भांगरभूंय | प्रतिनिधी
दिवचल: सांखळे राधाकृष्ण मुरलीधर संस्थाना भायर मुख्यमंत्र्यान लायिल्ल्या 111 फूट लांबायेच्या उजवातीन काल जाल्ल्या सुवाळ्यांत एकाच वेळार तीन कडेन उजवात पेटोवपाचो संवसारीक विक्रम केलो. साईकल प्युअर उजवातीन हाचे पयलीं 108 फूट लांबायेची उजवात लायल्या. पूण ह्या खास सुवाळ्यांत सांखळे गोंय, ठाणें मुंबय आनी म्हैसूर कर्नाटक ह्या तीन शारांनी उजवात लायल्या अशी म्हायती कंपनीचे असोसिएट उपाध्यक्ष डॉ. शिरीन रेजिनाल्ड हांणी दिली.
ही उजवात मुख्यमंत्री डॉ. प्रमोद सावंत हांचे हस्तुकीं पेटयली. ती 22 दीस सेगीत चलतली. हे उजवातीक लागून सांखळे एक वेगळेंच आकर्शण निर्माण जालां, आनी सांखळेकारांची ही उजवात लक्ष ओडून घेता.
हाचे पयलीं कंपनीन 108 फूट लांबायेची उजवात तयार केल्ली. पूण ह्या खास सुवाळ्यांत 111 फूट लांब उजवात सांखळी गोंय, ठाणे मुंबय आनी म्हैसूर कर्नाटक हांगा लायल्या. गोंयची उजवात मुख्यमंत्री डॉ. प्रमोद सावंत हांचे हस्तुकीं, ठाणें मुंबयची उजवात मुख्यमंत्री एकनाथ शिंदे हांचे हस्तुकीं जाल्यार म्हैसूरांतली उजवात रामलल्लाची मुर्ती तयार केल्ले कलाकार योगीराज हांचे हस्तुकीं पेटयली.
गोंयांत ही उजवात पेटोवपाची संद दिल्ले खातीर उपाध्यक्ष शिरीन रेजिनाल्ड हांणी मुख्यमंत्री डॉ. प्रमोद सावंत हांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
