भांगरभूंय | प्रतिनिधी
हरमल, बातमीदार: गिरकरवाडो वाठारांतल्या बेकायदेशीर बांदकामाच्या प्रस्नाचेर चर्चा चालू आसा. १८७ वेवसायीक आस्थापनांचें नांव आनी हेर कांयच म्हायती खबर नासतना सर्वेक्षण करतात. तातूंत बरोच घोटाळो जाला. ताका लागून पंचायतीचो केशींतलो वकील बदलपाचो थाराव भोवमतान मंजूर केलो. मात ग्रामसभेंत बरोच बोवाळ जाल्ल्यान तीन- चार फावटीं कामकाज बंद पडलें.
ह्या सर्वेक्षणा वेळार पंचायतीन आस्थापनांक गरजेच्यो सुचवण्यो दिवपाची गरज आशिल्ली. मात कसलेच तरेच्यो सुचवण्यो दिनासतना सर्वेक्षण करीत आसाता. पंचायतीन कागाळदार व्यक्तीक घेवन येवचें आनी सर्वेक्षण करचें अशी सुचवणी ग्रामस्थांनी केली. ह्या वेळार उपसरपंच अनुपमा मयेंकार, पंच सोनाली माज्जी, दिव्या गडेकार, सुभाष कांबळी, सुशांत गावडे, सांतान फर्नांडीस, भिकाजी नायक, गुणाजी ठाकूर आनी बिडीओचे संतोष नायक हाजीर आशिल्ले. पंच बर्नार्ड फर्नांडीस ह्या वेळार हाजीर नाशिल्ले.
गिरकरवाडो भागांतल्या एका आस्थापन धनयाक खंयच्याच खात्यान नोटीस दिवंक ना आनी कागदांय मागूनय घेवंक नात. पंचायतीन पयलींच नोटीस दिवंक ना. पंचायतीन कोर्टाचो आदेश आयकनासतना आपलें आस्थापन पुरायेन सील केलें अशी कागाळ तांणी मांडली. तेन्ना पंचायत सचीव कांबळी हांणी कोर्टा मुखार अर्जा वरवीं कळोवचें अशें सुचयलें. ह्या वेळार नागरीक तिडकले आनी तांणी हुश्यो घाल्यो.
पंचायत वाठारांतल्या वेवसायीक आस्थापनांक कोयर शुल्क, वेवसायीक कर तशेंच हेर शुल्क आकारप उणें करचें. ग्रामसभेक विस्वासांत घेवन नव्यान शुल्क आकारपाक सुरवात करपाची मागणी पिटर कार्डोझ हांणी केली. ग्रामसभेची नोटीस शिक्षणीक संस्थांक धाडची अशी सुचवणी नागरीक महेश वायंगणकार हांणी केली. हे ग्रामसभेंत टोनी डिमेलो, मारसेलीन फर्नांडीस, प्रजोय्य फर्नांडीस, अलेसीन रॉड्रिग्ज, सेबी रॉड्रिग्ज, आयरिश डिसोझा, बॉस्को फर्नांडीस, एडी डिसोझा हांणी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
