भांगरभूंय | प्रतिनिधी
भांगरभूंय । प्रतिनिधी
म्हापशें ः राज्यांत सुमार 20- 25 वर्सां पसून 800 परस चड होमगार्ड पुलीस खात्या खाला काम करतात. तशेंच 10 वी पास आशिल्ल्या आनी 50 पिराय पार केल्ले सुमार 60 आनी 50 पिरायेची मर्यादा जाल्ले 82 गृहरक्षक आसात. हे गृहरक्षक सरकाराच्या निर्णया कडेन आशा लावन बसल्यात.
देड वर्सां पयलीं सरकारान गृहरक्षकांचो पुलीस खात्यांत आस्पाव करून घेवपाचो निर्णय घेतिल्लो. ते प्रमाण पिरायेची मर्यादा 50 सकयल आनी धावी पास जाल्ल्या 183 गृहरक्षकांची वळेरी तयार केल्ली. तांतल्या 101 जाणांक सध्या पुलीस कॉन्सटेबल म्हणून प्रशिक्षणा उपरांत खात्यांत आस्पावन घेतल्यात.
ह्या 101 मदले 82 जाण उरल्यात. जांची सरकारान वैजकी तपासणीय आजूनय घेवंक ना. हे गजालीक देड वर्स जाल्ल्यान कांय जाणांनी पिरायेची पन्नाशी सध्या हुपल्या. जाल्यार हे वळेरेंतले चडशे जाण 50 शीच्या हुंबर्यार आसात. ताका लागून सरकारान आमकां वर्सां जावचे पयलीं पुलीस सेवेंत रुजू करचें, अशी मागणी गृहरक्षकांनी केल्या.
ह्या गृहरक्षकांनी 17 ते 25 वर्सां सेवा दिल्या. तशेंच 50 शी वयर आनी 10 वी पास जाल्ले सुमार 60 गृहरक्षक आसात. तशेंच 10वी पास जावंक नाशिल्ल्या गृहरक्षकांचो आंकडो 800 चेर आसा. जांणी 20 ते 25 वर्सां सेवा दिल्या. धावी पास जाल्ल्या ह्या गृहरक्षकांचो आंकडो व्हड आशिल्ल्यान सरकारान आमकांय आठवी पास जाल्ल्या निकशाचेर सरकारी सेवेंत आस्पावन घेवचें. अशें जावंक ना जाल्यार आमचेर व्हड अन्याय जातलो, अशें गृहरक्षकांचें म्हणणें आसा.
जायत वर्सां सावन गृहरक्षकांक पुलीस सेवेंत आस्पावन घेवपाचो यत्न आतांच्या सरकारान सोडयला. ताका लागून मुख्यमंत्री डॉ. प्रमोद सावंत हांणी आमकां चिंता मुक्त करचें, असो उलो गृहरक्षकांनी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
