भांगरभूंय | प्रतिनिधी
वास्को, प्रतिनिधी ः सुमार 42 वर्सां आदीं गुजरातांतल्यान कामाच्या निमतान तो मुंबय आयलो. पूण मागीर मानसीक स्थिती इबाडिल्ल्यान तो नकळत सरळ वास्को पावलो. थंय तो एका हॉटेलांत काम करपाक लागलो. ताच्या जाण्टेपणाक लागून एका मुसलमान कुटुंबान ताची जतनाय घेतली आनी ताचो सांबाळ केलो. कांय दिसां आदीं ताका आपल्या गांवांचे, कुटुंबातल्या भुरग्यांची नांवां याद जावपाक लागलीं आनी हाका लागून बायणातल्या डॉ. मेहुल शुक्ल हांच्या यत्नांक लागून ४२ वर्सां उपरांत ताचे दोग पूत ताका व्हरपा खातीर वास्को आयले. एके वटेन तो त्या मुसलमान कुटुंबा पसून पयस वतलो म्हणून दुखी आसलो जाल्यार, दुसरे वटेन तो आपल्या कुटुंबांतल्या वांगड्यांक मेळून खोशी जालो.
गुजरातांतल्या अमीर भाई सागरिया (८१) हाची ही काणी. तो आपली बायल, चार पूत आनी दोन धुवा वांगडा गुजरातांत रावतालो. ४२ वर्सां आदीं तो कामाच्या निमतान मुंबय आयिल्लो. पूण थंयच्यान गोंयांत कसो पावलो तें तांका याद ना. ते उपरांत वास्को येतकच तो आदर्श हॉटेलांत काम करपाक लागलो. थंय तांकां जेवण आनी सगळ्यो सुविधा मेळपाक लागल्यो. हॉटेलचो धनी बरो आशिल्ल्यान ताका रावपाक एक रुम दिली. उपरांत तो जाण्टो जाल्ल्लयान बायणाच्या एका मुसलमान घराणे ताची जतनाय घेवंक लागले. दुयेंत पडलो जाल्यार डॉ. शुक्ल हाचे कडेन ताका उपचारा खातीर हाडटाले.
दोन म्हयन्यां आदीं अमीर भाईन आपल्या कुटुंबाचें आनी गांवाचें नांव सांगले उपरांत मुसलमान घराण्यान ताच्या कुटुंबाचो सोद घेवपाचो यत्न केलो. पूण तांकां येस मेळ्ळें ना. कांय दिसां आदीं डॉ. शुक्लाक ही म्हायती दिली. उपरांत डॉ शुक्लान गुजरातांतल्या ताच्या दोतोर इश्टा कडेन संपर्क सादलो आनी अमीर भाईचे कुटुंब जुमू गांवांत रावता काय ना हाची चवकशी करपाक सांगलें. सुदैवान गुजरातांतल्या ज्या दोतोर इश्टा कडेन डॉ. शुक्लान संपर्क केल्ल्या त्या दोतोरा कडेन अमीर भाईचो व्हडलो पूत उपचार घेतालो. देखून थंयच्या दोतोरान तांका कळयले बरोबर अमीर भाईचो व्हडलो पूत युसुफ आनी धाकटो पूत गनी रोखडेच विमानांतल्यान गोंयांत आयले.
दोगूय जाण आपल्या बापायक मेळ्ळे. सुमार 42 वर्सां उपरांत बापायक मेळून तांका बरें दिसले. हांवें ताचो सोद घेवपाचो यत्न केलो, पूण तो आमकां मेळूंक ना अशें युसुफान सांगलें. ह्या मेळाव्यांत डॉ. शुक्ला वांगडा पॅथोलॉजिस्ट सनथ जोशी, नगरसेवक दीपक नायक, समाजीक वावुरपी रुपेश पालयेकार, गौरीश नायक आदी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
