भांगरभूंय | प्रतिनिधी
मडगांव, प्रतिनिधी ः सासश्टी तालुक्यांत 16 वर्सां पिरायेचे चलयेचेर तिच्या सावत्र बापायन आनी काकान अत्याचार करपाची घडणूक उक्ताडार आयल्या. हे विशीं पुलिशेंत गुन्यांव नोंद करुन दोगांकय पुलिसांनी आयज अटक केली.
मेळिल्ले म्हायती प्रमाण, पिडितेची आवय कामा निमतान परदेशांत रावता. पयल्या घोवा कडल्यान घटस्फोट घेवन तिणें दुसरें लग्न केलें. आवय कामाक लागून परदेशांत आशिल्ल्यान 16 वर्सांचे चली सावत्र बापाय कडेन रावताले. ताचे वांगडा घरांत काका आनी दोन वर्सांचो सावत्र भाव रावतालो. चलयेची जापसालदारकी बापायचेर सोडून आवयन परदेशांतली स्विकारली. पूण पिडितेच्या सावत्र बापायन तिचेर लैंगीक अत्याचार केलो. डिसेंबर 2020 ते जानेवारी 2024 मेरेन चार वर्सां ते चलयेर अत्याचार जातालो. हाचे भायर सावत्र काकाय कडल्यान पिडित चलयेक स्पर्श करप, तिका त्रास दिवप चालूच आशिल्ले. निमाणे ह्या सगळ्या अत्याचाराक वाजेवन पिडित चलयेन पुलिशेंत कागाळ दाखल केली.
मायणा कुडतरी पुलीस निरिक्षक अरुण गावस देसाय हांणी हे कागाळीची रोखडीच दखल घेतली आनी दोनूय दुबावितांक अटक केली. हे प्रकरणांत लैंगीक अत्याचार, चलयेचो वापर करप ह्या प्रकरणांत गोंय बाल कायदो, बाल संरक्षण कायद्या खाला दोगांचेर गुन्यांव नोंद करुन तांका अटक केली. हे प्रकरणांत पुलीस उपनिरिक्षक प्रशांत भगत फुडली चवकशी करतात.
मजगतीं, दक्षीण गोंयांत फाटल्या दोन वर्सांत दर वर्सा 32 लैंगीक अत्याचाराचीं प्रकरणां नोंद जाल्यांत. अशो जायत्यो घडणुको नात्यांतल्या आनी वळखीच्या लोकां कडल्यान घडल्यात, अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
