भांगरभूंय | प्रतिनिधी
पणजी, बातमीदार : दर्यादेगेर जावपी प्रदुशणाची दखल घेवन १९९९ वर्सा धोरण निश्चीत केल्लें. हे विशीं सरकारान २५ फेब्रुवारी १९९९ दिसा मुंबय उच्च न्यायालयाच्या गोंय खंडपीठांत प्रतिज्ञापत्र सादर केल्लें. मात, २००४ उपरांत त्या धोरणांत काळाप्रमाण बदल करण्यात केल्यात, अशी म्हायती अॅडव्होकेट जनरल देविदास पांगम हांणी आयज न्यायालयाक दिली. ह्या कारणाक लागून मिरामारच्या सी फूड फेस्टिव्हला विरोधी दाखल केल्ले याचिकेचेर फाल्यां (६ फेब्रुवारी) प्रतिज्ञापत्र सादर करपाचो आदेश उच्च न्यायालयान सरकाराक दिला.
९ ते ११ फेब्रुवारी मजगतीं पर्यटन खात्या वतीन मिरामार दर्यादेगेर सी फूड फेस्टिव्हल आयोजीत केला. ह्या प्रकरणांत पॅट्रेसीया पिंटो, रितू प्रसाद, देविका शेट्टी, मनिषा ब्रागांझा हांचे सयत हेर सात जाणांनी खंडपीठांत जनहीत याचिका दाखल केल्या. हातूंत तांणी राज्य सरकार, पर्यटक खातें, पणजी महानगरपालिका आनी गोंय दर्यादेग वाठार वेवस्थापन प्राधिकरणाक (जीसीझेडएमए) प्रतिवादी केलां. हेच याचिकेचेर आयज सुनावणी जाली.
राज्य सरकारान दर्यादेगेर जावपी प्रदुशणाची दखल घेवन धोरण निश्चीत केल्लें. तातूंत तांणी दर्यादेगेर कसलेच तरेचे महोत्सव आयोजीत जावचे ना असो निर्णय घेतिल्लो. हे विशीं राज्य सरकाराने खंडपीठांत एके याचिकेचे सुनावणे वेळार २५ फेब्रुवारी १९९९ दिसा प्रतिज्ञापत्रा वरवीं वयली हमी दिल्या. अशें आसून लेगीत राज्य सरकार अंदूं ९ ते ११ फेब्रुवारी मजगतीं मिरामार दर्यादेगेर सी फूड फेस्टिव्हल आयोजीत करतलें असो मुद्दो खंडपीठांत याचिकादारांनी मांडलो. हाचेर एजी पांगम हांणी आयज उच्च न्यायालयांत सरकाराची बाजू मांडली. १९९९ वर्सा प्रतिज्ञापत्र सादर केल्या उपरांत २००४ वर्सा उपरांत सरकारन धोरणांत काळा प्रमाण सुधारणा केल्यात, अशें पांगम हांणी सांगलें. ते प्रमाण फाल्यां हे विशीं प्रतिज्ञापत्र सादर करचें, असो आदेश उच्च न्यायालयान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
