भांगरभूंय | प्रतिनिधी
राज्यपाला कडल्यान पुलिसांची तोखणाय
पणजी ः गोंय विधानसभेचें अर्थसंकल्पीय अधिवेशन आयज सकाळीं 11.30 वरांचेर राज्यपालाच्या भाशणान सुरू जालें. ह्या भाशणांत तांणी पुलिसां सयत सगल्याच मळार सरकारान बरी कामगिरी केल्ल्याचें सांगलें.
गोंयांत कायदो आनी सुवेवस्था सुदारल्या. फाटल्या वर्सा गोंय पुलिसांक फक्त 11 म्हयन्यांत 85.83 टक्के गुन्यांवाचो सोद लावपाक येस आयलें. ह्या काळांत तांणी 39 कोटी 6 लाख 35 हजारांचें 159.17 किलो ड्रग्ज जप्त करपाक येस मेळयलें. तांच्या ह्या कामगिरीची राज्यपाल श्रीधरन पिल्लय हांणी तोखणाय केली.
फाटल्या वर्सा 30 नोव्हेंबर 2023 मेरेन पुलीस आनी येरादारी खात्यान येरादारी उल्लंघनाच्यो 5,19,443 प्रकरणां येसस्वीपणान नोंद करून 34.39 कोटी रुपया दंड वसूल केला. ह्या काळांत गोंय उजो पालोवपी आनी आपत्कालीन सेवा दळान 5,527 कॉल येसस्वीपणान हाताळ्ळे आनी 87 मनीस आनी 29 जनावरांचे जीव वाटायले. ते भायर 19.47 कोटीचीं मालमत्ता वाटावपाक तांकां येस आयलें अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
