भांगरभूंय | प्रतिनिधी
-285 शाळांक खेळां मैदानूच ना, सगल्या शाळांनी शौचालयाची वेवस्था
पणजी : राज्यांतल्या 712 शाळां मदीं 23 सरकारी प्राथमीक शाळा अजुनूय भाड्याच्या जागेंत सुरू आसात. जाल्यार 285 शाळांक स्वताचें खेळां मैदान ना. मुख्यमंत्री डॉ. प्रमोद सावंत हांणी विधानसभेंतल्या लेखी प्रस्नाक दिल्ले जापेंतल्यान ही म्हायती मुखार आयल्या.
आमदार दिगंबर कामत हांणी हे विशींचो प्रस्न विचारिल्लो. सध्या राज्यांत सुरू आशिल्ल्या सरकारी प्राथमीक शाळांच्या वळेरेंत कितल्यो शाळा स्वताचे जागेंत सुरू आसात, कितल्या शाळांनी शौचालय आसात आनी कितल्या शाळांक स्वताचे खेळां मैदान आसा, हे विशींचो प्रस्न आमदार कामत हांणी विचारिल्लो.
ह्या प्रस्नाचे लेखी जापेंत मुख्यमंत्री तशेंच शिक्षण मंत्री डॉ. प्रमोद सावंत हांणी सादर केल्ले आंकडेवारी प्रमाण, सध्या राज्यांत 712 सरकारी प्राथमीक शाळा सुरू आसून, 23 सरकारी प्राथमीक शाळा अजुनूय भाड्याच्या जागेंत सुरू आशिल्ल्याची म्हायती दिल्या. 285 शाळांक स्वताचें खेळां मैदान ना. पूण सगल्याच शाळांनी शौचालयाची वेवस्था आशिल्ल्याचे मुख्यमंत्र्यांनी जापेंत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
