भांगरभूंय | प्रतिनिधी
-साडेचार वर्सांत विवीध न्यायालयांत 222 खटले प्रलंबीत
पणजी : फाटल्या 40 वर्सांत विवीध सरकारी प्रकल्पां खातीर रान क्षेत्रांतल्या 100 वाठारांतले सुमार 2,459 हॅक्टर जमनीचें रुपांतरण केलां, अशें रानां मंत्री विश्वजीत राणे हांणी आमदार दिगंबर कामत हांणी विधानसभेंत विचारिल्ल्या लेखी प्रस्नाचे जापेंतल्यान स्पश्ट केलां. सरकारी प्रकल्पां खातीर रान क्षेत्रांतल्या कितल्या हॅक्टर जमनीचें आतां मेरेन रुपांतरण केलां, असो प्रस्न विचारून, त्या वाठारांची वळेरी आमदार दिगंबर कामत हांणी मागिल्ली. ह्या प्रस्नाचे जापेंत मंत्री राणे हांणी 1983 पसून आतां मेरेन नव्यार स्त्यांचें बांदकाम, रस्ते रुंदीकरण, वीज ट्रान्समिशन आदीं सारक्या प्रकल्पां खातीर रुपांतरीत केल्ल्या रान क्षेत्रांतल्या 100 वाठारांच्या जमनीची वळेरी सादर केल्या. तातूंत 40 वर्सांत सरकारान प्रकल्पां खातीर रान क्षेत्रांतल्या सुमार 2,459 हॅक्टर जमनीचे रुपांतरण केल्ल्याचे दिसून येता.
रान क्षेत्रांतल्या जमनींचेर दावे करपी कितले खटले आतां मेरेन खंयच्या न्यायालयांनी प्रलंबीत आसात, असोय प्रस्न आमदार कामत हांणी विचारिल्लो. ताचे वयले जापेंत 2019 पसून आतां मेरेन विवीध न्यायालयांनी अशा प्रकाराचे 222 खटले प्रलंबीत आसात. तातूंतले पांच खटले सर्वोच्च न्यायालयांत, 19 खटले उच्च न्यायालयांत प्रलंबीत आशिल्ल्याचे मंत्री राणे हांणी म्हणलां.
6 खटल्यांनी सरकाराक अपेस
रान क्षेत्रांतल्या कितल्या खटल्यांनी सरकाराक अपेस आयलां, असो उपप्रस्नूय आमदार दिगंबर कामत हांणी विचारिल्लो. ताचेर मंत्री विश्वजीत राणे हांणी 2019 पसून आतां मेरेन रान क्षेत्रा संबंदीच्या 6 खटल्यांनी सरकाराक अपेस आयिल्ल्याचे नमूद केलां. हातूंत सर्वोच्च न्यायालय, उच्च न्यायालय, सर्व्हेक्षण भू नोंदणी, मडगांव संचालक जमीन रुपांतरण आनी भू-नोंदणी, मडगांव, सांगें उपजिल्होधिकारी तशेंच काणकोण उपजिल्होधिकारी ह्या 6 न्यायालयांतल्या खटल्यांचो आस्पाव आशिल्ल्याचे मंत्र्यांनी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
