भांगरभूंय | प्रतिनिधी
अॅप्रेंटीसशीप’ येवजणेची राज्यांत अंमलबजावणी
भांगरभूंय प्रतिनिधी
पणजी : सरकारी नोकरी मेळपाक अॅप्रेंटीसशीप प्रशिक्षण सक्तीचें करपाचो विचार राज्य सरकारा कडल्यान सुरू आसा. सरकार बेगिनूच हो निर्णय घेवपाक शकता, अशें मुख्यमंत्री डॉ. प्रमोद सावंत हांणी शेनवारा स्पश्ट केले.
अॅप्रेंटीसशीप येवजणेच्या जागृती खातीर पणजे घेतिल्ले पत्रकार परिशदेंत ते उलयताले. कुशळटाय विकास खात्याचे सचीव प्रसाद लोलयेंकार, संचालक ज्योती कुमारी आनी मानेस्त ह्या वेळार हाजीर आशिल्ले.
‘स्वयंपूर्ण गोंय 2.0’ खाला राज्यांतल्या तरणाट्यांक कुशळटायेचें प्रशिक्षण दिवपाचे यत्न सरकारा कडल्यान सुरू आसात. ताचोच एक भाग म्हूण केंद्र सरकाराची अॅप्रेेंटीसशीप येवजण गोंयांत राबोवपाचो निर्णय सरकारान घेतला. हे येवजणे खाला 15 जुलयाक जागतीक कुशळटाय दिसाचे निमतान राज्यभरांतल्या 10 हजार तरणाट्यांक अॅप्रेंटीसशीप पत्रां दितले, अशें मुख्यमंत्री डॉ. प्रमोद सावंत हांणी म्हणलें.
अॅप्रेंटीसशीप पत्रां मेळिल्ल्यांक फुडल्या एका वर्सांत सरकारी खातीं, खाजगी कंपनी, उद्देग, पांच नकेत्री हॉटेलां, बँको, विमो कंपनी हातूंत प्रशिक्षण घेवपाक मेळटलें. ते खातीर सरकारान सगल्याेच कंपनी, उद्देग, हॉटेल वेवस्थापना सयत बिल्डर, सीए, कंपनी सेक्रेटरी, क्रेडाय हांचे कडेन चर्चा केल्या. ह्या सगल्यांकूच कुशळ मनीसबळाची गरज आशिल्ल्यान तांणी तरणाट्यांक एक वर्सां खातीर अॅप्रेंटीसशीप (प्रशिक्षण) दिवपाचें मान्य केलां, अशें मुख्यमंत्र्यांनी सांगलें.
मजगतीं, गोंयांत सध्या कुशळ मनीसबळाची गरज आसा. कुशळ मनीसबळ गोंयांत उपलब्ध नाशिल्ल्यान कंपनी, उद्देगांक हेर राज्यांतल्यान अशें मनीसबळ अायात करचे पडटा. हाचे मुखार तशें जावचे न्हय, थळाव्यांक रोजगाराची संद उपलब्ध जावची, ह्या हेतान सरकार प्रशिक्षण येवजण राबयता, अशें मुख्यमंत्री डॉ. प्रमोद सावंत हांणी सांगलें.
‘अॅप्रेंटीसशीप’ येवजणेचे फायदे
-गोंयांतले जायते तरणाटे पदवी, पदव्युत्तर शिक्षण घेतले उपरांत सरकारी वा बऱ्या पगाराचे नोकरे खातीर बेकार उरतात.
-तांकां तांच्या क्षेत्रांतल्या कामांचो अणभव मेळचो, हे खातीरूच अॅप्रेंटीसशीप कायदो 1961 खाला केंद्राच्या येवजणेची गोंयांत अंमलबजावणी करतले.
-धावी मेरेन शिक्षण घेतिल्ले तशेंच पदवी, पदव्युत्तर शिक्षण पुराय केल्लांकूय हे खातीर https://www.apprenticeshipindia.gov.in ह्या पोर्टलाचेर नोंदणी करपाक मेळटली.
-नोंदणी केल्ल्या तरणाट्यांक अॅप्रेंटीसशीप पत्र दितलें, तांकां तांच्या क्षेत्रां प्रमाण अॅप्रेंटीसशीप करपाक मेळटली.
-ते खातीर तांकां 8 ते 20 हजार रुपया मेरेनचे मानधन वर्सभर दितलें.
-अप्रेंटीसशीप काळ पुराय जाले उपरांत कुशळटाय विकास मंत्रालयाचें प्रमाणपत्र दितलें. ताचो फायदो नोकरे खातीर जातलो.
-अॅप्रेंटीसशीप काळ पुराय जाले उपरांत संबंदीत कंपनी, उद्देगांक गरज आसल्यार थंयच तांकां कायमस्वरूपी नोकरी मेळटली.
-सरकारी खात्यांत पांच हजारां परस चड जाणांक अप्रेंटीसशीप दिवपाचो निर्णय सरकारान घेतला. फुडल्या काळांत अॅप्रेंटीसशीप येवजण सातत्यान सुरू उरतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
