भांगरभूंय | प्रतिनिधी
फक्त शिक्षणीक पुस्तकांच न्हय तर साहित्याचीं, विज्ञानाचीं पुस्तकांय तातूंत आसल्यार बरीं.
बदलत्या काळा वांगडा स्वता बदलता, नवें शिकता, तोच तिगता. हे युग डिजीटलाचे. कंपोझिंग ते अॅप वापरपा मेरेनच्यो गजाली सगल्यांनी शिकून घेवंक जाय. कारण ती आयची गरज. भुरगीं वाचना पसून पयस वतात, तांकां अभ्यासा खातीर पुस्तकां मेळनात, तीं विकत घेवप परवडनात, तांचे खातीर 200 च्या आसपास ई लायब्ररी सुरू करपाचो सरकाराचो विचार आसा. सध्या 20 चालू जाल्यात. पालिका, पंचायत वाचपघरांनी त्यो येतल्यो. ह्या वाचपघरांनी शिक्षणा खातीर लागपी पुस्तकां, तशेंच स्पर्धा परिक्षांक लागपी सामुग्री आसतली. सरकारी वाचपघरांनीय ह्यो ई- लायब्ररी जाय. थंय शिक्षणा वांगडा संवसारभरांतल्या साहित्या संबंदीचीं पुस्तकां आॅनलायन दिवं येतात. मात राज्य सरकाराच्या ह्या उपक्रमाचो लाव सगल्या विद्यार्थ्यांनी घेवपाक जाय. कारण सध्याच्या काळांत 25 वर्सां सकयले तरणाटे, भुरगे वाचपघरांत चुकूनच वतात. ग्रंथपालां कडल्यान म्हायती घेतल्यार कळटलें.
विचारांची मशागत करतलो जाल्यार वाचन जायच. डिजीटल वाचन ही फुडाराची तयारी. पुस्तक हें गिन्यानाचें दार उक्तें करता. ई – लायब्ररीचीं दारां तर 24 वरां उक्ती आसतात. मनशाचें व्यक्तीमत्व घडोवपाक पानां वयलीं उतरांय योगदान दितात. खरें म्हणल्यार, सायबर मळार साबार ई- लायब्ररी आसात. सरकाराचीं इलेक्ट्राॅनिक वाचपघरां मुफत आसतलीं? ई- लायब्ररीचो वापर करपी विद्यार्थी संवसारांतल्या खंयच्या कोनशांतल्या गिन्याना कडेन स्वताक जोडून घेवं शकता. कांय म्हाविद्यालयांनी पुस्तकांच्यो पीडीएफ फायली आशिल्लयो लायब्ररी सुरू केल्यात. https://librivox.org सारकी आॅडियो पुस्तकांची एकूच न्हय, तर कितल्योश्योच वेबसायटी, अॅप आसात. मात, हे गिन्यानाचे पोंयें विशीं जागृताय तशी उणीच जाल्या. गांवगिऱ्या भुरग्यांक ई- लायब्ररी वरवीं हक्काची माची मेळटली. शिक्षणीक पुस्तकां वांगडां, संशोधनाचीं, साहित्याचीं, विज्ञानाचीं पुस्तकांय तातूंत आसल्यार बरीं. शिक्षणीक पांवडो वयर व्हरपाकूच न्हय, तर वाचन संस्कृताय वाडोवपाक, रोजगाराच्यो संदी सोदपाक, ह्या नव्या वाचपघरांचो फायदो जावंचो.
वाचपघरांच्या उपक्रमाची मुळावी गरज म्हणल्यार नवे वाचक. राज्यांतल्या दरेका वाचपघराक दर वर्सा 100 तरी नवे वाचक जोडपाक जाय. ते सातत्यान वाचपी आसचे. वाचक वाडचे, हे खातीर राज्य सरकारान खाशेले उपक्रम हातांत घेवचे. शिक्षण खात्याचे मजतीन सगल्या शाळांतल्या भुरग्यांक (खास करून लोअर केजी ते पांचवी यत्ते मेरेनच्या) म्हयन्याक एक पुस्तक मुफत दिवंचें. उपरांतच्या वर्गांकूय विद्यार्थ्यांचे पिराये प्रमाण, तांकां पचतलें अशा साहित्याचीं पुस्तकां दिवचीं. ताचे तांकां परिक्षेंत पांच वा 10 गूण दिवचे. निदान गूण मेळटात म्हूण हजारांनी भुरगीं पुस्तकां वाचपाक लागतलीं. तातूंतलीं 10 टक्के पसून खांपे वाचक आनी थोडीं लेखक जाल्यार भाशे वांगडा सगल्याकूच फायदोच जातलो. दिसाळीं वाचपाची गोडी पांचवे यत्तेंत पावता तेन्नाच लागपाक जाय. यत्न केल्यार हेंवूय कठीण न्हय.
ई- लायब्ररींत कितें आसचें? घालता तितलें उणेंच पडचें. शाळा आनी म्हाविद्यालयीन अभ्यासक्रमाचीं पुस्तकां, नीट, जेईई, युपीएससी, जीपीएससी, बँकिंग असल्या परिक्षांचीं मार्गदर्शक पुस्तकां, ई- जर्नल्स, संशोधन, करियर मार्गदर्शन पुस्तकां, व्हिडियो लॅक्चर, वेबिनार आसचे. साहित्याच्या मळाचेर गाजिल्लीं पुस्तकां आसचीं. आॅनलायन माॅक टेस्ट सुविधा आसल्यार बरी. हायस्पीड इंटरनेट सेवा आनी संगणक अत्याधुनिक आसचे. ई- लायब्ररींक लागून विद्यार्थ्यांचो वेळ आनी पयसो वाटावतलो, म्हारग पुस्तकां फुकट वाचपाक मेळटलीं, मोबायल फोनाचेर ई लायब्ररी आसल्यार पुस्तकां खंयूय, केन्नाय वाचूंक मेळटलीं. डेटा मात सतत अपडेट जावंक जाय. तंत्रज्ञान हाताळिल्ल्यान विद्यार्थी डिजीटल साक्षर जातले.
ई- लायब्ररी ही संपूर्ण ज्ञानकेंद्र जावचें. योग्य वापर, नियोजन आसल्यार गोंयच्या विद्यार्थ्यांक आयएएस, आयपीएस आनी हेर करियरांचे तयारे खातीर ह्या ई- लायब्ररींचो फायदोच जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
