भांगरभूंय | प्रतिनिधी
डिसेंबर मेरेन 99 इलेक्ट्रीक बशी, कदंबाक 100 नव्या बशींची गरज
पणजी : राज्यांत सुमार 250 बशींचो उणाव आसा. बशींचो उणाव पयस करपाचे यत्न सुरू आसात. कदंबा म्हामंडळाक डिसेंबर मेरेन आनीक 99 इलेक्ट्रीक बशी मेळटल्यो. तशेंच बशींचो उणाव पयस करपा खातीर सरकारान म्हजी बस येवजण सुरू केल्या. हे येवजणे खाला बस धनी नोंदणी करपाक फुडें येनात. पयलीं तीन मार्गाचेर ‘म्हजी बस येवजणे’ खाला बशी सुरू जातल्यो. उपरांत पुराय
राज्यांत हे येवजणे खाला बशी सुरू जातल्यो. ही येवजण सुरू करपाचेर सरकार ठाम आसा.
तशेंच स्मार्ट सीटी खाला पणजे शाराक आनीक 39 बशी मेळटल्यो. ह्यो बशी पणजे शारांत येरादारी करतल्यो. पणजेत जो बशी फेरयो मारतात, त्यो पोरण्यो आसात. मूळ धनी ह्यो बशी चलयना. ह्यो बशी दुसर्यांक चलोवपाक दिल्यात. म्हजी बस येवजण आनी इलेक्ट्रीक बशी आयले उपरांत कदंबा म्हामंडळाक 100 बशींची गरज पडटली. हाचे खातीर अर्थीक तजवीज करपाची गरज आसा.
15 वर्सां पोरण्यो बशी कावलांत काडपाचो नेम आसा. पोरण्यो बशी कावलांत काडले उपरांत बशींचो उणाव चड जाणवतलो. हाका लागून कदंबाक आनीक 100 बशींची गरज आसा, अशें येरादारी मंत्री मॉवीन गुदिन्हो हांणी सांगलेें. टॅक्सी खातीर मिटर बसोवपाचो आदेश खंडपीठान दिला. हाका लागून टॅक्सीवाल्यांक मिटरांतल्यान सूट मेळूंक शकना. मिटरा खातीर तांकां वर्साक 4,654 रुपया भरचे पडटात. खंडपिठांत याचिका दाखल करून टॅक्सीकार मिटरांतल्यान सूट घेवपाक शकतात. सरकाराक सूट दिवप शक्य ना, अशें गुदिन्हो हांणी सांगले.
पणजी, वास्को, मडगांव, म्हापशें जातले बस पोर्ट
पणजी, वास्को, मडगांव आनी म्हापशें ह्या चार बस स्थानकांचो दर्जो वाडोवन ते बस पोर्ट जातले. केंद्रीय येवजणेंतल्यान निधी मेळटलो. ह्या चार बस स्थानका उपरांत हेर सगल्या बस स्थानकांची दुरूस्ती जातली. पीपीपी तत्वाचेर बस स्थानकाची दुरूस्ती जातली. आनीक 29 जाग्यांचेर एआय सिग्नल पणजे आनी लागसारच्या वाठारानी एआय सिग्नल कॅमेरे बसयल्या. आनीक 29 जाग्यांचेर एआय सिग्नल कॅमेरे बसयतले.
टॅक्सीकार करतले सिंगापूर, दुबयची भोंवडी
टॅक्सी पात्रांव येवजणे खाला गरीब तरणाट्यांक टॅक्सी घेवप शक्य जालां. हे येवजणे खाला कांय टॅक्सी चालक दुबय तशेंच सिंगापुराक भेट दितले. टॅक्सी वेवसायाचो अभ्यास करपा खातीर ते दुबय तशेंच सिंगापूर वतले, अशें मंत्री मॉवीन गुदिन्हो हांणी सांगलें. ही मूळ येवजण गोंय पर्यटन उदरगत म्हामंडळाची आसली. उपरांत ती येरादारी खात्या कडेन आयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
