भांगरभूंय | प्रतिनिधी
कोवीड, ओमिक्राॅनान सरभोंवतणी, मनशाचे जीणेंतय बदल हाडल्यात. एक सोडलो की दुसरो विखाळ जीव व्याधी पातळायता. एके वटेन वखदां खपोवपा खातीर दुयेंसांची भिरांत घालतात अशेय धीटायेन आरोप करपी, अभ्यास करून विशयाची मांडावळ करपी कार्यकर्तेय आसात. कोविडान मनशाच्या चलपा, भोंवपाचेर नियंत्रणां हाडलीं तरी चलप, भोंवप साप्प थांबलां व्हय? थांबिल्लें जाल्यार हो संवसार फुडें वचपाचो?
संवसारात, मनीसजीणेंत बदल जातात, ते प्रमाण नित्याचे सरकारी प्रक्रियेंतय बदलांक स्थान मेळप गरजेचें. मुखेल करून शिक्षणीक मळार फुडारा कडेन पळोवपाची, संकश्टां कडेन झुजपाची तांक दिवपी मनीसबळाची निर्मणी करपी शिक्षणा कडेन केंद्रस्थ जावप सरकाराची मोख आसची. कोवीडान इबाडिल्लें शिक्षणाचें वेळापत्रक दोन वर्सा उपरांत आतांच जाग्यार येता आसतनाच गोंयां सारक्या राज्यांत कांय विशयांचेर विरोधा खातीर विरोधय जाता. विरोधा खातीर विरोध करप तशें गोंयांक नवें न्हयच, विरोधाचेर जैत मेळयत कोंकण रेल्वे राज्यांत आयली, राजभास कायदोय जालो. मोनोरेल, स्काय बस मेट्रो हुमकळ्ळी. कोंकणींत व्हडा प्रमाणांत पुस्तकां, व्याकरण, कोश नात, अशें आयजय हिणसावपी आसले तरी दोन ज्ञानपीठां कोंकणी साहित्यिकांनी हाडलीं, हें विसरूंक येत व्हय?
शिक्षणीक मळार गोंयांत आयआयटीचें तेंच जालां, काणकोण सावन सांगे, मेळावली करीत आयआयटी परतुन सांग्यार व्हरपाची भास सुरू जाल्या. फाटलीं कितलीशींच वर्सां तिका सदांकाळाचें घर दिवपाक निर्णय जाले, जमीन मेजपा मेरेन पावतकीच आडमेळीं येतात, विरोधय जाता. इफ्फीक अजून आपलेशें म्हणपा सारकें घर मेळूंक ना, पूण इफ्फी तिगला. एकदां गोंयांत आयिल्ली आयआयटी गोंयांतल्यान भायर वचूंक ना, व्हड लाव मेळनासतना तिका गोंयकारांनी भायर धांवडावंक ना हें म्हत्वाचें.
आयआयटी सारकी शिक्षण संस्था गोंयांत हाडपी आदले मुख्यमंत्री मनोहर पर्रीकार फुडाराचो विचार करपीच न्हय तर ध्येयवादीय आसले. ताणीं आयआयटीक खाशेलें घर नासतना फर्मागुडी अभियांत्रिकी म्हाविद्यालयांत जागो दिलो, उक्तावणय केलें. आयआयटीचो कॅम्पस मेळावली, सांग्यार, धारबांदोड्यां, काणकोणां उबारपा खातीरचें भासाभासेंत धा- बारां वर्सां गेलीं. मांडवी, कुशावती, म्हादयतल्यान खूब उदक व्हांवनय गेलें, पूण आयआयटीचो कॅम्पस जावन जायना, अशी गोंयची परिस्थिती जाल्या. मजगतीं, शिक्षणीक मळार जाल्ल्या बदलांचे वेध घेतल्यार आनी नव्या शिक्षण धोरणाचो अभ्यास केल्यार गोंय सरकाराक आयआयआयटीट (इंडियन इन्स्टीट्युट आॅफ इन्फोर्मेश टेक्नोलाॅजी) न्हय जाल्यार जिणेविज्ञान, भाषा विज्ञान, नासा सायन्स, ब्रह्मांड विज्ञान, अर्थकारण, कला आनी कुशळटाय विज्ञानांत जाल्ली क्रांती दिसतली.
आयआयटी कॅम्पस बांदून जाता म्हणसर आयआयटीच पोरणी जाल्या, अशें विद्यार्थ्यांक दिसल्यार अजाप न्हय. तंत्रगिन्यान इतलें नेटान बदलता तें पळेल्यार 2024 ची लोकसभेची वेंचणूक सगल्या राज्यांनी एकाच दिसाक जातली, अशेंय दिसता. वेंचणूक वा राजकी शास्त्र ( विज्ञान) हो विषय प्रधानमंत्री नरेंद्र मोदीजींक भावता. राजकी शास्त्र हो तांच्या उच्च शिक्षणातलो मुखेल विषय. त्याच बळग्याचेर ते प्रधानमंत्री पदा मेरेन पावल्या आसुये.
लोकसभा वेंचणुकेचीं गणितां मांडपाक प्रदेश भाजपाचें शिबीर सुरू आसतनाच मुख्यमंत्र्यांनी हेर कार्यावळींकय हजेरी तशीच लायली? तांणी चड लक्ष शिक्षणीक मळा कडेन दिल्यार मुळाव्या शाळांच्या विलीनीकरणाचो विशय गरजे भायर कोण तापयता तें होल्मतलें. गणीत मांडप सोपें, पूण उत्तर अचूक मेळपाक बे एके बे, बे दुणे चार म्हणचेंच पडटले. कमी विद्यार्थी आशिल्ल्यो शाळा एकठांय हाडुया, अशें मुख्यमंत्र्यांनी सांगलें, पूण एकूच विद्यार्थी, एकूच शिक्षक आनी सोबीत शाळेची बिल्डिंग आसल्यार कितें करतलें तें सांगलें ना. विलीनीकरण हें उतर वापरल्यारच तकली उसळपी गोंयकार आसतलेच. विलीनीकरणाच्यो, आणीबाणीच्यो यादी तशो पुस्तकांनी आसाच, तातूंत सुदारप शिक्षण संचालनालय करता आसतलेंच, पूण तें करतना मूळ शेणचें ना हाची जतनाय घेवची. विद्यालय, उच्च शिक्षण वा तंत्रिक शिक्षण मळावेले शिक्षण संचालक बदलतकच फाटल्या निर्णयांच्या अभ्यासांतल्यान नव्यो घोषणा करतना मुख्यमंत्र्यांनी सगल्यांक विश्वासांत घेवचें. जे तांचे फाटल्यान रावल्यात तातूंत कार्यकर्ते, फुडाऱ्यां भितर शिक्षक (निवृत्तय आसत) आसतलेच आनी तांकां सांबाळून घेतना मुख्यमंत्री खासावीसय जावप शक्य आसा. शिक्षणीक मळाचें मात्शें तशेंच जालां, समेस्तांक सांबाळटना शिक्षण खात्याक सरकार सवती वागणूक दिता, अशें कांय शिक्षकां कडेन उलयतना कळ्ळें. मुळाव्या शिक्षणांत सरकारी शाळांनी तशो व्हडल्यो अडचणी नात, शिक्षकांच्यो मागण्योय मान्य जातात पूण अनुदानित शाळांचें, शिक्षकांचे कितें?
नवी शिक्षण निती वा धोरण आपणावपाक निवृत्तीचे वाटेर आशिल्ल्या शिक्षकांक वाज येतलो. शिबीरां, कार्यशाळा तांकांय जाय पूण निवृत्तीचे उपरांत सरकार आमकां खांची कोनशांनी स्थान दित व्हय? आमची याद दवरत व्हय? अशें तांकां दिसतलेंच. भुरग्यांचे उंचेलें शिक्षण, शिर्व्हिस, लग्नाचें चिंतप आसताच. शिक्षण म्हारग जाता, उंचेल्या शिक्षणाची फी, ट्युशन क्लासेसची फी चें वजें तकलीं भिणभिणावपी.
बदल्यो, बडत्यो, शिक्षणीक पुरस्कार हातूंतल्यान एकामेकां भितर दुस्वास वाडटा, राजकारणय भितर सरता आनी तें सगलें करतना शिक्षणाच्या मळार वायट घडणुकोय जातात. गोंयचें शिक्षणीक मळ तशें अजूनय तितलें म्हेळें जाल्लें ना आनी तें जावचें न्हय हाचे खातीर विंगड विंगड पावंड्यावेले शिक्षण संचालक शिक्षणानच न्हय जाल्यार विचारांनी परीपक्व आसपाक जाय. नवे आदल्यांचो आदर करपी आसचे, तांचे मदीं तंटे ताण तणाव, राजकारण नासचें.
नवें शिक्षण धोरण विद्यार्थ्यांकच न्हय जाल्यार शिक्षकांय नितीशास्त्राचे धडे दिवपी आसा. शिक्षकांनी शिकोवपाची पद्धत बदलप, सकारात्मकता हाडप आनी भुरग्यांक फकत शिक्षणानच न्हय जाल्यार जिणेत जैतवंत जावपाक गुरुजींनी मार्गदर्शक जावप, हें शास्त्र नव्या धोरणातल्यान शिकचेंच पडटलें. भाषाशास्त्र हो तातूंतलोच एक विषय, तें कळ्ळ्यार शिक्षक, विद्यार्थी एकवटीत जावचे, कुडीन आनी मनान. नव्या शिक्षण धोरणांत विज्ञान, तंत्रगिन्यांना इतलेंच भाषाशास्त्राक म्हत्व आशिल्ल्यान राजभासेक बरे दीस येतले, अशी आस्त आसा. त्या शास्त्रांतल्यान आयआयटी, आयआयआयटींत, बिटस, आयआयएम शिक्षणात राजभास पावतली, ती सुंदर न्हय जाल्यार गिन्यानाचो दिवो जावपी, गोंयांक स्वयंसिद्ध करपी आसची. शंभर वर्सां आदीं गोंय हें उद्यमी राज्य आशिल्लें, शेतकामांतल्यान तें मुखार सरूंक येता, आयआयटी वा आयआयआयटीक भूंय दितना तेंच सरकारान मतींत दवरचें.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
