भांगरभूंय | प्रतिनिधी
विजय सरदेसायः लोकांचो विरोध आसुनूय गांवांतल्यान रस्तो तयार करपाचो यत्न
फोंडें: भोमा गांवांतले लोक पुर्वजांचो गांव वाटावपा खातीर बायपास रस्त्याची मागणी करतात. पूण सरकार थळाव्या लोकांच्या विरोधांत गांवांतल्यान रस्तो तयार करपाचो यत्न करून थळाव्या लोकांचेर अन्याय करता. सरकारा आड लढो दिवपा खातीर गोवा फॉरवर्ड पक्ष थळाव्या लोकांक तेंको दितलो. थळाव्या लोकांनी ते खातीर एकठांय रावन लढो दिवपाची गरज आशिल्ल्याचें आमदार विजय सरदेसाय हांणी सांगलें.
भोमा काल (आयतारा) सांजवेळा जाल्ले बसकेंत आमदार विजय सरदेसाय उलयताले. ह्या वेळार आमदार विरेश बोरकार, स्वप्नेश शेर्लेकार, दीपक कळंगूटकार, पंच वांगडी सुनील जल्मी, देवस्थान समितीचे अध्यक्ष सप्तेज नायक, सुनील नायक, सूर्या नायक आनी हेर मानेस्त हाजीर आशिल्ले.
केंद्रीय मंत्री नितीन गडकरी हांची भेट घेवन भोमकारांच्या प्रस्नाचेर आपणें चर्चा केल्ली. केंद्रीय मंत्री नितीन गडकरी हांणी ग्रामस्थांचे मागणेची दखल घेवन बायपास रस्तो उबारपा खातीर यत्न सुरू केल्यात. पूण गोंय सरकारा मदल्या कांय मंत्र्यांक बायपास रस्तो नाका. ताका लागून लोकांनी न्याय मेळोवपा खातीर आआयटी प्रमाण लढो दिवपाची गरज आशिल्ल्याचें विजय सरदेसाय हांणी सांगलें.
आमदार विरेश बोरकार हांणी सरकार गांवांत फूट घालून विवीध प्रकल्प उबारपा खातीर यत्न करीत आसा. लोकांच्या हिताचे प्रकल्प उबारपा खातीर सरकार यत्न करिनाशिल्ल्याचें दिसून येता. भोम गांवांतल्यान रस्तो व्हरपा खातीर सरकार थळाव्या लोकांचेर जबरदस्ती करीत आशिल्ल्यान आरजी पक्ष लोकां बरोबर रावन सरकारा आड लढो दितलो अशें तांणी सांगलें.
स्वप्नेश शेर्लेकार हांणी सरकारान थळाव्या लोकांची दिशाभूल करची न्हय. पुर्वजांनी गांवपण राखून दवरलां. पूण सद्याचें सरकार भोमकारांची दिशाभूल करून रस्त्याचें रुंदीकरण करपाचो यत्न करीत आसा. थळावे लोक बायपास रस्त्याची मागणी करीत आसून सरकारान लोकांचे मागणेची दखल घेवपाची गरज आशिल्ल्याचें सांगलें.
संजय नायक हांणी सरकारान भोमकारांची दिशाभूल केल्या. लोकांची फटवणूक सरकाराक मारक थारतली. थळाव्या आमदारान लोकांक विस्वासांत घेवंक ना. गांव तिगोवन दवरपा खातीर ग्रामस्थ लढो दितले अशें तांणी सांगलें.
ह्या वेळार दीपक कळंगूटकार, उपसरपंच शैला नायक, पंच सुनील जल्मी, देवस्थान समितीचे अध्यक्ष सप्तेज नायक हांणी आपले विचार उक्तायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
