भांगरभूंय | प्रतिनिधी
डॉ. रोशन नाझारेथ: हळदोण्यां डेंग्यू दुयेंती मदीं वाड
म्हापशें: डेंग्यूच्या दुबावीत प्रकरणांनी वाड जायत आशिल्ल्यान लोकांनी तांचे आशिकुशीचीं उदक सांठोवन दवरिल्लीं आयदनां आनी हेर वस्तू सप्तकांतल्यान एकदां रितीं करचीं. जेणे करून हीं आयदनां रितीं केल्ल्यान डेंग्यू तशेंच जळारांची निर्मिती आनी दुयेंस उणें जावपाक मजत जातली अशें आवाहन हळदोणें भलायकी केंद्राचे भलायकी अधिकारी डॉ. रोशन नाझारेथ हांणी केलां.
ज्या लोकांक जोर येत आसल्यार तांणी रोखडोच भलायकी केंद्रा कडेन संपर्क सादचो. ताका लागून खंयच्याय दुयेंसाचो प्रसार आडावपा खातीर गरजेची ती उपाय येवजण ताकतिकेन हातांत घेवप शक्य जातलें अशेंय आवाहन डॉ. नाझारेथ हांणी केलां.
मेळिल्ले म्हायती प्रमाण हळदोणें मुळाव्या भलायकी केंद्राच्या कार्यक्षेत्रांत डेंग्यू दुयेंतींची संख्या वाडत आसा. अंदूं जानेवारी सावन जुलय मेरेन डेंग्यूचे फक्त सात दुयेंती सांपडिल्ले. जाल्यार 36 दुबावीत दुयेंती सांपडल्यात. पूण ऑगस्ट सावन दुयेंती मदीं वाड जाल्या. ऑगस्टांत 20 दुयेंती सांपडले. तातूंत दोगांक डेंग्यू जाल्ल्याची पुश्टी मेळ्ळ्या. जाल्यार आतां मेरेन सप्टेंबरांत चार डेंग्यूचे दुयेंती सांपडल्यांत. जाल्यार 20 दुबावीत दुयेंतींचो आस्पाव आसा. ह्या भलायकी केंद्राचे शिमेंतलो मयडें गांव हो डेंग्यू खातीर अतिसंवेदनशील थारला.
भलायकी केंद्राच्या कर्मचाऱ्यांच्या यत्नाक लागून वाठारांतलीं उदक सांठयिल्लीं आयदनां रितीं करपा सयत हळदोणें भलायकी केंद्रां खाला डेंग्यूची परिस्थिती नियंत्रणांत हाडपाक आमी येसस्वी थारल्यात. हें सांठोवन दवरिल्लें उदक रितें करपाची मोहीम आमी हातांत घेतल्या अशेंय नाझारेथ हांणी सांगलें.
चवथीचे पयली दोन सप्तकां सरपंच आनी पंचायतीच्या सहकार्यान भलायकी केंद्राच्या कर्मचाऱ्यांनी खाशेली मोहीम राबयिल्ली. त्या वेळार आमकां दोन दुबावीत आनी एका डेंग्यू दुयेंतीची पुश्टी जाल्ल्याची नोंद जाल्या.
अशेच तरेन भलायकी केंद्राच्या शिमेंतल्या गांवांनी आयदनांतलें उदक रितें करपाची मोहीम राबयतले. जेणे करून जळारांची पैदास उणीं जातली. कारण एक जळार सुमार 300 तांतीं घालता. तातूंतल्या सुमार 150 तांतयांनी डेंग्यूचे विशाणू तयार जातात.
एखादे व्यक्तीन सप्तकांतल्यान एकदां आपल्या घरांतलीं आयदनां रितीं केल्यार डेंग्यूचीं प्रकरणां उणीं जावपाक मजत जावंक शकता अशें डॉ. नाझारेथ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
