“हर घर तिरंगा” मोहीमे खातीर टपाल खात्यांत 25 रुपयांत राश्ट्रध्वज

भांगरभूंय | प्रतिनिधी

भांगरभूंय । खबरां संस्था
पणजी ः भारत सरकारान 15 ऑगस्ट दिसा स्वातंत्र्य दिसा निमतान “हर घर तिरंगा” मोहीम 2.0 सुरू केल्या. सगल्या नागरिकांक घरांत राश्ट्रध्वज उबारपाक प्रोत्साहन दिवपाचें काम सुरू आसा. नागरिकां खातीर राज्यांतल्या सगल्या टपाल खात्यांनी 25 रुपयान राश्ट्रध्वज मेळटलो.
सगल्या सरकारी/खाजगी संस्थांनी, म्हामंडळांनी, थळाव्या स्वराज्य संस्थांनी राश्ट्रध्वज जाय जाल्यार 10 ऑगस्ट सावन टपाल खात्या कडेन संपर्क सादचो. राश्ट्रध्वजाच्या चड विक्री खातीर पणजी मुख्यालय आनी मडगांव मुख्यालय वा विपणन कार्यकारी राजेश मडकयकार (9890701601) हांचे कडेन संपर्क सादचो, अशें टपाल खात्यान कळयला.
ऑल इंडिया रेडिओ न्यूजच्या अधिकृत ट्विटा प्रमाण, भारत टपाल खातें “हर घर तिरंगा” मनोवपा खातीर इंडिया पोस्ट ऑफिस आपल्या 1.60 लाख टपाल खात्यांतल्यान राश्ट्रध्वज विकतलें. सरकार 13 ते 15 ऑगस्ट मेरेन “हर घर तिरंगा” अभियान चलयता. तशेंच खात्याचे ई-पोस्ट ऑफिस सुविधा वरवीं नागरिकांक राश्ट्रध्वज खरेदी करपाक मेळटात.
हे मोहिमेंत टपाल खातें ही विक्री आनी वितरण एजन्सी आसा, जाका लागून राश्ट्रध्वज परवडपी दरांत (25 रुपया) लोकांक मेळटा.