सेप्टीक टँकांन देंवलो आनी घुस्मटून जीव वगडायलो
भांगरभूंय | प्रतिनिधी
म्हापशें, प्रतिनिधी : हांगाच्या एकतानगरांतले हावसींगबोर्ड कॉलनींत सेप्टीक टँक उसपुपा खातीर देंविल्ल्या यमनाप्पा मदार (२८) ह्या कामगाराक घुस्मटून मरण आयलें. ही घडणूक काल राती १२ जावन ९ मिनिटांनी घडली. म्हापशें पुलिसांनी अपघाती मरण म्हणून हे घडणुकेची नोंद केली.
एकतानगर वाठारांतले एके इमारतीची सेप्टीक टँक रिकामी करपाचें काम काल रातीं चार कामगारांनी हातांत घेतिल्लें. हातूंतलो यमनाप्पा हो कामगार भितर उरिल्लो. टँकाचें तोंड सामकें अशीर आनी ती सुमार ४ मीटर खोल आसा. तो कामगार भितर गेलो आनी कांय वेळार बेशुद्ध जावन सकयल पडलो. ताका भायर काडपा खातीर दुसरो कामगार भितर देंवलो. मात ताचोय स्वास घुस्मटूंक लागिल्ल्यान तो रोखडोच वयर आयलो. निमाणें हे विशीं म्हापशें उजो पालोवपी दळाक म्हायती दिली. दळाचे जवान थंय पावले तेन्ना टँकाचें तोंड ल्हान आशिल्ल्यान आनी तातूंत गॅस सांठून उरिल्ल्याचें तांकां कळ्ळें. ताका लागून तांणी तोंड कापून व्हडलें केलें आनी एक जवान सुरक्षिततायेचें सामान घेवन सकयल देंवलो. जवानान बेशुद्ध कामगाराक भायर काडलो. उपरांत ताका हॉस्पिटलांत व्हेलो. थंय ताका मरण आयिल्ल्याचें डॉक्टरांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
