सोर्या खातीर दरेका वाहनांची तपासणी शक्य ना : मुख्यमंत्री
भांगरभूंय | प्रतिनिधी
वाहन चलोवपाचे नेम खर करतले
भांगरभूंय । प्रतिनिधी
पणजी : सोरो पियेवन वाहन चलयतल्या दरेका चालकांची तपासणी पुलीस करपाक शकना. बाणास्तारी जाल्लो अपघात हो कायदो सुवेवस्थेक लागून जावंक ना. वाहन चलोपाचे नेम सरकार खर करतलो, अशें मुख्यमंत्री डॉ. प्रमोद सावंत हांणी सांगलें.
बाणास्तारी हांगा आयतारा राती भिरांकूळ अपघात जावन तिगांक मरण आयलें आनी तीग जाण जखमी जाले. ह्या अपघाताक लागून सोरो पियेवन गाडी चलोपाचेर परत चर्चा सुरू जाल्या. विरोधी पक्ष फुडारी युरी आलेमांव हांणी सभाघरांत झिरो आवराक बाणस्तारी अपघाताचो मुद्दो काडलो. सोरो पियेवन गाडी चलोपाच्या प्रकारांक लागून अपघात जातात. तरी सोर्याच्या दुबावान दरेकी वाहनांची तपासणी करप शक्य ना, अशें मुख्यमंत्र्यानी सांगलें.
आयतारा राती मर्सिडिजी बेंझ कार चुकीचे वाटेन आयिल्ल्यान भिरांकूळ अपघात जालो. ह्या अपघातांत सुरेश फडते (58), भावना फडते (52) आनी अनुप कामकर (26) हांकां मरण आयलें. वनिता भंडारी (फोंडें), शंकर हळणकार (बाणास्तारी) आनी राज माजगांवकार (ताळगांव) हे जखमी जाले. जखमींचेर गोंय वैजकी म्हाविद्यालय हॉस्पिटलांत उपचार सुरू आसात.
म्हार्दोळ पुलिसांनी परेश सिनाय सावर्डेकार हाका अपघाता प्रकरणी आयज सकाळीं अटक केली. अपघाताक कारण थारिल्ल्या मसिर्डिज कारीन सोर्याच्यो बाटल्यो मेळिल्ल्यान चालक सोरो पियेवन गाडी चलयतालो असो दुबाव आसा. हे नदरेतल्यान तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
