जमीन रुपांतरणाचेर निर्बंध हाडपाक खास विधेयक

भांगरभूंय | प्रतिनिधी

फेर्दीन रिबेलो : मुख्यमंत्र्यांसयत सगळ्या राजकी पक्षांक सादर करतले मसुदो

भांगरभूंय । प्रतिनिधी

पणजी : गोंयच्यो जमनी वाटावपा खातीर जमनीची विक्री तशेंच रूपांतरणाचेर निर्बंध हाडपी खासा विधेयकाचो मसुदो आदले न्यायाधीश फेर्दीन रिबेलो हांणी तयार केला. हो मसुदो मुख्यमंत्री डॉ. प्रमोद सावंत हांचे सयत सगल्या राजकी पक्षांक धाडटले. येता त्या अधिवेशनांत हें विधेयक मांडचे, अशी मागणी सगल्या राजकी पक्षांक करतले, अशी म्हायती आदले न्यायाधीश फेर्दीन रिबेलो हांणी दिली.

आदवोगाद तशेंच तज्ञां वरवीं सध्या मसुद्याचो अभ्यास सुरू आसा. हांवें मसुदो तयार केला. बदल करून मसुदो निश्चीत जाले उपरांत ताची प्रत मुख्यमंत्री डॉ. प्रमोद सावंत तशेंच राजकी पक्षांच्या मुखेल्यांक धाडटले. लोकचळवळ सभेंत ज्यो मागण्यो मान्य जाल्यात ताचेर आदारीत मसुदो आसा, अशें फेर्दीन रिबेलो हांणी सांगलें.

गोंय वाटावपा खातीर नगरनियोजन कायद्याचें कलम 17(2) आनी 39 (ए) सरकारान रद्द करचें. तशेंच जमीन विक्रीचेर निर्बंध हाडपा खातीर भूंय महसूल संहितेंत (एलआरसी) दुरुस्तीचे तजविजेचेर हो मसुदो आसतलो. एका म्हयन्या पयलीं 6 जानेवारीक पणजे मिनेझिस ब्रागांझा सभाघरांत लोकचळवळ सभा जाल्ली. आदले न्यायाधीश फेर्दीन रिबेलो हांच्या फुडारपणा खाला ही सभा जाल्ली. हे सभेक उपाट प्रतिसाद मेळिल्लो.

जमीन विक्री बंद जावपा सयत पर्यावरण, शेतां तशेंच दायज आनी संस्कृतीची जतनाय जावपाची मागणी उलोप्यांनी सभेंत केल्ली.

दोंगरा वयलीं बांदकामां आनी दोंगर कांपप बेगोबेग बंद जावपा खातीर कायद्यांत दुरुस्ती करची आनी गरजेची ती नेमावळ तयार करची. प्रादेशीक आराखडो आनी बाह्य उदरगत आराखडो (ओडीपी) अस्तित्वांत आसा तो मेरेन प्रादेशीक आराखड्यांनी बाह्य उदरगत आराखड्या प्रमाण बांदकामां करचीं. झोन बदलप, जमनीचो वापर बदलप वा एफएआर वाडोवपा खातीर शार आनी नगरनियोजन कायद्यांत केल्ल्यो 16- बी, 17 (2) वा 39 (ए) सारक्यो दुरुस्त्यो रद्द करच्यो. जमीन महसूल संहिता हातूंत दुरुस्ती करून शेत रोय नाशिल्ल्यांक वा गोंयांक रावनात तांकां जमीन विकपाचेर बंदी हाडची. जे मेरेन हे कायदे जायनात ते मेरेन हे दुरुस्ती खाला दिल्ले सगळे परवाने रद्द करचे. तशेंच सुरू जावंक नाशिल्लीं बांदकामां वा अर्दवट आशिल्लीं बांदकामां बेगोबेग रद्द करची. पियेवपाच्या उदकाची वेवस्था जायना ते मेरेन खंयच्याच वाठारांत व्हड इमारत वा घरनिर्माण प्रकल्पाक मान्यताय दिवची न्हय. गोंय शेती आनी कूळ कायदो 1964 खाला फाटल्या पांच वर्सांनी मामलेदारा मुखार न्हयकारी प्रतिज्ञापत्रां दिल्यांत तांची नव्यान तपासणी जावची. मुळावीं कागदपत्रां लिपोवन दवरून हीं न्हयकारी प्रतिज्ञापत्रां दिवपाक वांटेकार आशिल्ल्या सगल्या व्यक्तींचेर कायदेशीर खटले घालचे. कागदपत्रां लिपोवन दवरून वा फटींगपणां करून हीं प्रतिज्ञापत्रां दिल्यांत काय कितें ताचो नियाळ घेवपाचे अधिकार मामलेदाराक दिवपा खातीर कायद्यांत दुरुस्ती करची. सीआरझॅड वाठारांत येतात तीं सगलीं बेकायदेशीर बांदकामां बेगोबेग सील करचीं, तांचे परवाने रद्द करचे आनी सोपस्कार पुराय करून हीं बांदकामां मोडून उडोवचीं. अर्जदार, बांदकामां करपी, बिल्डर अशा सगळ्यांक मजत करपा खातीर चुकीचे वा फटीचे आदेश दिवपांत घुस्पल्ल्या अधिकाऱ्यांचेर कारवाय करपाची मागणी जाल्ली. ह्या मागण्यांचो आस्पाव विधेयकाच्या मसुद्यांत आसा.

आदल्या सरन्यायाधीशांचो तेंको

फेर्दीन रिबेलो हांच्या मागण्यांक आदले सरन्यायाधीश भूषण गवई तशेंच न्यायमूर्ती अभय ओक हांणी तेंको दिला. निवेदनांतल्यो मागण्यो ह्यो फक्त मागण्यो न्हय जाल्यार घटनात्मक तजविजेची राखण करपाचो उलो आसा, अशें सरन्यायाधीश बी. आर. गवई हांणी म्हणलां. रानां, पर्यावरण, न्हंयो वाटावप हे घटनेच्या कलम 51 ए (जी) खाला लोकांची लागणूक आसा. सरकाराची लेगीत ही एक लागणूक आसा. गोंयाक सोमीक सोबितकाय आनी दायज लाबलां. हाची जतनाय करपाची जापसालदारकी सरकाराचेर आसा. पर्यावरण नश्ट करून जाता ती खरी उदरगत म्हणपाक जायना. हाका लागून पर्यावरण वाटावपाचे चळवळीक म्हजो तेंको, अशें पत्र सर्वोच्च न्यायालयाचे आदले न्यायमूर्ती अभय ओक हांणी बरयलां.

गोंय वाटावपा खातीर रस्त्यार देंवतले : अल्वारीस

गोंय वाटावपा खातीर मागण्यांचें निवेदन सादर केलां. गोंय वाटावपा खातीर पर्यावरण, दोंगर, न्हंयो, जमीन हांचें संवर्धन जावपाक जाय. सरकारान निवेदनाचेर कसलीच कार्यवाही केली ना, जाल्यार रस्त्यार देंवून आंदोलन करपा बगर पर्याय उरचो ना, अशें क्लॉड अल्वारीस हांणी म्हणलां.