सरकार ‘तिका’ राखण दीत व्हय?

भांगरभूंय | प्रतिनिधी

ती सबळ जातना, शंभर टक्क्यांनी नासली तरी पन्नास साठ टक्क्यांनी उच्च शिक्षीत जाल्या पूण राजकी मळावेले तिचे उदरगतीक आडमेळीं आसात.

चवथीचे परबेक गोंयांत अजुनूय गोंयच्या खांची कोनशांतल्यानच न्हय जाल्यार गोंया भायले, विदेशांत स्थायीक जाल्ले गोंयकार एकठांय जातात. गांवांतलीं वर्सभर बंद आशिल्लीं घरांय उकतीं जातात. मोदक, नेवऱ्यो ताटांत घालून घरांघरांनी पावतात. नेवऱ्यो, मोदक खावन परतून वावराक लागतना म्हाळ म्हयनो, नवरात्रांचे वेध लागतात. उत्सवा वेळार भोंवतना ती आपली राखण करपाक शिकल्या, शितळ गोंय नितळ गोंयची व्हडविकाय सांगतना गोंयां भायल्यान आयिल्ल्या भोंवडेकारां मदीं गोंयचे संस्कृताये विशीं जागरुकताय करपाची जापसालदारकी तिणें घेतल्यार कशें?
येता त्या 27 सप्टेंबराक संवसारीक भोंवडेकार दीस मनयतना तिका राखण दिवपाची मोख दवरून वावर सरकाराक करचो पडटलो. गोंय मोपा विमानतळा वेल्यान महासत्ते कडेन वता, गोंयांत येयात, शिस्त पाळात हेंय सरकाराक सांगचेंच पडटलें. आमचे हे गोंयचे भांगरभुंयेक काळें खत लावपाचीं, नखलामी करपाचीं सपनां पळोवपी शेजारी आसतलेच. तांकांय विस्तारवादाचे दुवाळे परतून लागल्या आसतले व्हय? त्या विस्तारवादांतल्यान हे भांगरभुंयेचे दोन कुडके जावचे न्हय हे खातीर दोळ्यांत तेल घालून गोंयकारांनी जागे रावन झुजपाची तयार करचीच.
चौकार ह्या सदरांतल्यान झुजाची, जापसालदारकेची, लागणुकेची भास कित्याक जावची, असो प्रस्न समेस्तांक पडला आसतलो. सगल्यां कडल्यान प्रस्नाची अपेक्षा आसाच, जापय दियात पूण ती मेळ्ळी नाजाल्यार मात्शी माहिती दिवप, एकामेकांक समजून घेवप आनी सदांच राजभाशेंतल्यान उलयात, बरयात हेंच सांगप ही मोख आसची. कालचो दीस वेगळो, आयचो खीण वेगळो पूण त्या दिसा खिणांतल्यान राजभाशे खातीर जाल्ल्या मोलादीक वावराची काणी भोंवडेकारांक सांगपाची जापसालदारकी सरकाराक घेवची पडटली. थंय तिचो आदार घेवपाकच जाय. तशी आपली जापसालदारकी घेवपा इतली ती व्हड जाल्या, शिक्षण आनी मानसीकता बदलांतल्यानय ती घडल्या, दादल्यां वांगडा चलत तिणें ब्रिटीश प्रधानमंत्री पद परतून मेळयलेंच. तिची नसाय ताकाच न्हय तिकाय जातली पूण ती फाटीं पळयनासतना फुडें वतली. तशें करतना एक दीस तीय सोंपतली सोनाली फोगट वा स्कार्लेट इडन किलिंगा वरी. तेच खातीर तिचे राखणेची जापसालदारकी सरकाराक घेवची पडटली त्या भायर भांगरभूंय गोंय बदनाम जावची न्हय म्हणून सादूर रावपाक जाय.
एकेच घडणुकेन ऐन चवथी वेळार गोंयची बदनामी संवसारभर जाली, ताचे परिणाम पर्यटनाचेर जावचे न्हय म्हणून सरकार उपाय करतलें अशी आस्त आसा. फकत बसका घेतल्यो, अधिकाऱ्यां कडेन भासाभास केली म्हणून तिका राखण मेळची ना. तिचे राखणे खातीर रात आनी दीस वावरांत आसपी सक्षम अस्तुरी पुलीस यंत्रणा घडोवपाक जाय. अस्तुरे वांगडा तो आसपाकच जाय, ताणें तिचो आदर केलो, तिच्या वावराक बळगें दिल्यार भारतांतूय ती प्रधानमंत्री कित्याक जावची न्हय? सोनाली, स्कार्लेट एक देशी, एक विदेशी, पूण निमाणे दोगूय अस्तुऱ्यो आनी तेच खातीर तिका सोंपयतल्यांक खर ख्यास्त मेळची म्हणून अस्तुरेक झुजचेंच पडटलें.
स्कार्लेट गेली तेन्ना तिका न्याय मेळोवन दिवपा पासत तिचे आवयक प्रदेश भाजपाच्या कार्यालयाचे माचयेवेल्यान आवाज मेळ्ळो. सोनाली तर भाजपाची फुडारी. तिची अवस्था अशी कशी जाली? दर्यादेगेवेल्या वाठारांतच न्हय हे भांगरभुंयेंत कितें चलता हाचो सोद घेवपाची मागणी प्रदेश भाजपातल्यो अस्तुऱ्यो करीत व्हय? गोंय बायलां आयोगान सोदकाम केलां आसत? अन्याय, अत्याचार सोंसत मुखार वतना तिणें फटींग जावचें न्हय, निर्भया जातना सरकारान तिका राखण दिली ना जाल्यार तिणें तिची जापसालदारकी घेवची. ती व्हड जातना, ती सबळ जातना, शंभर टक्क्यांनी नासली तरी पन्नास साठ टक्क्यांनी उच्च शिक्षीत जाल्या पूण राजकी मळावेले तिचे उदरगतीक आडमेळीं आसात. तीं पयसावपा खातीर एक अस्तुरी शरिरान अजुनूय बळिश्ट ना हें मतींत दवरून तिका राखण दिवपी कायदो करचोच पडटलो.
स्कार्लेट घडणुके उपरांत 2012 वर्सा सरकार घडयतकीच आदले मुखेलमंत्री मनोहर पर्रिकार हाणी बायलां खातीर खासा बसगाडयांची वेवस्था केल्ली, अजुनूय ती आसा अशें समजुया, गरज आसा जाल्यार बदल करुया. दर एका तालुक्यांतल्यान सकाळ, सांजेवेळारच न्हय जाल्यार रातीच्या वेळारय अस्तुऱेच्या प्रवासा खातीर विशेश बसगाडयो जायच. सर्वसादारण बसगाडयांनी तिचे खातीर आशिल्ले आसन वेवस्थे विशीं सरकार नियाळ घेत व्हय? सोनालीचे घडणुके विशीं राष्ट्रपती द्रौपदी मुर्मू हांणी म्हायती मागल्या आसत व्हय?
सरकारांतलें बायलां आनी भुरग्यां कल्याण खातें म्हत्वाचें. त्या खात्याचेर जापसालदारकी फकत अस्तुरे विशींच्या येवजण्यांची कित्याक? भुरग्यां विशीं येवजण्यो खंय आसात? येवजण्यो आसल्यो, त्यो चालीक लागल्यो म्हणून बायलां, भुरग्यां कल्याण खात्याचेंच न्हय जाल्यार खंयच्याच खात्याचें जैत सिद्द जावचें ना. येवजण्यांचो नियाळ घेवप, तांची माहिती लोकां मेरेन पावोवप आनी येवजण्यांचो लाव शंबर टक्के दिवप ही दर एका खात्याची जबाबदारी. ते जबाबदारीक पाळो दिवपी अधिकारी सरकारांत आसात?
चवथी वेळार बाजार भरले थंय अस्तुर्‍यांनी केल्ल्या वावरांचें फळ कोणाक मेळ्ळें वा मेळटलें? ताचो लाव अस्तुरेक सदांच मेळत? प्रशासनांतले अस्तुरेच्या वावराचो सरकारान शिस्तीन नियाळ केल्यार चडांत चड वावर अस्तुरी करता हें कळटलें, पूण तिची नसाय नासपी दादल्या बायलां कडल्यान तो जायत? ती म्हणल्यार मांडवी न्हंये वरी, खळखळ व्हांवपी सरिते वरी. तिचे वरी हजारांनी मांडवी, सरिता गोंयांत आसात, गणपती विसर्जना वेळार त्यो म्हेळ्यो जाल्ल्यो आसल्यार तांचे नितळसाणीची जापसालदारकी घेवपी नेमावळ सरकारान करपाक जाय. नितळसाणी पासत आदल्यो राज्यपाल मृदुला सिन्हा वावरिल्ल्यो, सध्याचे राज्यपाल तांचीं तत्वां फुडें व्हरतना आपले घरकान्नीक स्वतंत्र अस्तित्व मेळोवन दीत व्हय?

सुहासिनी प्रभुगावकर
9881099260