भांगरभूंय | प्रतिनिधी
केंद्राचो निर्णय; आतां मेरेन दिल्या चार खेपे मुजतवाड
भांगरभूंय I प्रतिनिधी
पणजी : ‘म्हादय उदक तंटा लवाद’ हाका फुडलो अहवाल दिवपाक केंद्र सरकारान परतून एका वर्साची मुजतवाड दिल्या. 20 ऑगस्ट 2022 पसून लवादाक ही मुजतवाड मेळटली. म्हादय न्हंये विशीं गोंय, कर्नाटक आनी महाराष्ट्र ह्या तीन राज्यांनी सुरू आशिल्ल्या वादाचेर उपाय काडपाक केंद्र सरकारान 2010त ‘उदक तंटा लवाद’ स्थापन केल्लो. ते उपरांत वट्ट आठ वर्सांत जायत्यो सुनावण्यो जाले उपरांत ‘म्हादय उदक तंटा लवाद’ हांणी ऑगस्ट 2018त निमाणो निवाडो दिवन, गोंयाक 24 टीएमसी, कर्नाटकाक 13.42 टीएमसी आनी महाराष्ट्राक 1.13 टीएमसी उदक वापरपाचो आदेश दिल्लो. कर्नाटकान लवादा कडेन 36.58 टीएमसी उदकाची मागणी केल्ली.
पूण लवादा कडल्यात तितलें उदक मेळूंक नाशिल्ल्यान लवादाच्या निमाण्या निवाड्याक हरकत घेवन कर्नाटकान सर्वोच्च न्यायालयांत धांव घेतिल्ली. कर्नाटका उपरांत गोंय आनी महाराष्ट्रानूय सर्वोच्च न्यायालयांत धांव घेतली. ताका लागून सर्वोच्च न्यायालयांत परतून एकदा हे विशीं सुनावण्यो सुरू जाल्यात.
मजगतीं, निवाडो निवाडो सादर केले उपरांत केंद्र सरकाराक आनीक कांय अहवाल दिवपाची तयारी ‘उदक तंटा लवाद’ हांणी 2018 त केल्ली. ते खातीर लवादान 20 ऑगस्ट 2019 मेरेनची मुजतवाड मागिल्ली. लवादाच्या मागणे प्रमाण केंद्र सरकारान त्या वेळार पयलीं लवादाक एका वर्साची मुजतवाड दिल्ली. ते उपरांत ऑगस्ट 2019 ते ऑगस्ट 2020, ऑगस्ट 2020 ते ऑगस्ट 2021 आनी ऑगस्ट 2021 ते ऑगस्ट 2022 अशी तीन खेपे लवादाक मुजतवाड दिली. आतांय केंद्र सरकारान लवादाक आनीक एका वर्साची मुजतवाड
दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
