भांगरभूंय | प्रतिनिधी
-गोंय लोकसेवा आयोगा वरवीं जायरात उजवाडाक
पणजी : पुलीस खात्यांत 28 पुलीस उपअधिक्षकपदांची थेट भरती करपा खातीर गोंय लोकसेवा आयोगान जायरात दिल्या. लेखी, तोंडी तशेंच शारिरीक परिक्षेंतल्या गुणांचेर आदारीत ही भरती जातली. इत्सुकांक 8 सप्टेंबर 2023 मेरेन अर्ज करचो पडटलो.
28 पदां मदीं 14 पदां सर्वसामान्य गटा खातीर आसात. 8 पदां हेर मागास वर्गीयां खातीर, 4 अनुसूचीत जमाती खातीर जाल्यार 2 अर्थीक नदरेन मागास विद्यार्थ्यां खातीर राखीव आसात. 21 ते 30 ह्या पिराय गटांतले इत्सूक उपअधिक्षक पदा खातीर पात्र आसात. अपवादात्मक स्थितींत सरकारी कर्मचाऱ्यां खातीर पिरायेची अट 40 वर्सां मेरेन सदळ करपाचे सरकाराक अधिकार आसात.
इत्सूक पदवीधर आसपा सयत उंचाय 168 सेंटीमिटर आसप गरजेचें. हेर शारिरीक निकश पुराय करपाक जाय. उमेदवाराची शारिरीक चांचणी जातली. ही चांचणी उत्तीर्ण जाले उपरांत तो पात्र थारतलो. दादल्या आनी बायलां खातीर शारिरीक चांचणीचे वेगळे निकश आसात.
उपअधिक्षक पदां खातीर जायते अर्ज येतात. सगळ्यांत पयलीं प्री स्क्रिनींग चांचणी जातली. ही परिक्षा 60 गुणांची आसतली. हे परिक्षेक थारावीक गूण मेळयिल्ल्या उमेदवारांकूच स्क्रिनींग चांचणेक बसपाक मेळटले. हाचे उपरांत स्क्रिनींग चांचणी जातली. स्क्रिनींग चांचणे उपरांत लेखी परिक्षा जातली. स्क्रिनींग तशेंच लेखी परिक्षेचो अभ्यासक्रम गोंय लोकसेवा आयोगान अर्जाच्या नमुन्या सयत दिला. लेखी परिक्षे उपरांत तोंडी परिक्षा जातली. हे सगळ्या मदीं शारिरीक चांचणी जातली. शारिरीक चांचणेक गूण आसचे ना. ही चांचणी उत्तीर्ण जाता, तोच फुडले परिक्षे खातीर पात्र थारतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
