7 विरोधी आमदार 2 दिसां खातीर निलंबीत

भांगरभूंय | प्रतिनिधी

मणीपूर चर्चेचो थाराव चर्चेक घेवंक ना म्हणून निशेद

पणजी : मणीपूर हिंसाचाराचेर चर्चा करपा विशींच्या थारावाक लागून विरोधी आमदारांनी निशेद केलो. उपरांत सभापतींनी 7 आमदारांक 2 दिसां खातीर निलंबीत केले. विरोधी पक्ष फुडारी युरी आलेमाव, विजय सरदेसाय, विरेश बोरकार, वेन्झी व्हिएगस, क्रुज सिल्वा, कार्लोस फेरेरा, एल्टन डिकोस्ता हांकां आयज, फाल्यां खातीर (सोमार, मंगळार) निलंबीत केल्यात.
प्रस्नोत्तरा उपरांत विरोधी आमदारांनी मणिपूर हिंसाचार चर्चे खातीर दाखल केल्ल्या थारावाचो प्रस्न हाजीर केलो. थाराव चर्चेक कित्याक घेवंक ना? असो प्रस्न युरी आलेमांव हांणी केलो. मणिपूर हिंसाचाराचो निशेद करपा खातीर विरोधी आमदार काळे कपडे घालून आयिल्ले. ते थाराव घेवपाचे मागणे खातीर सभापतींच्या आसना मुखार धांवले.
सभापतींचे सुचोवणे उपरांत जीत आरोलकार हांणी झिरो अवराचो मुद्दो वाचपाक सुरवात केली. ह्या वेळार विरोधी आमदार तांचे कडेन गेले. तांच्या हातांतले कागद तांणी काडलें. मार्शला वरवीं सभापतींनी विरोधी आमदारांक भायर काडले. सत्ताधारी आमदारांनी गैर वर्तणुके खातीर कारवायेची मागणी सभापतीं कडेन केली. सभापतींनी 7 आमदारांक दोन दिसां खातीर निलंबीत करपाचो निर्णय घेतलो.
विरोधी आमदारांचे सभाघरांतलें वर्तन अयोग्य आशिल्लें. 7 आमदारांक निलंबीत करपाचो निर्णय दुर्दैवी आसा, अशें सभापती रमेश तवडकार हांणी माध्यमां कडेन उलयतना सांगलें.