्यार सुरक्षा बाळगुपाक. देशांत नॅशनल सॅफ्टी कावंन्सिलाची स्थापना 1966 वर्सा मुंबय जाली. तिणेंच हो सुरक्षा दीस म्हणून मनोवपाचें थारायलें.
राष्ट्रीय सुरक्षा दीस हो मागीर राष्ट्रीय सुरक्षा सप्ताह म्हणूनय मनोवपाक लागले.
हाची उद्दिश्टां अशीं आसांत.

1. भलायकी आनी नितळसाण: देशाचें संरक्षण फक्त दुस्माना पसून संरक्षण न्हय तर लोकांची भलायकी बी सुरक्षित आसपाक जाय. दरेकल्यान आपल्या घराचो, गांवांचो, शाराचो, परिसर नितळ दवरपाक जाय. सरकार आनी कारखाने चलोवपी उद्देगपती ह्या दोगांयनी नितळसाण आनी प्रदुषणांक लागून जावपी दुयेसांचेर उपाय सोदून काडपाक जाय. नितळसाणेची सुरक्षा तितलीच गरजेची.
2. अन्न: अन्न हे पूर्ण ब्रह्म अशें आमी म्हणटात. पूण आतांच्या जमान्यांत आमीं घरा तयार केल्लें अन्न सोडून फास्ट फूड चड खावपाक लागल्यात. ताका लागून तरतरांचीं दुयेंसां आमकां जातात. आयचीं तरणाटी भुरगीं सशक्त जावपाची सोडून अशक्त आनी दुर्बळ दिसतात.
3. गरिबी आनी बेरोजगारी: आमच्या सरकारान गरिबी हटाव कितलेंय म्हणलें तरी गरिबी वाडतूच आसा. आतांचो तरणाटो शिकता पूण खूब शिकून पसून बेकार आसा. रोजगार सुरक्षेची चड गरज आसा.
4. बायलांची सुरक्षा : आज बायलांचेर आनी चली मनशांचेर अत्याचार जातात. हे बंद करपाक सगळ्यांनी एकठांय येवपाची गरज आसा.
5. उद्देगीक आनी कार्यस्थळी सुरक्षा : काम करता त्या जाग्यार सुरक्षेचे नियम पाळपाची गरज आसा. आप्तकालीन दुर्घटना टाळपा खातीर आप्तकालीन वेवस्थापन चड गरजेचें आसा.
6. भौशीक सुरक्षा: आतांच्या दिसांनी जर परिस्थिती पळयल्यार सुरक्षेची चड गरज आसा. उदरगतीच्या नांवान रस्त्यांचे चौपदरीकरण आनी स पदरीकरण जाल्ले रस्ते बरें गुळगुळीत जाले, पण त्याच बराबर अपघातूय वाडले. आज बऱ्या मनश्यांक मागीर तो जाण्टो आंसू वा नेण्टो रस्त्या कुशीन चलपाक पसून कठीण जालां. वेगान येवपी दुचाकी, चारचाकी गाड्यांचेर कोणाचेंच नियंत्रण ना? मागीर कसली ही सार्वजनीक सुरक्षा?, दीसान दीस अपघातांत जीव वचपी मनश्याचे जिणेचो कोणूच विचार करिनात. येरादारी नेमांचें कोणाकूच पडिल्लें ना.
7. पर्यावरण सुरक्षा: मनश्यांबरोबर गाडयो बी वाडत आसात. ताका लागुन हवेचें प्रदुशण जाता. शारांनी प्रदुषण नियंत्रण करपी यंत्रणा बसयल्यांत खऱ्यो, पुण त्यो एक शॉपिस म्हणून आसात काय कितें असो मनांत विचार येता. गांवांगांवांनी, शारांनी रस्त्याच्या कडेन प्लास्टीक लासतात. तांका लागून हवेंत प्रदुशण वाडत आसा. पर्यावरण विशय हो फक्त पुसतकाच्या माध्यमातल्यान शिकपूच, पूण तांचो वेव्हारांत उपेग करपाक जाय.
   राष्ट्रीय सुरक्षा ह्या विशयाचो आसपाव सगल्या मुळाव्या ते म्हाविद्यालयीन पुस्तकांनी जावपाची खूब गरज आसा. जाल्यारूच आमी राष्ट्रीय सुरक्षा दिन खरेंच मनयतात, अशें दिसतलें.

प्रा किशोर वासुदेव वझे
नागेशी