सरकारी नोकरेचें पत्र केलें परत
भांगरभूंय | प्रतिनिधी
गरजेवंताक नोकरी दिवची : पराग रायकार हांची मागणी
मडगांव : खुबशे जाण सरकारी नोकरी मेळोवपाक बरेच यत्न करतना दिसतात. पूण सुटके झुजारी गजानन रायकार हांचो चलो पराग हांणी घरा चलून आयिल्ली सरकारी नोकरी परत केली. ताचो स्वताचो वेवसाय आशिल्ल्यान ताका सरकारी नोकरे खातीर मेळिल्लें पत्र परत केलें आनी खरेंच गरज आशिल्ल्या सुटके झुजार्याच्या चल्याक ही नोकरी दिवची अशी मागणी तांणी सरकारा कडेन केली.
आयज बुधवारा सचिवालयांत मुख्यमंत्री डॉ. प्रमोद सावंत हांचे हस्तुकीं सुटके झुजार्यांच्या 42 भुरग्यांक नोकरेचीं पत्रां वाटलीं.
फाटल्या कितल्याशाच वर्सां सावन सुटके झुजार्यांच्या भुरग्यांक नोकरी दिवन तांच्या त्यागाचो मान दवरचो, अशी मागणी सुटके झुजार्यांचीं भुरगीं करतालीं. राज्य सरकारान हे विशीं कागदोपत्री प्रक्रिया पुराय करून बुधवारा सचिवालयांतले कार्यावळी वेळार सुटके झुजार्यांच्या भुरग्यांक नोकरेचीं पत्रां वाटलीं.
सुटके झुजार्यांच्या भुरग्यांक नोकरी दिवपाचे येवजणे वरवीं आकें- मडगांवां रावपी पराग रायकार हांकांय हें पत्र भेटयलें. पराग रायकार हांकां कनिश्ठ लिपीक पदा खातीरचे नोकरेचें पत्र दिल्लें. पराग रायकार हे ज्येश्ठ सुटके झुजारी आनी कवी गजानन रायकार हांचे पूत. पूण तांणी तें पत्र परत करपाचो व्हड निर्णय घेतलो.
हालींच्या काळांत असलो निर्णय सहसा कोण घेनात. तातूंत ती सरकारी नोकरी आसल्यार कोणूच सोडिनात. ताका लागून श्री. रायकार हांच्या निर्णयाक खूब म्हत्व आसा.
गरजेवंतांक ही नोकरी दिवची : रायकार
राज्य सरकारान दिल्ल्या स्वयंपुर्णतेच्या संदेशा प्रमाण आपणें वेवसाय सुरू करून तातूंत आपली बरे तरेन उदरगत जाल्या. सध्या 50 परस चड कामगार म्हज्या वेवसायांत आसा. अश्या वेळार नोकरी घेतल्यार हेरांचेर अन्याय जातलो. ही नोकरी खंयच्याय गरजेवंत सुटके झुजार्याच्या चल्याक मेळ्ळ्यार एक घर चलतलें. ताका लागून मुख्यमंत्र्यानी दुसर्या गरजेवंतांक ही नोकरी दिवची, अशी मागणी पराग रायकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
