भांगरभूंय | प्रतिनिधी
वाळपय: 22 जानेवारी दिसा आयोजीत केल्ल्या प्रभू श्रीराम प्राणप्रतिश्ठेचो सुवाळो सत्तरी म्हालांत व्हड उत्साहान मनयतले. म्हालांतल्या वेगळ्यावेगळ्या वाठारांतल्या 390 देवळांनी हो उत्सव मनयतले. हे खातीर सगले तरेची तयारी पुराय जाल्या. ह्या उत्सवांत नागरीक आनी भाविकांनी व्हड प्रमाणांत वांटो घेवन अयोध्येंत जावपी प्राणप्रतिश्ठेच्या सुवाळ्याचे साक्षी जावचे अशी विनंती भलायकी मंत्री विश्वजीत राणे हांणी केल्या.
वाळपय नगरपालिका सभाघरांत काडिल्ल्या श्रीराम हांच्या रांगोळी चित्राच्या उक्तावण सुवाळ्यांत ते उलयताले. प्रभू रामचंद्राची मुद्रा रांगोळीच्या रुपांत साकारल्या.
पत्रकारां कडेन उलयतना राणे हांणी म्हणलें, अशे तरेची रांगोळी, केरी आनी उसगांव काडल्या. वाळपय काडिल्ली रांगोळी 22 तारीख मेरेन सगल्यां खातीर उक्ती आसतली. ही रांगोळी पळोवपा खातीर विद्यालयाच्या वेवस्थापनान भुरग्यांक हातूंत वांटेकार करून घेवचे अशी विनंती मंत्री राणे हांणी केली.
22 तारखेचो दीस हो दरेकाचे यादींत उरतलो. 500 वर्सां उपरांत प्रभू रामचंद्राची प्रतिश्ठापणा जातली. देश स्वतंत्र जाले उपरांत पयलेच फावटी असो उत्साही माहोल देशांत तयार जाला आनी तातूंत सत्तरी म्हाल वांटेकार जातलो. दरेक देवळांनी आरती, किर्तन, नामजप, भजन, फुगडी, धालो, दिंडी अशा परंपरीक आनी धर्मीक कार्यावळींचें आयोजन केलां. खूबशा देवळांनी सत्यनारायण म्हापुजेचें आयोजन केलां. महाप्रसादाचें वितरण करतले. ह्या माहोलांत दरेकान वांटेकार जावचे अशी विनंती राणे हांणी केली.
सत्तरी म्हालांत सुमार सगलींच देवळां हातूंत वांटेकार जातलीं. पूण 390 देवळांनी हे विशींची वेवस्था केल्या. तेच प्रमाण पर्यें आनी वाळपय मतदारसंघांत दोन सुवातांनी व्हड स्क्रीन लावन थेट प्रक्षेपणाची वेवस्था केल्या. वाळपय हनुमान देवूळ ते पर्यें हांगासरल्या केरी आजोबा देवळांत हे विशींची वेवस्था केल्या अशें राणे हांणी म्हणलें.
सद्या तरी सगली कडेन बरो प्रतिसाद मेळत आसून सत्तरी म्हालांतल्या दरेक घराचेर श्रीराम ध्वज हुबयल्यात. हाका लागून वेगळे तरेचे चैतन्य निर्माण जालां. ह्या चैतन्यांत दरेकान वांटेकार जावन श्रीराम प्रभूची आराधना करची अशी विनंती मंत्री राणे हांणी केली.
वाळपय काडिल्ल्या रांगोळीचें फीत कापून उक्तावण केलें. ह्या वेळार नगराध्यक्षा प्रसन्ना गांवस, नगरसेवक विनोद हळदणकार, सेहझीन शेख आनी समाजीक कार्यकर्ते विनोद शिंदे हाजीर आशिल्ले.
गोंय सुटके उपरांत पयलेच फावटी व्हड आकाराची रांगोळी काडल्या आनी हे खातीर महाराष्ट्रांतल्या एका कलाकारान आपली कला सादर केल्या. हाका लागून दरेकान रांगोळी पळोवपा खातीर 22 जानेवारी मेरेन सगल्यां खातीर उक्ती आसतली. हातूंत लोकांनी आनी विद्यार्थ्यांनी हाचो लाव घेवचो अशी विनंती मंत्री विश्वजीत राणे हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
