समस्या बेगीन सुटाव्यो जावच्यो

भांगरभूंय | प्रतिनिधी

हीं कामां जातात काय फक्त आस्वासनां मेळटात, तें संबंदीत मतदार आनी ताच्या लोकप्रतिनिधीकूच खबर. ‘प्रशासन तुमच्या दारांत’ कार्यावळींत अशें जावंक फावना.

फाटले विधानसभेच्या वेंचणुके वेळार ‘सरकार तुमच्या दारांत’ ही कार्यावळ जाल्ली. तिका प्रतिसादूय मेळिल्लो. पूण उपरांत ती बंद पडली. कांय विरोधकांच्या मतान, ती फक्त सत्ताधारी पक्षाच्या वावुरप्यां खातीर आशिल्ली. तर थोड्यांक ती प्रचाराचो एक वांटो कशी दिसली. वास्तविक असल्या कार्यावळींची देशभरांत खर गरज आसा. जंय सरकारी यंत्रणां पावपाक शकनात, अशा गांवांनी त्यो नेमान जावपाक जाय. म्हणटकच लोकांचे भौशीक प्रस्न कांय प्रमाणांत तरी सुटावे जातले. रानां- वनांनी, दोंगरांनी रावपी लाखांनी भारतीय आसात. फाटलीं 75 वर्सां ते दोळ्यांत प्राण हाडून विकासाची वाट पळयतात. ‘आयज येतोलो, फाल्यां येतोलो, पावोन पावोना….’, अशी तांच्या वाठारांतल्या विकासाची गत जाल्या. गांवगिऱ्या वाठारांतल्या लोकांक दोन वेळाचें खावपाक, जेवपाक, लायट- उदक, भलायकी सुविधा, येरादारी, शिक्षण आनी पोट भरपाक धाकटुलीशी नोकरी वा धंदो जाय. मळबांतल्या नखेत्रांची आस तांकां ना. ते सोंपेपणी प्रशासनाच्या दारांत पावपाक शकनात, म्हणटकच प्रशासन तांच्या दारांत पावपाक जाय. मुख्यमंत्री डाॅ. प्रमोद सावंत सरकाराक चार वर्सां आनी नरेंद्र मोदी सरकाराक 9 वर्सां पुराय जाल्ले खातीर 17 आनी 18 मार्चाक गोंयांतल्या उपजिल्होधिकारी कार्यालयांनी ही ‘प्रशासन तुमच्या दारांत’ कार्यावळ जातली. बारा म्हालांनी मंत्र्यांची नेमणूक केल्या. वांगडा आयएएस, वरिश्ठ सरकारी अधिकारी आसतले. पंचायत, पालिकांचेय प्रतिनिधी येतले. सगले लोकांचीं गाराणी आयकतले. दर म्हयन्याक अशी कार्यावळ सगल्या तालुक्यांच्या मुखेल शारांत वा एका गांवांत जावपाची गरज आसा.
शुक्रारा मंत्री लोकांक मेळटले. तांचे प्रस्न जाणून घेतले. शेनवारा 18 वेर ‘स्वयंपूर्ण गोंय’ उपक्रमा खाला सरकारी अधिकारी 191 पंचायतींक आनी 14 पालिकांक भेट दितले. सकाळीं 10 ते दनपरां 1 मेरेन लोकांच्यो समस्या आयकतले, ताचेर उपाय सांगतले. हे बाबतींत समस्या मांडपी लोकांक मेकळेपण जाय. तांचेर थळाव्या फुडाऱ्यां कडल्यान बंधनां आसपाक फावना. तशेंच फकत विरोधा खातीर विरोधूय थंय दिसपाक जायना. गोंयकार खावन, जेवन सुखी दिसले तरी प्रत्येकाच्यो समस्या आसात….. आनी त्यो खास करून रस्ते, उदक, वीज, भलायकी, शिक्षण, येरादारी कडेन संबंदीत आसात. जमनीचीं रुपांतरां, अधिकाऱ्यां विशी, थळाव्या फुडाऱ्यां विशीं कागाळीय आसूं येतात. सगलेच तोंडी समस्या मांडटले अशें नात. कांय जाण लेखी कागाळ वा सुचोवणी दितले. समस्या सुट्टली, सुचोवणी चालीक लागतली, हाचेर प्रशासनाक चड भर आनी लक्ष दिवचें पडटलें. कागाळ, समस्या मांडप्यां परस ती हाताळप्यांनी फाटपुरवण करची पडटली. ती सोडोवपाक मेळना जाल्यार तशें स्पश्ट सांगचें पडटलें. कारण कोणाक आशेर दवरप बरोबर न्हय. तशे बरेच लोक समस्या घेवन (चड करून वैयक्तिक कामां) दर सप्तकाक मंत्र्यांच्या बंगल्यांचेर वतात. हरशीय म्हूण साबार तरांच्या कामां खातीर तांच्या दारांत रांको लागिल्ल्यो आसतात. हीं कामां जातात काय फक्त आस्वासनां मेळटात, तें संबंदीत मतदार आनी तांच्या लोकप्रतिनिधीकूच खबर. ‘प्रशासन तुमच्या दारांत’ कार्यावळींत अशें जावंक फावना. समस्या सुट्टली काय सुटप कठीण तें शक्य तितलें बेगीन कळप बरें. तशें जाल्यार सगल्यांचोच वेळ वांचतलो…. आनी नागरिकांनी चडांत चड भौशीक कामां, समस्या घेवन वच्चें, खास करून समाजीक, गांवाच्या, गांवकारांच्या हिताचीं कामां. गांवांतल्यो भौशीक अडचणी, येरादारी, भलायकी, शिक्षण, रोजगाराचे प्रस्न तातूंत मुखेलपणान आसचे.
सरकार सगल्यांचें, प्रशासन समेस्तांचे. देखून पक्षभेद विसरून सगल्यांनी हे कार्यावळीक हाजेरी लावंक जाय. विरोधकांनीय! सरकारान आयोजित केल्ले कार्यावळींत तांणी उमेदीन वांटो घेतल्यार बरें. ती सत्ता पक्षाची कार्यावळ ही भावना कुशीक दवरल्यार हें सहज शक्य आसा. सत्ता पक्षाच्या वावुरप्यांनीय ते कार्यावळीचेर फक्त आनी फक्त आमचोच हक्क आसा, आमच्या पक्षाची ती कार्यावळ, अशें समजूंक जायना. ह्या राज्याची उदरगत करतलो जाल्यार मनभेद, मतभेद विसरून तन, मनान झटप भोव गरजेचें. गोंय स्वयंपूर्ण करपाचें वजें फक्त सरकाराच्या माथ्यार मारून हेर नागरीक हात कवळून बसल्यार गोंय मुखार वच्चें ना. भाजी, वीज, दूद आनी हेर बऱ्याच गजालींचे बाबतींत गोंय तशें स्वयंपूर्ण ना, पूण निरशेनासतना सकारात्मक नदरेन, प्रामाणिकपणान निसुवार्थान वावर करीत रावल्यार नकळटां जैताचे बावटे हुबतले, हातूंत मात्तूय दुबाव ना.