भांगरभूंय | प्रतिनिधी
99 जाणांक हॉस्पिटलांत मरण; करदात्यांच्या पयशांनी जातात निमाणे संस्कार
भांगरभूंय । अजय लाड
मडगांवः दक्षीण गोंयांत एक ते दोन दिसांनी बेवारस कुडीची खबर पुलिशेक नागरिकां कडल्यान येता. दक्षीण गोंयांतल्या कुडीं विशीं म्हायती घेतली जाल्यार 2021 ते जून 2023 ह्या काळांत 264 बेवारस कुडी सांपडल्यात. तातूंतल्या 99 जाणांक हॉस्पिटलांत मरण आयलां जाल्यार 163 कुडी पुलिशे कडल्यान मड्यांकुडींत व्हेल्यात. ह्या कुडींचेर करदात्यांच्या पयशांतल्यान निमाणे संस्कार करतात.
दक्षीण गोंयांतल्या विवीध वाठारांत भिकाऱ्यांक मरण आयल्यार वा बेघर मनीस मेल्ले स्थितींत सांपडिल्ल्याचे पुलिशेक कॉल येतात. दक्षीण गोंयच्या खंयच्याय वाठारांत कूड मेळ्ळी जाल्यार रोखडीच ती कूड दक्षीण गोंय जिल्हो हॉस्पिटलाचे मड्याकुडींत व्हरतात. थंय सुमार दोन सप्तकां ते देड म्हयन्या मेरेन त्यो कुडी थंय दवरतात. पुलिसांनी त्यो कुडी हाडल्यात आसत जाल्यार संबंदीत मनशाचो कोण सोयरोधायरो आसा काय कितें ताची चवकशी करतात. एकादे कुडीचेर कोणेय हक्क सांगलो जाल्यार ताचे कडल्यान गरजेचीं कागदपत्रांचीं प्रक्रिया करतात. तशेंच मरणा विशींची हेर म्हायती घेतात. कायदेशीर प्रक्रिये उपरांतूच ती कूड संबंदीत सोयऱ्याधायऱ्याचे सुवादीन दितात. पुलिसां कडल्यान हॉस्पिटलांत हाडिल्ल्या कांय खून प्रकरणांतल्यो कुडी पोस्टमार्टमा उपरांत लेगीत सुमार 1 वर्सभर दवरतात. बेवारशी कुडीचो विलो लावचे आदीं पुलीस कुडीचे फोटो, फिंगरप्रींट आनी हेर म्हायती एकठांय करून दवरतात. ती देशांत तशेंच देशा भायल्या पुलीस स्टेशनांक धाडटात. ते उपरांत गरजेची कागरपत्रांची कार्यवाही केले उपरांत ते कुडीचो विलो लायतात. दक्षीण गोंयांत फाटल्या तीन वर्सांत सांपडिल्ल्या कुडीं विशीं म्हायती घेतली तेन्ना 2021 त वट्ट 88 बेवारशी कुडी सांपडिल्ल्याचें कळ्ळें. तातूंतल्या 9 जाणांक हॉस्पिटलांत मरण आयिल्लें जाल्यार 79 कुडी पुलिसांनी पोस्टमार्टमा खातीर हाडिल्ल्यो. 2022 तले आंकडेवारी प्रमाण हॉस्पिटलांतल्या बेवारस मनसांच्या मरणाचें प्रमाण 60 इतलें आसा. दक्षीण गोंयांत हेर कडेन सांपडिल्ल्या बेवारस कुडींची संख्या 54 आसा. अंदूं 20 जून मेरेन वट्ट 62 बेवारस कुडी सांपडल्यात. तातूंतल्या 32 जाणांक हॉस्पिटलांत मरण आयलां. 30 कुडी पुलिसांनी मड्यां कुडींत दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
