भांगरभूंय | प्रतिनिधी
उपजिल्होधिकारी मिलिंद्र वेळीप हांचे विनंतीक दिलो मान
सांगेंच्या धरण पिडितांचेर अन्याय करून तांकां हिणसावपा खातीर उदका स्रोत खात्यान 15 ऑगस्ट दिसा धरणाच्या उदका पसून पीक काडपी शेतकारांचो भोवमान सुवाळो आयोजीत केल्लो. ते कार्यावळीक सांगेंच्या धरण पिडितांनी काळे बावटे दाखोवन निशेध करपाचें सांग्यार घेतिल्ले पत्रकार परिशदेंत थारायिल्लें.
ते प्रमाण कार्यावळीक 100 टक्के काळे बावटे दाखोवपाचे आशिल्ले. पूण काल (सोमारा) उपजिल्होधिकारी मिलिंद्र वेळीप हांणी धरण पिडितांची बसका घेवन आपूण स्वता ह्या विशयाचेर लक्ष घालून हेर अधिकाऱ्यां कडेन चर्चा करून हो विशय सोडोवपाचो यत्न करता. म्हजेर विस्वास दवरून ही कार्यावळ रद्द करात अशी विनंती केली.
ते प्रमाण धरण पिडितांनी आयज (मंगळारा) काळो बावटो दाखोवपाची कार्यावळ रद्द केली. ह्या वेळार अॅड. आनंद गांवकार हांणी सांगलें की आयची काळे बावटे दाखोवपाची कार्यावळ रद्द केल्ली आसली तरी जो मेरेन आमच्यो मागण्यो पुराय जायनात तो मेरेन आमचो संघर्श चालूच उरतलो. उरिल्ल्या लोकांक भुंयखंड मेळना तो मेरेन आमी ओगी बसचे नात अशें गांवकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
