भांगरभूंय | प्रतिनिधी
मुख्यमंत्र्यांची घोशणा, येवजणेंत नोंदणी केल्ल्या 9 हजार जाणांक दिली नेमणूक पत्रां
पणजी : मुख्यमंत्री अॅप्रेंटिसशीप येवजणेंत वांटेकार जावन खाजगी कंपनींनी काम करप्यांक राज्य सरकारा वतीन अतिरिक्त 1,500 रुपया दितले, अशी घोशणा मुख्यमंत्री डॉ. प्रमोद सावंत हांणी शेनवारा केली. येवणेंत वांटेकार जाल्ल्यांक नेमणूक पत्रां दिवपा खातीर ताळगांवां आयोजीत कार्यावळींत मुख्यमंत्री उलयताले.
केंद्रीय राज्यमंत्री श्रीपाद नायक, भाजप प्रदेशाध्यक्ष सदानंद शेट तानावडे, आमदार जेनिफर मोंसेरात, रुडॉल्फ फर्नांडीस, राजेश फळदेसाय, म्हापौर रोहीत मोंसेरात, शिक्षण सचीव प्रसाद लोलयेंकार, गौरीश धोंड, कुशळटाय विकास खात्याचे संचालक एस. एस. गांवकार हे मानेस्त ह्या वेळार हाजीर आशिल्ले.
राज्यांतल्या बेरोजगार तरणाट्यांक कुशळटायेचें शिक्षण दिवन तांकां सरकारी आनी खाजगी क्षेत्रांत नोकऱ्यो मेळोवन दिवपा खातीरूच राज्य सरकारान मुख्यमंत्री अॅप्रेंटिसशीप येवजण चालीक लायल्या. येवजणे खाला अातां मेरेन 9 हजार युवक-युवतींनी नोंदणी केल्या. जागतीक कुशळटाय दिसा निमतान काल राज्यांत विवीध सुवातांचेर आयोजीत कार्यावळींत तांकां अॅप्रेंटिसशीप (नेमणूक पत्रां) दिल्यांत, अशें मुख्यमंत्री डॉ. सावंत हांणी म्हणलें.
येवजणेंत वांटेकार जावप्यांक वर्सभर सरकारी खातीं तशेंच खाजगी कंपनींनी प्रशिक्षण दितलें. ते खातीर तांकां म्हयन्याक 8 ते 13 हजार रुपया मानधन दितलें. पूण येवजणेचो लाव घेतिल्ले तरणाटे फुडें खाजगी कंपनींनी कामाक लागतले, तांकां राज्य सरकारा कडल्यान दरेक म्हयन्याक अतिरिक्त 1,500 रुपया दितले, अशें मुख्यमंत्र्यांनी सांगलें.
राज्यांतल्या बेरोजगारांक गरजेचें कुशळटायेचें प्रशिक्षण दिवन राज्यांत कार्यरत आशिल्ल्या विवीध खाजगी कंपनींनी कायमस्वरूपी रोजगार उपलब्ध करून दिवपा खातीरूच राज्य सरकार फाटल्या दोन वर्सां पसून विवीध कार्यावळी राबयता. ते खातीर राज्यांतल्या भोवतेक कंपनींनी कडेन सरकारान समजिकाय कबलात केल्या. फुडल्या काळांत उरिल्ल्या वखदां कंपनीं कडेन कबलात करतले. ताका लागून तरणाट्यांनी शिक्षण पुराय जाले उपरांत मुख्यमंत्री अॅप्रेंटिसशीप येवजणेंत वांटेकार जावन एका वर्साचें प्रशिक्षण घेवचें अानी नोकऱ्यो मेळोवच्यो, असो उलो मुख्यमंत्र्यांनी केला.
मजगतीं, प्रधानमंत्री नरेंद्र मोदी हांच्या फुडारपणा खाला केंद्र सरकारान देशभरांतल्या बेरोजगारांक कुशळटायेचें शिक्षण दिवन तांची सर्वांगी उदरगत करपाचो तशेंच तांकां नोकऱ्यो मेळोवन दिवपाचो निश्चेव केला. ते खातीरूच गोंया सयत देशभर कुशळटाय शिक्षणाक उर्बा दितात. गोंय सरकारान घेतिल्लो निर्णय तोखणायेचो आसा, अशें केंद्रीय राज्य मंत्री श्रीपाद नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
