भांगरभूंय | प्रतिनिधी
मोबायल फोनाच्या नंबरा सयत ती तांकां कशी मेळटा, हे सांखळेंत कोण- कोण आसात, हो संशोधनाचो विशय.
यशवंत सिनेमांतलो नाना पाटेकराचो एक डायलाॅग बरोच गाजिल्लो- एक मच्छर आदमी को XXX बना देता है! आयज सायबर मळाचेर चल्लां तें पळयल्यार- एक क्लीक आदमी को कंगाल बना देता है- अशेंच म्हणचें पडटलें. एक क्लीक आनी सगलें सोंपलें. आॅनलायन सुविधा फायद्याची, पूण थंय विस्वासा परस सादुरताय म्हत्वाची. हांवरेपण, ताकतीक आनी क्लीक, हीं सायबर गुन्यांवकारांची तीन शस्त्रां. तेन्ना मावस क्लीक करचे पयलीं मेंदवांत क्लीक जावंक जाय. खास करून पयशे वगडावपाच्या विचारान. गोंयांत सायबर तोपयेकारांनी कांय जाणांक 50 लाखां वयर रुपयांक फटयिल्ल्याचें फाटल्या सप्तकभरांत उक्तडार आयलां. हाचे पयलींय कोटी फारायिल्ले. तुमच्या घरच्यांक पसून तुमची म्हायती नासतली, ताचे परस चड सायबर गुन्यांवकारांक आसता. मोबायल फोनाच्या नंबरा सयत ती तांकां कशी मेळटा, हे सांखळेंत कोण- कोण आसात, हो संशोधनाचो विशय. फक्त सादूर रावप, इतलेंच आमी करपाक शकतात!
सोयरीक जुळोवपाच्या निमतान गिफ्ट धाडून 1.39 लाखांक फटोवप, ट्रकाचें भाडें म्हूण 2.80 लाखांक तोपी घालप, आरटीओच्या कामा खातीर एपीके फायल डावनलोड करपाक सांगून 4.14 लाख लुटप, नोकरेचे हांयस दाखोवन 2.10 लाखांक चुनो लावप, प्रदुशण नियंत्रण अधिकारी जावन पांच जाणांचीं बोल्सां 29 लाखांक कापप हीं गोंयचीं कांय प्रकरणां. हांवरटपण, भंय, आबूजपण, गोंदळाक लागून ताका लोक बळी पडल्यात. जे लींक येतात, ते खरें नांव, लोगो, लेटरहेडा कडेन जुळपी आसतात, म्हणटकच शिटूक मनशाचोय विस्वास बसता. मागीर आशिल्लें, नाशिल्लें वगडावप. चडशे गुन्यांवकार हिंदी उलयतात, अशें म्हणटात. पूण हें सत्य न्हय. गुन्यांवकारी प्रवृत्तीचो खंयचोय मनीस हीं कामां करपाक शकता.
मुळांत मोबायल फोन नंबर मेळत थंय जोडूंक जायना. हें सरकाराचें काम. अर्थीक वेव्हार करता, त्या खात्यांत चड पयशे दवरप ना. बँकांनीय आपल्या गिरायकांक सांबाळपाक जाय. सायबर ठकसेन ताकतीक करता, आतांच पयशे भर म्हणटा. ती शिटकावणी समजून सादूर जावचें. शक्य तो मायभाशेंत उलोवचें. बँकेंतल्यान उलयता म्हणीत जाल्यार बँकेक फोन करून खात्री करची. भारतांतली खंयचीच बँक, सरकारी संस्था ओटीपी, पीन नंबर फोनाचेर मागीना. पेटीएम सारके प्लॅटफाॅर्म स्वता ओटीपी धाडटात, पूण तांचें अधिकृत अॅप वापरतात तेन्नाच. तालांव, एटीएम कार्ड हांचे लींक येत जाल्यार चवकशी करप बरें. भरपूर व्याजाचें आस्वासन दिवपी 99 टक्के फटींग आसतात. कांय दानी मनीस सोडल्यार जगांत कोणूच स्वताचें लुकसाण करून घेना. सवलत, फुकट, सवाय दिना, हें विसरचें न्हय. फायल डावनलोड करतना विचार करचो. तो व्हाॅट्सअॅप नंबर बँक खात्याक जोडिल्लो ना मूं, हाची खात्री करची. पुलीस, सीबीआय, कस्टम्स फोन करून हें दी, तें दी सांगिनात. तसो फोन आयल्यार कोंकणी उलोवपाक सुरवात करची, पुलिसांक कळोवचें. बँकेचे लींक येतात, तातूंत एक अक्षर चुकिल्लें आसल्यार सावधान! व्यक्तीगत, बँकेची म्हायती मागल्यार दिवची न्हय. रोख वेव्हार नाका, आॅनलायन करुया, अशें चडशे गुन्यांवकार सांगतात.
देशभरांत फाटल्या स वर्सांत 52,976 कोटीं परस चड रुपया लोकांनी आॅनलायन वगडायल्यात. म्हणल्यार वर्साक 10 हजार कोटी. हो पयसो भारतांतूच आसा काय भायर गेला, तें कळपाक मार्ग ना. रोखडीच कागाळ जाल्यार खातें फ्रीज करतात. 25 हजारां मेरेन फटवणूक जाल्यार पयशे मेळटात. पूण ते खातीर अटी, कटकटी!! सायबर फटवणूक जातकच 190 नंबर घुंवडावन कागाळ करपाक जाय, मागीर फुडलें राम भरोसे! ताचे परस ‘एक क्लीक’ हें सदांच मतींत दवरल्यार फायदो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
