भांगरभूंय | प्रतिनिधी
फोंडें: कुट्टी-खांडेपार पंचायतीची ग्रामसभा सीसीटीव्ही कॅमेरे, मलनिस्सारण प्रकल्प, कावलां अड्डे, सगल्या धर्माची मसंडभूंय तशेंच आंगणवाडीच्या भाड्याचे रकमे वेल्यान बरीच गाजली. भाड्याचे कुडींत सुरू आशिल्ल्या आंगणवाडीच्या भुरग्यांच्या फुडारा खातीर घर धनयाक रोखडेंच भाडें दिवप तशेंच मसंडभूंय स्थगिती घेतिल्ल्यान न्यायालयांत वेवस्थीत बाजू मांडपाचो थाराव घेतलो.
कुट्टी हांगासरल्या सगल्या धर्माचे मसंडभुंयेंत गुपचूपणान बेतोडें आनी शिरोडें वाठारांतल्या कुडीचो विलो लायत आशिल्ल्याचो प्रस्न फाटले ग्रामसभेंत उपस्थीत केल्लो. ते प्रमाण थंयच्या सरपंचाक आनी आमदाराक पत्र धाडून म्हायती दिवपाचो थाराव त्या वेळार घेतिल्लो. आयतारा कुट्टी पंचायतीचे सरपंच हरीश नायक हांचे अध्यक्षताये खाला जाल्ले ग्रामसभेंत बेतोडें आनी शिरोडेंच्या कांय समित्यांनी कुट्टी पंचायतीच्या पत्रा विरोधांत वचून न्यायालया कडल्यान स्थगिती मेळयल्या.
न्यायालयाच्या आदेशा प्रमाण दरेक पंचायत वाठारांत मसंडभूंय आसप गरजेची आसा. पूण शिरोडें आनी बेतोडें पंचायत वाठारांतल्याे कुडी गुपचूपणान कुट्टी मसंडभुंयेंत हाडत आशिल्यान ताची पुराय म्हायती न्यायालयाक दिवपाचो थाराव आयतारा घेतलो.
पंचायत वाठारांत भाड्याचे कुडींत सुरू आशिल्ली आंगणवाडीक पंचायती वतीन म्हयन्याक भाडें दितात. पूण फाटल्या कांय म्हयन्यां सावन पंचायत कचेरेंतल्यान भाडें दिवंक नाशिल्ल्यान सेविकांक स्वता घर धनयांक भाडें दिवपाची वेळ आयल्या. हे विशीं ग्रामस्थांनी रोखडेंच भाडें दिवपाचो थाराव घेवन दर वर्सा 200 रुपया वाड करून दिवपाचो थाराव घेतला. पंचायती वतीन दरेक आंगणवाडी केंद्राचें भाडें म्हूण म्हयन्याक देड हजार रुपया दितात.
सरपंच हरीश नायक हांणी भाड्यान सुरू आशिल्ल्या आंगणवाडी केंद्राच्या घर धनयाची पुराय म्हायती मागयिल्ली. म्हायती मेळूंक नाशिल्ल्यान रक्कम तशीच उरिल्ली. ही रक्कत राेखडीच दिवपाची तरतूद केल्या. तशेंच सगल्या धर्माचे मसंडभुंये संबंदी न्यायालयान दिल्ले स्थगिती खातीर कायदेशीर बाजू मांडटले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
