भांगरभूंय | प्रतिनिधी
जीण आनी मरण
हांचे मदलो खीण
इतलीच आमची जीण
जल्मांक येतना मनीस रडत येता आनी वतना रडयत वता. इतलें आसलें तरी जिणें-मरणांच्या दोनूय तोंकां मदीं आशिल्ली आपली जीण अर्थाभरीत करूंक ताची धडपड चालूच आसता. जायते पावट आपले जिणेंतल्यान हेरांच्या तोंडार हांसो हाडपाचें कार्य करता. असो मनीस एकाद्रो मेलो जाल्यारूय तो अमर उरता! अशेंच एक नांव म्हळ्यार तियात्र पालकार आपली भुमिका करून, प्रेक्षकांक आपलें दुख्ख विसरूंक लावपी विनोदी नट माथेव्स कोर्रेया उर्फ ‘कॉमेडियन सॅल्वी!’
झोंप कशे केंस, सावळो रंग, मध्यम आंगलोट, दोळ्यांत तेज, आंगमोडणी चाल, जोकर कशे कपडे आनी पोटांत हांसून मुड्ड्यो पडटात तसलें सवंग! थोडक्यांत सांगचें जाल्यार टोटल कॉमेडी पॅकेज! अर्थान ‘कॉमेडीयन सॅल्वी’!
साश्ट तालुक्यांतल्या वेळ्ळे गांवच्या कोंबया भाटांत, 21 फेब्रुवारी 1974 वर्सा सॅल्वी नांवाचो तारो लिकलिकलो आनी 25 जुलय 2022 ह्या दिसाक ताणें मळबांतल्या नखेत्रां मदीं आपल्या खातीर जागो सुगूर केलो! सॅल्वीक जरी क्रिस्ती धर्मानुसार इगर्जेंत व्हरून माथेव्स कोर्रेया हें नांव दिल्लें तरी तो तियात्र मोगयां मदीं सॅल्वी ह्या नांवानूच नामनेक पावलो.
अशें म्हणटात, जिणेंत खीण कितले हें म्हत्वाचें नासता. मात, दर खिणांक तूं कितली जीण जगता ताका चड वालोर आसता! सॅल्वी आपले ल्हान जिणेंतल्यान खूब म्हान जालो!
सॅल्वीच्या आंगांत आशिल्लो लोकांक हांसोवपाचो गूण अडेचो नासून बडीचो आसलो! ताची भुमिका हे गजालीची गवाय दिताली. सुरवातेक खेळ तियात्रांतल्यान तो माचयेर चडलो. आपली लागणूक, सादेपण आनी कश्टांतल्यान आपले कलेची ताणें बुनयाद घातली. जे वरवीं भोव कमी काळा भितर सेल्वीन तियात्र बरोवपी, दिगदर्सपी तशेंच तियात्र पळयणारांच्या काळजांनी आपली सुवात निर्माण केली. ल्हान-व्हड, गिरेस्त-गरीब, जाण्टीं-नेण्टीं म्हणनासतना पुराय भौसकूच सॅल्वीन सादर केल्लें दर सवंग भावलें. ताच्या अभिनयाचें वेगळेपण फक्त क्रिस्ती समाजा भितरूच न्हय पूण हेर समाजा मदींय पावलें!
लोकांनी दिल्ली शाब्बासकी आनी तोखणायेच्या उतरांनी सॅल्वीचो आत्मविस्वास वाडलो. टॉनी पार्क हाका सॅल्वी भितर आशिल्ले कलेचो दिश्टावो घडलो. ताणें सॅल्वीक आपल्या नॉन स्टॉप तियत्रांनी हाडलो. त्या उपरांत, जॉन डिसिल्वाच्या तियात्रांतल्यान तांची फुडली ‘वाट’ (तियात्र) तयार जाली. त्या उपरांत रोजफर्न्स, मारियो मिनेजीस, पास्कोआल रोड्रीगीस, कॉमेडीयन सॅली, मिलाग्रीस दे चांदोर, आनी अशा साबार तियात्र बरोवपी तशेंच दिगदर्सप्यांच्या तियात्रांनी ताणें विनोदी भुमिका केली. ह्या जगांत कोणांकूय रडोवप सोंपें पूण हांसोवप जड! अशें आसुनूय ताणें लोकांक हांसयत तियात्र माचयेची सेवा केली!
खंयच्याय तियात्रांत सॅल्वी आसा हें कळना बाराबर त्या तियाराचो दर प्रयोग हावजफुल्ल जातालो. पुराय तियात्र वसरो हांशाच्या खळखळाटान गाजोवन उडोवंक, माचयेर ताचो प्रवेशूच पुरो जातालो. विनोदी भुमिकेंत तो भोव सहजतायेन रंगार येतालो. तो आपली भुमिका स्फूर्तपणान करतालो. ताच्या रंद्रा-रंद्रांनी विनोद भरिल्लो. जसो कितें तो लोकांक हांसोवपा खातिरूच आपले भितर हो गूणधर्म घेवन जल्मांक आयिल्लो!
सॅल्वीचें खाशेलेपण म्हणल्यार तो आपल्याचेरूच विनोद करून घेतालो! तियात्रांनी आसपी सायड-शो ताच्या दिसण्याचेरूय विनोद करपी आसतालो. देखीक, कशें सांगचें जाल्यार केन्नाय ताका ताचें सवंग करतना ‘चिचुंद्रेच्या तोंडाचो’, ‘घोणी तोंडाचो’, ‘पेसांव’, अशें म्हणिल्लें आयकूंक येतालें. अजाप म्हणल्यार त्या खिणांक तरी ताचें तोंड खरेंच तशें दिसूंक लागतालें. मागीर कितें? तियात्र पळोवंक आयिल्ल्यांक हांसून-हांसून नाका शेवट जातालो.
सॅल्वीन भुमिका केल्ली कांय तियात्रांचीं नांवां सांगचीं जाल्यार ‘पुलीस’, ‘जें फावोना तें मेवोना’, ‘दोतोर’, ‘कर्रापशन कोबार?’, ‘हे कायदे कोणें केल्यात?’ आनी हेर.
सॅल्वीन फक्त विनोदी भुमिकाच न्हय तर विनोदी कांतारांय गायतालो. ताचीं कांतारां आयकतकच लोकांचो मानसीक ताण पयस जातालो! ताच्या आंगांत आशिल्ली कला ताका फक्त हेरांनी बरोवन दिगदर्शीत केल्ल्या तियात्रांनीच घेवन रावली ना. तर, ताणें आपलेय अशे दोन तियात्र माचयेर हाडले. ‘राजा जेयता, कोंबो चोयता’ ह्या आपल्या तियात्रांतल्यान आपल्या प्रेक्षकांक आनीक लागीं ओडले.
कोवीड काळ खरें म्हळ्यार सगळें कितें उद्वस्त करून गेलो. सुमार दोन वर्सां तियात्र माचयेचो पड्डो बंद उरलो. जशें इल्लें, इल्लें करून सगळें कितें जाग्यार येता अशें दिसपाक लागलें तेन्ना आपलो ‘आठ दीस’ हो तियात्र सॅल्वीन माचयेर हाडलो. ह्या तियात्राचो रुप्या उत्सवूय मनोवपाचें भाग्य सॅल्वीक फावो जालें. मात, आपले जिणेचो भांगरा उत्सव मनोवचे पयलींच सॅल्वीन सर्गींच्या राज्यांत सासणाचो कॉन्ट्रॅक्ट सय केलो. सॅल्वी तियात्र आनी तियात्र मोग्यां पासून पयस गेलो!
केन्नाच परत ना येवपा खातीर!
सॅल्वीन आमकां हांसयलीं. आमचीं दुकां दोळ्यांतूच सुकयलीं! सॅल्वीची विनोदी भुमिका म्हळ्यार एक वेगळीच नशा! ही नशा केन्नाच देंवची ना. आमकां ‘हँगओवर’ जावचो ना! सॅल्वी सदांच तियात्र माचयेर अमर उरतलो. तियात्र वसर्यांत खंय तरी एका कोनशाक बसून आतां आमी न्हय पूण सॅल्वी हांसतलो!
ग्वादालूप डायस
8605942157
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
