भांगरभूंय | प्रतिनिधी
लायनमन, लायन हेल्पर हांचो आस्पाव; 2023 वर्सा पांच जाणांनी व्हगडायलो जीव
पणजी: फाटल्या आठ वर्सांत कामार आसतना विजेचो धक्को येवन लायनमन, सहाय्यक लायनमन आनी लायन हेल्पर अशा वट्ट 15 जाणांक मरण आयलां. तातूंतल्या आठ जाणांच्या कुटुंबांतले व्यक्तींक सरकारी नोकरेंत आस्पावन घेतलां. हेरां विशींची प्रक्रिया आशिल्ल्याची म्हायती वीज खात्याच्या गोपांनी दिली.
होंडा-सत्तरे ट्रान्सफॉर्मराचें काम करीत आसतना विजेचो धक्को लागून मोर्ले-सत्तरेचो चंद्र गांवकार ह्या लायनमनाक मंगळारा मरण आयलें. हे फाटभुंयेर फाटल्या आठ वर्सांतल्या अश्या घडणुकांचो नियाळ घेतलो तेन्ना, ह्या आठ वर्सांत लायनमन, सहाय्यक लायनमन आनी लायन हेल्पर अशा वट्ट 15 जाणांचो अश्या घडणुकांनी मरण आयिल्ल्याचें गोपांनी सांगलें.
2018 वर्सा देविदास वेळीप, 2019 वर्सा दिलीप गांवकार, 2020 वर्सा पुंडलीक जल्मी, समीर परब सगुण गांवस आनी सुभाष अमेरकार, 2022 वर्सा संजय गांवकार आनी बाबू गेळेकार, 2023 वर्सा उदय नायक, गजानन परोब, लाडू पेडणेंकार, लाडू आरोंदेकर आनी कृष्णा पोवार, 2024 वर्सा मनोज जांबावलीकार आनी 2025 वर्सा मंगळारा चंद्रू गांवकार हांचो अशे तरेचे घडणुकेंत मरण आयलें. हातूंत देविदास वेळीप, दिलीप गांवकार, पुंडलीक जल्मी, समीर परब, सगुण गांवस, सुभाष अमेरकार, संजय गांवकार आनी गजानन परोब हांच्या कुटुंबांतल्या एका व्यक्तीक सरकारान सरकारी नोकरेंत आस्पावन घेतलां. जाल्यार हेरांच्या अर्जां वेली प्रक्रिया सुरू आशिल्ल्याचें गोपांनी सांगलें.
आठ जाणांचे घरकान्नींक मेळ्ळी सरकारी नोकरी
चंद्र गांवकार सोडून फाटल्या आठ वर्सांत कामार आसतना जे लायनमन, सहाय्यक लायनमन आनी लायन हेल्पर हांकां मरण आयलां. तातूंतल्या बारा जाणांच्या घरकान्नींनी सरकारी नोकरे खातीर सरकारा कडेन अर्ज केल्लो. तातूंतल्या आठ जाणांचे घरकान्नींक सरकारान सरकारी नोकरी दिल्ल्याचें गोपांनी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
