भांगरभूंय | प्रतिनिधी
-वीज खरेदी, प्रकल्प खर्चाक मान्यताये खातीर भौशीक सुनावणी
पणजी : 2022 ते 2025 मेरेनच्या तीन अर्थीक वर्सां खातीर 3,061.58 कोटी रुपयांंच्या खर्चाचो प्रस्ताव वीज खात्यान तयार केला. ह्या खर्चाचेर चर्चा जावन ताका मान्यताय घेवपा खातीर जोड वीज नियमन आयोग (जीईआरसी) 13 जुलय आनी 14 जुलयाक भौशीक सुनावणी घेतले. वीज खरेदी, नवे प्रकल्प हांंच्या खर्चाक जोड वीज नियमन आयोगाची मान्यताय घेवची पडटा.
नव्या वीज उपकेंंद्रांची उबारणी, भुंयगत वीज वाहिन्यो, स्मार्ट मिटर तशेंच नव्या यंंत्रणांं खातीर खर्चाची तजवीज करची पडटा. सरकाराच्या मान्यताये उपरांंत जोड वीज नियमन आयोगान (जीईआरसी) मान्यताय दिले उपरांंत केंंद्रीय निधी वीज खात्याक मेळटा. विजेच्या बिलांंचे दर लेगीत जोड वीज नियमन आयोग (जेईआरसी) निश्चीत करता. वीज नियमन आयोगान मान्यताय दिले उपरांंत सरकाराक विजेचे दर वाडोवपाक मेळटात. वीज खात्यान आयोगा मुखार खर्चाच्या प्रस्तावाची याचिका सादर केल्या.
वीज खात्याच्या प्रस्तावीत खर्चाक लेगीत जोड वीज नियमन आयोगाच्या मान्यतायेची गरज आसा. हे खातीर 13 जुलयाक पणजे मिनेझीस ब्रागांंझा सभाघरांत भौशीक सुनावणी जातली. 14 जुलयाक फातोड्ड्यां रवींद्र भवनांत भौशीक सुनावणी जातली. सुचोवण्यो आनी हरकतींचो विचार करून जोड वीज नियमन आयोग प्रस्तावीत खर्चाक मान्यताय दितलो.
2022 – 23 अर्थीक वर्सा खातीर 1452.74 कोटी, 2023 – 24 खातीर 1041.59 कोटी, 2024 – 25 वर्सा खातीर 567.25 कोटींच्या खर्चाच्या प्रस्तावाचो उल्लेख याचिकेंत आसा.
2022 – 23 वर्सा खातीर 93.37 कोटींक सरकाराची प्रशासकी मान्यताय आसा. 103.94 कोटींच्या कामांंच्यो निविदा जारी जाल्यात. वीज वितरण प्रकल्पांंचेर 255 कोटी, नव्या येवजण्यांचेर 957.90 कोटी, इएचव्ही कामांं खातीर 90.86 कोटींच्या खर्चाची तजवीज आसा.
2023 – 24 वर्सा नव्या येवजणो/प्रकल्पांंचेर 856.75 कोटी आनी 2024 – 25 वर्सा खातीर नव्यो येवजण्यो/प्रकल्पांंचेर 520.25 कोटींच्या खर्चाचो प्रस्ताव आसा.
उंचेल्या दाबाच्यो (एचटी) वीज वाहिन्यो घालप, विजेची गळटी उणी करपा खातीर यंंत्रणा, नवे फीडर्स, कॅपेसिटर्स घालप ह्या कामाच्या खर्चाचो आस्पाव आसा. विजेची गळटी आनी चोरयेक आळो घालपा खातीर स्मार्ट मिटर बसोवपाचो प्रस्ताव आसा. 2025 मेरेन स्मार्ट मिटर बसोवपाचें उद्दीश्ट आशिल्ल्याचो याचिकेंत उल्लेख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
