भांगरभूंय | प्रतिनिधी
प्रिया मिशाळ: म्हापशेंची विकासकामां पुराय करपाक वचनबद्ध
म्हापशें: स्वातंत्र्य सैनिकांचो त्याग आनी बलिदानांतल्यान 1947 वर्सा आमचो देश स्वतंत्र जालो. त्या व्हड क्रांतिविरांचें आनी धिटायेन झुजिल्ल्या विरांची याद करून आमकां स्वातंत्र्याची राखण करूंक जाय. ते खातीर एकवट आनी खऱ्या देशप्रेमाची गरज आसा, आनी ही भावना बाळगून कार्यरत रावुया. म्हापशेंच्या विकासाचीं कामां आमदार आनी सरकाराच्या माध्यमांतल्यान पुराय करपाक आमी वचनबद्ध आसात अशें आस्वासन नगराध्यक्षा प्रिया मिशाळ हांणी दिलें.
म्हापशेंच्या हुतात्मा चौकांत तिरंगो हुबयले उपरांत त्यो उलयताल्यो. ह्या वेळार मुख्याधिकारी चंद्रकांत शेटकार, उपनगराध्यक्ष विराज फडके, सद्याचे आनी आदले नगरसेवक, पालिका कर्मचारी, नागरीक आनी विद्यार्थी हाजीर आशिल्ले.
बावटो हुबयले उपरांत राष्ट्रगितान कार्यावळीची सुरवात जाली. हुतात्मा चौकांत मशाली पेटोवन पुष्पचक्र अर्पण केलें आनी हुतात्म्यांक आर्गां ओंपलीं. पुलीस आनी छात्रसैनिकांनी तिरंग्याक सलामी दिली.
ह्या वेळार यत्ता 10 वी आनी 12 वेच्या गुणेस्त विद्यार्थ्यांचो भोवमान केलो. स्वातंत्र्य दिसा निमतान आयोजीत चित्रकला, रांगोळी आनी उलोवपाचे सर्तींतल्या जैतिवंतांक इनामां भेटयलीं.
तशेंच सारस्वत विद्यालयाचे विद्यार्थी आनी शिक्षकांनी कापडी पोतयो वितरीत करून प्लास्टिकाचो वापर टाळपाचें आवाहन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
