भांगरभूंय | प्रतिनिधी
आयज संवसारीक वसुंधरा दीस. ते निमतान विशेश…
आयज 22 एप्रील… आयज संवसारीक वसुंधरा दीस….जेन्ना धर्तरी आवय आमकां संवर्धनाचो संदेश धाडटा… आयज आख्खो संवसार 55 वे खेपे ‘आमची शक्त, आमचो ग्रह’ ह्या विशयान वसुंधरा संवर्धन मनयता. आमी सैमाची साथ सोडून पयस वतात तितली आमची ताचे कडली नाळ तुट्टा आनी सैम कोपिश्ट जाता. मागीर आमचेर तरेकवार आसमानी संकश्टां येतात. हाचेर मनशान आयज तरी शांत तकलेन विचार करुंक फावो.
धर्तरी आवय स्पश्टपणान कृती करपाचो उलो आमकां मारता. सैम अत्याचार सोंसता. प्लास्टीक भरून ओतपी आनी चड अम्लीय (अॅसिडीक) जावपी दर्या. सोंसूंक नजो अशी उश्णताय, रानवटी उजो आनी हुंवार… अशा अरिश्टांनी लाखांनी लोकांचेर परिणाम जाला.
गती वाडूंक शकता
हवामानांतले बदल, सैमाचो मनशान केल्लो सांवार वा केल्ले मनमानी बदल तशेंच जैवविविधतायेक आडमेळीं हाडपी गुन्यांव, जशे की रानां कापप, भूंय वापरांत बदल, शेती आनी पशुधन उत्पादन वाडप वा वाडत वचपी बेकायदेशीर रानवटी जनावरांचे वेपार, ह्या गिऱ्याचो नाश करपाची गती वाडोवंक शकतात. देखूनच आमची पर्यावरण यंत्रणा परतून जिवीत करपाची भोव गरज आसा. पर्यावरण यंत्रणा धर्तरे वयल्या सगल्या जिवांक आदार दिता. आमची पर्यावरण यंत्रणा जितली भलायकेन बरी आसतली, तितलीच धर्तरी आनी तिचे लोक भलायकेन बरे उतरले. आमच्या इबाडिल्ल्या पर्यावरण यंत्रणेची पुनर्स्थापना केल्यार गरिबी सोंपपाक, हवामान बदला आड झुंजपाक आनी सामुहीक विनाश आडावपाक मदत जातली. पूण सगल्यांनीच ह्या वावरांत वांटो घेतल्यारच आमकां येस मेळटलें. जायते फावटी सैम नाश करतात कोण आनी भोगतात बाबडे भलतेच अशेंय चित्र दिसता.
ह्या आंतरराष्ट्रीय आवय पृथ्वी दिसा आमी आमकांच उगडास करून दिवया- पयलीं परस चड – की आमकां लोकां पासत आनी धर्तरे पासत- दोघांय खातीर काम करपी चड टिकावू अर्थवेवस्थे कडेन वळपाची गरज आसा. सैमा कडेन आनी धर्तरे कडेन समरसताय वाडोवया. आमचो संवसार परतून निर्माण करपाखातीर जागतीक चळवळींत सामील जावंया!
बऱ्या फुडाराची गुंतवणूक
धर्तरेची राखण करप ही सगल्यांची जापसालदारकी. एकवटीत राष्ट्रांच्या पर्यावरण कार्यक्रमाच्या पाचवे क्रांतींत सामील जावन सैमा कडेन जोडात आनी आमच्या ह्या गिर्याची परतून रचणूक करपाक तुमच्या समाजाक बळिश्ट करात!
तुमकां खबर आसा?
दर वर्सा ह्या गिऱ्याचेर एक कोटी हेक्टर रानां ना नपयत जायत आसात – हो रानां बगर उध्वस्त जावपी वाठार आयसलँडा परस व्हड आसा. घटमूट आशिल्ली पर्यावरण यंत्रणा आमकां रोगां पासून राखण दिवपाक आदार करता. जैव विविधतायेक लागून रोगजंतू नेटान पातळप कठीण जाता. सैमा आडच्या बेबंद सांवाराक लागून आतां सुमार दशलक्ष प्राणी आनी वनस्पती जाती सांसणाच्यो नामशेष जावपाची भिरांत आसा, असो जाणकारांचो अदमास आसा.
ह्या दिसाचो उगडास करुंक एकवटीत राष्ट्रां आयज एक परस्पर संवाद सादता, “आयज आमच्या मनशाच्या बऱ्या पासत आनी धर्तरे गिऱ्याच्या सांबाळा पासत मदल्या विभागूं येना अश्या दुव्या विशीं हो संवाद. तुमी ताची आयज लायव्ह वितरणी पळोवंक शकतात- युएन वेब टीव्हीचेर (22 एप्रील, सकाळीं 10 ते सांजवेळा 6).
कांदळीय नश्ट
खारफुटी वा कांदळी हें अतिरेकी हवामानाक सैमीक आडखळ आसून तातूंत जैवविविधताय भरपूर आसा.आमी त्योय नश्ट करुंक लागल्यात. पर्यावरण यंत्रणेच्या पुनरुज्जीवनाचेर संयुक्त राश्ट्रांचें दशक चालू आशिल्ल्यान पर्यावरण संकश्टा मदीं आमचो सैमीक संवसार परतून जिवो करपाची एक व्हड संद आसा. एक दशक लांब दिसूं येता, पूण हवामान बदला आड झुजपाक आनी सुमारा भायर जातींचो नाश जावचो न्हय म्हूण फुडली धा वर्सां म्हत्वाचीं आसात अशें शास्त्रज्ञांनी भर दिवन म्हणलां.
हवामानांतल्या बदलाची बरी समज घेवप गरजेचें, कारण हवामान कृतींत आमची सगळ्यांची भुमिका आसा. 2015 वर्साच्या पॅरिस कराराची वचनबद्धताय पाळपा खातीर आमी एकठांय येवन वावुरपाक जाय.
सदांचो प्रश्न
आमी आंतरराष्ट्रीय दीस कित्याक मनयतात? आंतरराष्ट्रीय दीस आनी सप्तक हे लोकांक हुसक्याच्या प्रस्नांचेर शिक्षण दिवपाची, जागे करपाची, संवसारीक समस्या सोडोवपा खातीर राजकी इत्सा आनी साधनां एकठांय करपाची आनी मनीसपणाच्या कामगिरीची परब मनोवपाची आनी बळगें दिवपाची संद आसता. आंतरराश्ट्रीय दिसांचें अस्तित्व एकवटीत राश्ट्रांचे स्थापने पयलींचें आसलें, पूण संयुक्त राश्ट्रांनी तांकां एक बळिश्ट पुरस्कार साधन म्हणून आपणायला. आमीय तातूंत सामील जावंया.
–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
