2011 च्या ओडीपी आराखड्याची म्हायती नगरनियोजन विभागा कडेन ना : एल्वीस
भांगरभूंय | प्रतिनिधी
मडगांव : कार्यालयांत ओडीपी आराखड्याची म्हायती कांय प्रमाणांत उपलब्ध आसा. 2001 च्या आराखड्याची म्हायती हार्ड कॉपी स्वरुपांत पयशे भरून घेवपाक शकता. पूण, 2011 च्या ओडीपी आराखड्याची कसलीच म्हायती उपलब्ध ना, अशी म्हायती नगरनियोजन विभागा कडल्यान मेळ्ळ्या. हो गैरकारभारुच, अशें मत काँग्रेस फुडारी एल्वीस गोम्स हांणी शुक्रारा उक्तायलें.
मणिपुरचे घडणुकेचो दक्षीण गोंय जिल्हो काँग्रेस कार्यालयांत घेतिल्ले पत्रकार परिशदे वेळार निशेद केलो. तशेंच राज्यांतल्या जमनींच्या घोटाळ्याचेर ह्या वेळार उलोवप जालें. ह्या वेळार एल्वीस गोम्स, योगेश नागवेंकार, मेल्वीन फर्नांडीस आनी हेर हाजीर आशिल्ले.
गोम्स हांणी फाटल्या कांय वर्सांनी जमनींचे घोटाळे आनी त्यो हडप करपाच्यो घडणुको बर्योच वाडल्यात, अशें सांगलें. हाचे पयलीं उत्तर गोंयांत 17 लाख चौरस मिटर जमिनींची जाल्ली भानगड भायर सरल्या. चार अधिकार्यांनी सरकाराक दिल्ल्या अहवालांतल्यान ही जमीन भानगड जाल्ल्याचें स्पश्ट जालां. दक्षीण गोंयचे तेन्नाच्या पीडीए अध्यक्षांच्या चेंपणा खाला कांदोळे, कळंगूटे, पर्रा, नागयां आनी आग्वादा वाठारांतल्या जमनीचें रुपांतर जालां अशें तांणी सांगलें.
मॅल्वीन फर्नांडीस हांणी ओडीपींतल्या चुकां विशीं उच्च न्यायालयांत याचिका दाखल केल्ली. न्यायालयान सध्या ओडीपी रद्द आशिल्ल्यान नवे समिती कडेन चुको मांडपाक याचिकादाराक सांगलां. पूण ह्या प्राधिकरणा कडल्यान तांकां आपोवंक ना. मॅल्वीन हांणी म्हायतीच्या अधिकार्यां खाला ओडीपी 2001, 2011 आनी 2021 च्या आराखड्याच्यो कॉपी मागयल्ल्यो. पूण, नगरनियोजन खात्याच्या मुखेल कार्यालया कडल्यान प्रादेशीक आराखडो 2011 ची कागदपत्रां उपलब्ध नाशिल्ल्याचें सांगलां. 2011 च्या आराखड्याचेर राज्यांत बरेंच व्हड आंदोलन जाल्लें. पूण, त्या आराखड्याची म्हायतीच खात्या कडेन ना. ताका लागून पीडीए बरखास्तीची मागणी केल्ली. तातूंत फकत राजकारण्यांचो फायदो जाता, उदरगत मात कांयच जायना. नगरनियोजन खात्या कडेन हाची मागणी केल्या. जमीन हडप प्रकरणांत एसआयटी नेमली. त्या एसआयटींतल्या सगळ्या अधिकार्यांच्यो बदल्यो केल्यात. ताका लागून एसआयटी चवकशे वरवींय कितेंच मुखार येवचें ना, अशेय गोम्स हांणी फुडें म्हणलें.
धिंडीचो निशेद
मणिपुरांत बायलांची कपड्यां विणें धींड काडली, ताचो काँग्रेस निशेध करता. भाजप सरकार आनी प्रधानमंत्री मोदी हांणी वेळार योग्य कारवाय करूंक नाशिल्ल्यान गुन्यांवांचो आंकडो वाडला. हे घडणुकेंतल्यान यंत्रणेचीं निश्काळजीपणां दिसून येतात. पुलीस हाचो आढावो गृह खात्याक दितात. 4 मेक जी घडणूक घडली ताची म्हायती पुलिसांक आसप गरजेचें. पूण, ही घटणूक आतां व्हिडियो व्हायरल जाले उपरांत मुखार आयल्या, अशें कोण सांगता जाल्यार ही फटींगपणा चल्ल्यां. सर्वोच्च न्यायालयान दखल घेतली ही बरी गजाल. ह्या गुन्यांवा खाला जशी दुबावीतांचेर कारवाय जाल्या तशीच कारवाय हे घडणुकेक जापसालदार आशिल्ल्या राजकी फुडार्यां वांगडा पुलीस अधिकार्यांचेरूय करप गरजेचें, अशी मागणी गोम्स हांणी केली.
लोकां मदीं फूट घालपाचें राजकारण
राज्यांतूय जाती, धर्माचें राजकारण, पुतळ्यांच्या विशया वेल्यान राजकारण सुरू जालां. भाजपा सरकाराच्या काळांत आनीक कितें जातलें हें खबर ना. लोकांनी अशे तरेच्या राजकारणां पसून पयस रावचें. जाती- धर्माचें राजकारण लोकांनी वळखुचें. अशे तरेच्या राजकारणा पसून पयस रावल्यार बरें जातलें, अशेंय गोम्स हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
