भांगरभूंय | प्रतिनिधी
प्रदुशण मंडळाचो हणजूण पुलिसांक आदेश
म्हापशें: वझरांत वागातोरा शुक्रार 11 ते शेनवार 19 मजगतीं आयोजीत ओपन अॅर संगीत रजनी पार्ट्यो जावच्यो नात हाची काळजी घेवची आनी संबंदीत युनिट्स सील करचे अशे निर्देश गोंय प्रदुशण नियंत्रण मंडळान हणजूण पुलीस निरिक्षक आनी उत्तर गोंय पुलीस अधिक्षकांक दिल्यात.
ह्या पार्ट्यांच्या आयोजना विशीं शापोरांतले रहिवाशी सागरदीप शिरसयकार हांणी प्रदुशण मंडळा कडेन कागाळ केल्ली. उच्च न्यायालयाच्या आदेशा प्रमाण वझरांत वागातोर हांगासरलीं कांय आस्थापनां सील केल्लीं.
तरीही ला म्युझिका, डुबकी बीच क्लब, बनाना फॉरेस्ट, मयंक बीच क्लब आनी हयाती बीच क्लब ह्या आस्थापनांनी 11 ते 19 ऑगस्ट मजगतीं ओपन अॅर पार्ट्यांचें आयोजन केलां. हो प्रकार गोंय खंडपिठाच्या आदेशाचें उल्लंघन करपी आसा. तशेंच ह्या पार्ट्यांच्या आयोजनाचे पोस्टर लेगीत शिरसयकार हांणी कागाळी सयत जोडिल्ले.
ह्या आस्थापनांची रोखडीच पळोवणी करची आनी ती उक्तीं केल्लीं आसत जाल्यार संबंदीत प्राधिकरणान तांचो परवानो फाटीं घेवन वीज पुरवण खंडीत करची अशी मागणी लेगीत शिरसयकार हांणी प्रदुशण मंडळा कडेन केल्ली.
ते प्रमाण प्रदुशण मंडळाचे वांगडी सचीव शमिला मोंतेरो हांणी वयलो आदेश पुलीस अधिकाऱ्यांक दिला. ह्या आदेशाची प्रत उत्तर गोंय जिल्होधिकारी, बार्देस उपजिल्होधिकारी हांकां धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
