भांगरभूंय | प्रतिनिधी
पर्वरी ः आयज अर्थसंकल्पीय अधिवेशनाच्या दुसऱ्या दिसा आमदार विजय सरदेसाय हांणी वीज संबंदीत मुद्दे मांडले. गोंयांत सुमार 800 कोटींचीं वीज बिलां थकीत आसात. ही रक्कम परत मेळोवपा खातीर वीज खाते सगले यत्न करीत आसा. हीं बिलां भरपा खातीर ‘एक रकमी येवजण’ म्हळ्यार ‘ओटीएस’ सुरू केल्या. तरी लेगीत अजूनय 380 कोटींचीं वीज बिलां थकीत आसात. हाका लागून उरिल्ली बिलां फारीक करूंक नाशिल्ल्यांक नोटीसी जारी केल्या अशें वीज मंत्री सुदीन ढवळीकार हांणी आयज सभाघरांत सांगलें.
अर्थसंकल्पीय अधिवेशनाच्या दुसऱ्या दिसा प्रस्न-उत्तर सत्रांत आमदार विजय सरदेसाय हांणी 10 वर्सांत 10.5 टक्क्यांनी वीज दर वाडयल्याचो मुद्दो मांडलो. ताचेर मंत्री ढवळीकार हांणी वयली जाप दिली. उपरांत फकत दर वाडोवन खात्यांतल्या कर्मचाऱ्यांचो पगार त्या टक्क्यांनी वाडलो काय? वा वीज वेवस्थेंत कांय व्हडलीशी सुदारणा जाली? अशे प्रस्न सरदेसाय हांणी विचारलें.
वीज दर ‘जेईआरसी’ वाडयता. वीज खाते न्हय. जर, ते दर वाडयतात आनी खात्यान दर वाडयलो ना जाल्यार वाडिल्लो दर सरकार वरवीं फारीक करचो पडटलो. देखूनच दर वाडोवचो पडटा. हाचे भायर मुळाव्या साधनसुविधांनीय सुदारणा करची पडटा. हाचे खातीर दर सामको उणो प्रमाणात वाडयतात. गोंयांत 1965 सावन कंडक्टर बदलूक नात. हाका लागून वीज पुरवणांत उणाव येता. आतां ह्यो सुदारणा जातात अशेंय मंत्री ढवळीकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
