भांगरभूंय | प्रतिनिधी
लोकांनी सादूरताय बाळगून भलायकी यंत्रणेक सहकार्य करचें
भांगरभूंय प्रतिनिधी जानेवारी ते मे 2022 त गोंयांत डेंग्यूचे 69 दुयेंती मेळिल्ले. पूण अंदूं ह्याच काळांत 50 दुयेंती मेळ्ळ्यांत. अंदूं डेंग्यूच्या दुयेंतींची संख्या उणी आसली, तरी नागरिकांनी सादूरताय बाळगप आनी भलायकी यंत्रणांक सहकार्य करप गरजेचें, अशें संसर्गजन्य दुयेंसाचें तज्ञ डॉ. कल्पना महात्मे हांणी सांगलें.
पणजी :
पोरूं मे म्हयन्यांत डेंग्यूच्या 25 दुयेंतींची नोंद जाल्ली. अंदूंच्या मे त हो आंकडो 16 इतलो आसा. जूनांतल्या दुयेंतींचो आंकडो फुडल्या दोन दिसांत जाहीर करतले, अशें तांणी सांगलें.
दरवर्सा पावसाळ्यांत डेंग्यूचे दुयेंती मेळपाक सुरवात जाता. अंदूं मॉन्सून उसरां सुरू जाल्ल्यान अजून दुयेंतींनी वाड जावंक ना. ही वाड थांबोवपाक नागरिकांनी भलायकी यंत्रणांच्या यत्नांक पुराय सहकार्य करचें, असो उलो तांणी केला.
जानेवारी ते मे ह्या काळांत जे 50 दुयेंती मेळिल्लें ते मुखेलपणान चिंबल, वास्को, कुठ्ठाळी, मडगांव ह्या वाठारांतले आसात. ताका लागून भलायकी खात्यान ह्या वाठारांचेर नदर दवरून थंय गरजेच्यो उपाय येवजणो राबोवपाक सुरवात केल्या, अशेंय डॉ. महात्मे हांणी सांगलें.
पंचायती, पालिकांचे सहकार्य गरजेचें
डेंग्यू दुयेंस जावचे न्हय हे खातीर भलायकी खात्यान सुरवाती पसुनूच गरजेचीं पावलां उबारल्यात. डेंग्यू विशीं लोकजागृताय, गांवागांवांनी जंतूनाशक फवारणी करपाचेर भर दिल्लो. ह्या कामांत पंचायती, पालिकांनीय भलायकी खात्याक पुराय सहकार्य केल्लें. ताका लागुनूच अंदूं डेंग्यू दुयेंतीं मेळपाचें प्रमाण उणें जालां, अशें डॉ. महात्मे हांणी सांगलें.
सोसायट्यांनी सादूरताय बाळगुची
शारी वाठारांतल्या सोसायट्यांनी बाल्कनींत झाडांच्यो कुंड्यो दवरतात. त्याे कुंड्यो ज्या पात्रांत दवरतात, तातूंत उदक सांचून डेंग्यूची अळी तयार जातात. ते खातीर सोसायट्यांनी रावपी नागरिकांनी हे विशीं सादूर आसप गरजेचें, अशें डॉ. महात्मे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
