भांगरभूंय | प्रतिनिधी
गोंय खंडपिठाचो ‘त्या’ दोगां भुरग्यांक प्रवेश दिवपाचो निवाडो
पणजी : राज्य सरकारान अंदूं पसून नर्सरी ते प्राथमीक मेरेन राष्ट्रीय शिक्षणीक धोरण (एनईपी) सुरू केला. ह्या धोरणा खाला पयलींच्या वर्गांत प्रवेशा खातीर दावो करचे नात, अशी हमी दिल्ल्यान 6 जून आनी 27 जून दिसा 3 वर्सां पुराय जाल्ल्या आनी प्रवेशा पसून पयस राविल्ल्या दोगां भुरग्यांक प्रवेश दिवपाचो निवाडो मुंबय उच्च न्यायालयाच्या गोंय खंडपिठान दिला.
मधुराज भूपेश प्रभुदेसाय आनी गुंज गिरीश कवठणकार ह्या भुरग्यांच्या पालकांनी ही याचिका दाखल केल्ली. हातूंत राज्य सरकार आनी शिक्षण संचालक हांकां प्रतिवादी केल्या.
राज्य सरकारान अंदूं पसून राष्ट्रीय शिक्षणीक धोरणाची अंमलबजावणी सुरू करून भुरग्यांच्या पिरायेच्या तिसऱ्या वर्सां पसून पुस्तकाविणें आनी फावंडेशन-1 ह्या नांवान शिक्षण दितले. त्या अभ्यासक्रमाची सुरवात 3 जुलय पसून केल्या. ते खातीर 1 जून मेरेन ज्या भुरग्यांची पिराय 3 वर्सां पुराय जाल्ल्यांकूच प्रवेश दितले. जाल्यार मधुराजाक 6 जून आनी गुंजाक 26 जून दिसा 3 वर्सां पुराय जाल्ल्यान त्या दोगांकूय प्रवेश मेळूंक नाशिल्लो. जाल्यार सरकारान जूनांतूच जल्मल्ल्या दोन भुरग्यांक एका दिसाची सवलत दिवन प्रवेश दिल्ल्याचो दावो करून खंडपिठांत याचिका दाखल केल्ली.
मजगतीं, वयल्या याचिकादारांच्या पालकांनी आपल्या भुरग्यांक 6 वर्सां पुराय जाय मेरेन पयलीं यत्तेंत प्रवेशा खातीर दावो करचे नात, अशी हमी खंडपिठांत दिली. हाची दखल घेवन खंडपिठान त्या दोगांय भुरग्यांक प्रवेश दिवपाचो निवाडो दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
