भांगरभूंय | प्रतिनिधी
पणजी : स्मार्ट सिटीच्या कामांत सांतिनेज दफनभुमी भायर कदंब काळांतली आशिल्ली तुळस काडिल्ल्याचें प्रजल साखरदांडे हांणी सांगलें. ही तुळस सांबाळपाची मागणीय तांणी ह्या वेळार केली. शुक्रारा तांणी वयर दिल्ले सुवातेर वचून पत्रकार परिशद घेतली. ह्या वेळार महेश म्हांब्रे आनी अल्ड्रीन सुआरीस हाजीर आशिल्ले.
ही तुळस खूब सुंदर आशिल्ली. ताचेर सोबीत नक्षीकाम आशिल्लें. तुळशीच्या लग्ना दिसा ताची पुजाय करताले. पूण स्मार्ट सिटीच्या नांवां खाला पणजेचें एक इतिहासीक दायज काबार केलां. कामाक लागून रस्ते खणल्यात. गाडयो चलोवप कठीण जालां. आतां झाडांय कापतात, अशेंय साखरदांडे हांणी म्हणलें.
डिसेंबर म्हयन्यांत हांगाचे रस्ते खणून, ताची माती हे तुळशीर उडोवन ती पुरयिल्ले. सुवारीस हांणी ताचे फोटो काडून फेसबुकाचेर घाल्ले. स्मार्ट सिटींत इतिहासीक वास्तू राखून काम करचें. ११ व्या वा १२ व्या शेकड्यांतले तुळशीची जतनाय घेवप गरजेचें अशें तांणी म्हणलें.
आमच्या भुरगेपणा वयल्यान ही तुळस हांगा आशिल्ली. स्मार्ट सिटीचीं कामां सुरू जाल्या उपरांत ती सदच्या जाग्या वयल्यान काडून दफनभूमीचे वणटीक लावन दवरली. हें करतनाच हे वास्तुची वाट लागल्या आसूंये. हांव हे विशीं कोणाकूच दोशी थारायना. असलीं कामां करतना जतनाय घेवप गरजेचें, अशें सुवारीस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
