भांगरभूंय | प्रतिनिधी
कदंबाच्यो 50 इलेक्ट्रीक बशी धांवतात वेगळ्यावेगळ्या मार्गार
पणजी : 40 टक्के पगारवाडीची मागणी करून कदंब म्हामंडळाच्या इलेक्ट्रीक बशीच्या चालकांनी शुक्रारा सकाळीं संप सुरू केलो. ताका लागून खूबशा मार्गां वयल्या प्रवाशांक व्हड संकश्टांक सामकार वचचें पडलें.
कदंब म्हामंडळाच्या इलेक्ट्रीक बशीच्या चालकांक सद्या म्हयन्याक 18 हजार रुपया पगार मेळटा. हे चालक ज्या ओलेक्ट्रिया कंपनी खाला येतात ती कंपनी दरेक वर्सा तांकां 10 टक्के पगारवाड दिता. तशेंच तांकां हेर सुविधाय दितात. पूण ह्या चालकांक दरेक वर्सा 40 टक्के पगारवाड जाय. तशे मागणीचें निवेदनूय तांणी सादर केल्लें.
पूण तांची ही मागणी पुराय करप शक्य नाशिल्ल्याचें सांगिल्ल्यानूच तांणी नोटीस दिनासतनाच संपाचो उलो मारलो. तांणी अचकीत संप केल्ल्यान प्रवाशांचे हाल जाले. ताका लागून म्हामंडळा वतीन तांचेर कारवाय करतले अशें म्हामंडळाचे सरवेवस्थापक संजय घाटे हांणी ‘भांगरभूंय’ कडेन उलयतना सांगलें.
कदंब म्हामंडळान फाटल्या कांय म्हयन्यांत चालकांक इलेक्ट्रीक बशी चलोवपाचें प्रशिक्षण दिल्लें. अशा चालकांक आतां इलेक्ट्रीक बशीचेर धाडून दितले अशेंय तांणी म्हणलें.
मजगतीं, कदंब म्हामंडळाच्यो 50 इलेक्ट्रीक बशी सध्या वेगळ्यावेगळ्या मार्गार धांवतात. ह्या बशींचेर सरकारी कर्मचारी, हेर कामगार निंबून आसात. पूण शुक्रारा सकाळीं कांय बशीच्या चालकांनी संप केल्ल्यान भौशीक येरादारी वेवस्था कांय प्रमाणांत ठप्प जाली. ताका लागून प्रवाशांचे हाल जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
