भांगरभूंय | प्रतिनिधी
मानादिक डाॅ. प्रमोद सावंत
मुख्यमंत्री, गोंय
शिरगांवचे लयराई देवीचे जात्रेक जाल्ले घडणुके वेळार प्रशासन फांतोडेर क्रियाशिल जालें. अर्थ एकूच प्रशासनात कुशळताय आसा हाची जाणवीकाय तुमकां आसा. चोवीस वरां भितर जिल्लोधिकारी, पुलीस अधिकाऱ्यांच्यो बदल्योय जाल्यो. नेमावळ खबर आशिल्ल्यान तुमी वेगीं निर्णय घेतले. लाखांनी भक्त, नागरीक गोंयच्या कांय जात्रा, फेस्तांक येतात. कांय देवळांच्यो समिती आप वावुरप्यांचे मजतीन, थळाव्या पुलीस ठाण्याचे मजतीन जात्रा, फेस्तांनी खेटाखेट जावची न्हय म्हणून जतनाय घेतात. देवस्थान, महाजनी कायद्यांत सुदारप करपाची गरज आसा. लाखांची दाटी जावपाचो अदमास आसता तेन्ना ते सुवातींनी जिल्लोधिकारी, अतिरीक्त जिल्लोधिकारी आसपाक जाय. तांकां राजभास कोंकणीचें गिन्यान आसप म्हत्वाचें. कोर्न्या वेल्यान खेटाखेट जावची न्हय, शिस्त पाळची, रांकेन रावात हे खातीर सुचोवण्यो दिवपाची तजवीक लाखांचे गर्दे वेळार जाय. आयज मोबायलावेल्यान सादूर रावपाचे रकाद पावोवप शक्य आसा.
तिरुपती, सिद्धीविनायक, शिर्डी मंदिरांत सदांच भावीकांचो जमो आसता. खेटाखेट जावची न्हय म्हणून स्टील बॅरिकेडिंग, सुचोवण्यांचे तकटेय आसात. उत्सवा वेळार देवळांतल्यान भायर, भितर सरतना रांको आसच्यो. कांय इगर्जी, देवळांनी रांकेची, वस्त्रां वापरपाची शिस्त आसा. लयराईचे जात्रेक राज्योत्सव पावंडो दिवपाचें सरकारान जाहीर केलां, ताका न्हयकारुय मेळ्ळा. अंदुंची खेटाखेट पळेल्यार जिल्लो प्रशासन, पुलिसांक, समितीक वांगडा घेवन लयराई जात्रेच्या राज्योत्सवाची तयारी करची पडटली.
देवळांची येणावळ जात्रा उत्सवां वेळार व्हडा प्रमाणात आसता हें सत. लयराई, कुंकळ्ळे, फातर्पेवरी मुखेल जात्रा, उत्सव, फेस्तांक राज्योत्सवाच्या पावंड्यार हाडून शिस्ती पासत नेमावळ करपाक जाय. आदवोगाद, रिटायर्ड न्यायाधीश, दोतोर, उद्येजकांची समिती घडोवन थळाव्यांक विश्वासांत घेवन शिस्ती पासत उपाय, येवजणो फेस्तां, जात्रां पासत जावच्यो.
कोयते, कायली, खोरीं विकप्यांक जात्रा, फेस्ता, उत्सवांनी बंदी घालची. च्या, फळाराचीं दुकांना देवळाचे सुवातीर सावन मात्शी पयस आसचीं. म्हज्या भुरगेपणातले लयराई देऊळ ल्हान, आयज तें लाखांनी भक्त भाविकांक आसपावन घेवपा इतलें व्हड जालां. ते नदरेन विचार करुन गरजेच्यो साधनसुविधा उबारपाक जिल्लो खण निधीचो उपेग करचो, भोंवतणी झाडां लावचीं.
आनीक एक गजाल भावीक, नागरीकांक याद करुन दिवची पडटली ती हवामानशास्त्र, काळा वेळाची. फांतोडे न्हिदसुऱ्या दोळ्यांनी एकठांय जाल्ले रातभर खंय आशिल्ले? भायले आयिल्ले? व्हड माटोव देवळा भायर घाल्लो? धोंडांचो आंकडो वाडटा, तांची भलायकी केल्ल्या उपासान इबाडटा? गोडेंमूत, काळजाचे तशेंच हेर दुयेंसां जाल्ल्यांक जाण्ट्यांक, ज्येश्ठांक उबाळाच्या दिसांनीच न्हय खंयच्याय उत्सव, जात्रांच्या दिसांनी उपास करप बरें न्हय तें सांगचें पडटलें.
पुलीस कंट्रोल रुम जात्रेंत आसपाक जाय. जिल्लोधिकारी जात्रे वेळार आशिल्ले जाल्यार पुलीस दांडे घेवन भक्तांक कशे धुकलपाचे? जात्रा, फेस्तां वेळार सोरो, तंबाखू खावपीय आसतात, तांकांय शिटकावणी दिवची पडटली. देवळां, इगर्जे कडलीं सोरो, तंबाखू विकपी दुकानां बंद करात. नेमावळीक पाळो दिल्यार गोंयच्या पर्यटनांत जात्रा, फेस्तांतल्यान जो एकवट दिसता तो तिगून उरतलो. पातोळ्यांचें फेस्त, तवशाचें फेस्त, रेयांचें फेस्त, कणसांचें, पेजेचें फेस्त शिस्तीन जाता. मंगेश, शांतादुर्गा, सांतेर, मोरजाईचे जात्रे वांगडाच पेडणेचो दसरो, बोडगेश्वराची जात्रा गर्देक आपोवणे. लयराई देवीचे जात्रे वेळार जाल्ली खेटाखेट फुडारांत जावची न्हय म्हणून जतनाय घेवपाक नेमावळ बेगीन करची.
आनीक एक गजाल सांगचीशी दिसता इत्साशक्त आसल्यार तुमी वेगीं निर्णय घेवंक शकतात हें दिसलें. मागीर मंत्रीमंडळांत बदल करपाक कळाव कित्याक?
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
